U m’on ni ngam rin’ ban’en, ma sana ga ma fithem ni ma lungum, ‘Mang angin nra yib ngog?’ Ere gur, de fel’ ni ngad fithed e re deer ney u m’on ni ngad meybilgad? Danga’, ya bin riyul’ riy e gad baadag ni ngad nanged ko ra yib angin e meybil ni gad ra tay fa danga’. Mus ngak Job ni ir be’ nib manigil ma ka immoy ba ngiyal’ ni ki maruwar u wan’ ko ra motoyil Got ko meybil rok fa danga’.​—Job 9:16.

Bay boch ban’en ni kad weliyed ko fapi article ni ke yan ni be micheg ni meybil e gathi kemus ni ban’en ni yima rin’ ni bay rogon ko teliw ara ban’en ni nge fal’eg lanin’uy. Ya riyul’ ni ma motoyil e bin riyul’ e Got ko meybil. Machane, ra motoyil ngodad ni faan gad ra meybil u rogon nib m’agan’ ngay mu kud yibilayed e pi n’en nib puluw ko tin nib m’agan’ ngay. Bin riyul’ riy e, be yog Got ni ngad chuchugurgad ngak. (James 4:8) Ere, mang angin nra yib ngodad ni faanra ud meybilgad ni gubin ngiyal’? Baaray boch i angin nra yib ngodad.

Ma magafan’um nib gel u nap’an ni ga ra mada’nag boch e magawon nib ga’, fa? Be pi’ e Bible e athamgil nga lanin’dad nnap’an ni gad ra mada’nag e magawon ma ngad “meybilgad ni gubin ngiyal’” ma gad ning ngak Got e ‘tin ni nge yog ngodad.’ (1 Thessalonika 5:17; Filippi 4:6) Be micheg e Bible ngodad ni faan gad ra meybil ngak Got ma ‘ra yororiy gum’ircha’dad nge tafinay rodad ngi i par rok Kristus Jesus.’ (Filippi 4:7) Faan gad ra weliy lanin’dad ko Chitamangidad ni bay u tharmiy, ma rayog ni nge gapas lanin’dad. Bin riyul’ riy e, aram e n’en ni be pi’ e athamgil nga lanin’dad ni ngad rin’ed, ya be gaar e Psalm 55:22, BT: “Mu pi’ e gilab rom ngak Somol, ma bayi n’ufegem.”

Boor e girdi’ u ga’ngin yang e fayleng ni ke gapas lanin’rad ni aray rogon. Hee Ran, ni ir be’ nu South Korea e yog ni gaar: “Yugu aram rogon ni boor e magawon ni ma yib ngog nib gel, machane nap’an ni gu ra meybil ma gu ma thamiy ni  ke baud lanin’ug, maku ma pi’ gelngig ni nge yag ni nggu athamgil u fithik’ e pi magawon nem.” Cecilia ni ma par u Manile’ e yog ni gaar: “Bochan ni gag reb e matin, ma aram fan nri ma magafan’ug ko pi ppin ni fakag nge chitinag, ya chiney e dabkiyog ni nge poyeg ni bochan ba mit e m’ar ni ke yib ngak. Machane, bochan ni gu ma meybil ma aram fan ni ke yag ni nge war e magafan’ rog. Gu manang nra ayuwegeg Jehovah ya nge yag ni nggu ayuwegrad.”

Ga be mochuch nib gel, ara bay boch e magawon ni ga be mada’nag nrib gel, fa? Faan ga ra meybil ngak “Got ni urngin mit e ayuw me ir e be yib rok ngodad,” ma rayog ni nge baud lanin’um. Be yog e Bible ni ma “ayuwegdad u urngin e gafgow nge kireban’ ni ma yib ngodad.” (2 Korinth 1:3, 4) Bod ni, immoy ba ngiyal’ u nap’an ni kari magafan’ Jesus nib gel ma  aram me “yan i ragbug nga but’ nge meybil.” Mang angin ni yib ngak? I “yib ba engel nu tharmiy i m’ug ngak nge pi’ gelngin.” (Luke 22:41, 43) Ku bay reb e pumoon nib yul’yul’ ngak Got ni ka nog Nehemiah ngak ni i yib boch e girdi’ nib kireb i guy rogon ni ngar taleged u boch e maruwel ni be rin’ ni fan ngak Got. I meybil ni gaar: “Got mu gelnigeg e chiney!” Pi n’en ni buch nga tomuren e be dag ni ayuweg Got ni nge dab ki rus me yag ni nge rin’ e maruwel rok nib fel’ rogon. (Nehemiah 6:9-16, BT) Reginald ni ma par u Ghana e weliy angin e meybil ni ke yib ngak ni gaar: “Nap’an ni gu ra meybil, nib ga’ nu nap’an ni kug mada’nag boch e magawon nri ma magafan’ug ngay nib gel, ma ma pagan’ug ni bochan e gu manang ni kug weliy e magawon rog ngak be’ nrayog ni nge ayuwegeg ma ke yog ngog ndariy rogon ni nge magafan’ug nib pag rogon.” Arrogon, rayog ni nge fel’ lanin’dad u nap’an ni gad ra meybil ngak Got.

Bay boch ban’en ni gad ma dugliy ni ma par angin ara wenegan nder ma chuw. Ma re n’ey e rayog ni nge magawonnagdad ara ki magawonnag e piin ni yad ba t’uf rodad. Ere, uw rogon nrayog ni ngad mel’eged boch ban’en u fithik’ e gonop? Be gaar e Bible: “Faanra dariy e gonop rok bigimed [nib ga’ nu nap’an ni ke mada’nag boch e magawon nib ga’], ma nge wenignag ngak Got, ye ir e ra pi’ ngak; yi Got e ba gol ngak urngin e girdi’.” (James 1:5) Faan gad ra ning e gonop ngak Got u daken e meybil, ma rayog ni nge fanay gelngin nib thothup ni nge pow’iydad u rogon ni ngad dugliyed boch ban’en u fithik’ e gonop. Bin riyul’ riy e, rayog ni ngad ninged gelngin Got nib thothup ni bochan e ke micheg Jesus ngodad nra pi’ e Chitamangidad ni bay u tharmiy gelngin nib thothup ngak e “piin ni yad ra ning ngak!”​—Luke 11:13.

Mus ngak Jesus ma ka immoy ba ngiyal’ ni guy nib t’uf ni nge ning e ayuw ko Chitamangin ya nge yag ni ayuweg u rogon ni nge dugliy boch ban’en nib ga’ fan. Be yog e Bible nu m’on ni nge mel’eg 12 e pumoon ni ngar manged e pi apostal rok, ‘me par ni reb e nep’ ni be meybil ngak Got.’​—Luke 6:12.

Boor e girdi’ e ngiyal’ ney ni kari mich u wan’rad ni ma motoyil Got ko meybil rodad u nap’an ni kar guyed rogon ni ke ayuwegrad u rogon ni ngar dugliyed boch ban’en u fithik’ e gonop ni bod rogon ni rin’ Jesus. Regina ni ir be’ nu Manile’ e boor e magawon ni ke mada’nag, ya thingari guy rogon ni nge ayuweg ir nge chon e tabinaw rok u tomuren ni yim’ e pumoon rok, miki tal ko maruwel ni i un ngay ni ma yag e salpiy riy ngak, ma ka i mada’nag boch e magawon u rogon ni nge chuguliy pi fak. Ere, mang e ke ayuweg ni nge dugliy boch ban’en u fithik’ e gonop? I yog ni gaar, “Gu ma taga’ ngak Jehovah u daken e meybil.” Kwabena ni ma par u Ghana e weliy fan ni ke ning e ayuw ngak Got ni gaar, “Kan talegneg ko maruwel ni gu ma un ngay ni gu ma un i toy e naun, ma rib fel’ puluwog ko re maruwel nem.” I weliy murung’agen e ngiyal’ ni baaram ni be sapnag boch e maruwel nrayog ni nge un ngay ni ngki yag e salpiy riy ngak ni gaar, “Gubin ngiyal’ ni gu ma meybil ngak Jehovah ni nge pow’iyeg u rogon ni nggu dugliy e n’en nib fel’ ni nggu rin’.” Ki ulul ngay ni gaar, “Gu manang ni ke ayuwegeg Jehovah ni nggu mel’eg reb e maruwel nrayog ni nge ayuwegeg u rogon ni nggu yognag e tin nib t’uf ko par rog, miki ayuwegeg ni nggu rin’ e tin nib t’uf ni nggu rin’ ni fan ko tirok Got ban’en.” Ku arrogon gur nrayog ni nge pow’iyem Got ni faan ga ra yibilay boch ban’en ngak ni bay rogon ko tha’ u thilmew.

Kemus nri in e kanawo’ ni kad weliyed nrayog ni nge ayuwegdad e meybil riy. (Ra ga baadag ni ngkum nang boch, mag guy e thin ni bay ko fare kahol ni kenggin e “ Boch i Angin e Meybil.”) Machane, faanra nge yib angin e meybil ni ga ma tay, ma som’on e ba t’uf ni ngam nang Got nge n’en nib m’agan’ ngay. Faanra ireray e n’en ni ga baadag, ma gamad be pi’ e athamgil nga lanin’um ni nga mog ngak bagayad e Pi Mich Rok Jehovah ni nge fil e Bible ngom. * Ya ireray tabolngin nrayog ni ngam chugur ngak e en ni ma “fulweg taban e meybil.”​—Psalm 65:2.