KENGGIN E RE KE BABYOR NEY | UW ROGON E MAHL U WAN’ GOT?

Rogon e Mahl u Wan’ Got u Nap’an e Bin Som’on e Chibog

Un gafgownag e girdi’ e ngiyal’ nem. Dariy e maruwar riy ni i meybil e pi Jew ni ur moyed u nap’an e bin som’on e chibog ngak Got ni nge ayuwegrad ni bod ni i rin’ ko pi ga’ rorad kakrom. Machane, ngiyal’ nem e ur meybilgad ni ngan ayuwegrad u tan pa’ e Am nu Roma. Ma aram mar rung’aged murung’agen Jesus. Gur, ir e ra mang fare Messiah ni kan yiiynag murung’agen? Boor e girdi’ ni ur “fineyed ni ir e bayi chuweg yu Israel u pa’ e toogor rok,” ni aram piyu Roma. (Luke 24:21) Machane, dariy ban’en ni buch. Ma nap’an ni taw ko duw ni 70 C.E., me yib e pi salthaw nu Roma ra gotheyed yu Jerusalem nge fare tempel riy.

Ere, mang e ke buch? Mang fan nde cham Got ni pa’ e pi Jew ni bod rogon ni i rin’ ko pi tapigpig rok kakrom? Maku reb e, mang fan nde yog ngorad ni ngar chamgad ko pi toogor rorad ya nge yag ni tal e gafgow ni yibe tay ngorad? Gur, ke thil e lem rok Got u murung’agen e mahl? Danga’. Machane, bay ban’en ni ke thil u rarogon piyu Jew. Ra chelgad ngar togopuluwgad ngak Jesus ni Fak Got ni ir fare Messiah. (Acts 2:36) Ere, aram fan ni math’ fare tha’ ni immoy u thilrad Got.​—Matthew 23:37, 38.

Daki yoror Got ko fare nam nu Israel nge fare Nam ni Kan Micheg, maku daki yag ni ngar ted boch e mahl nib m’agan’ Got ngay ara i ayuwegrad. Ya yiiynag Jesus ni ke chuweg Got e tow’ath rok ko fare nam nu Israel ke pi’ nga yugu reb e nam nib beech ni aram fare Israel rok Got. (Matthew 21:43) Fare ulung ko pi Kristiano ni kan dugliyrad e aram e piin nra manged fare Israel rok Got. Ere, nap’an e bin som’on e chibog min gaar ngorad: “Chiney e kam manged girdien [Got].”​—1 Peter 2:9, 10.

Ere, nap’an ni mang e pi Kristiano ko bin som’on e chibog “girdien” Got, ma gur, i cham Got ni fan ngorad me ayuwegrad ko gafgow ni i tay piyu Roma ngorad? Fa i pi’ mat’awrad ni ngar chamgad ko pi toogor rorad? Danga’. Ni mang fan? Ya faanra nge pi’ Got e ayuw u reb e cham ni ngan tay, ma ir e ma dugliy e ngiyal’ ni ngan cham riy ni bod rogon ni kad weliyed ko fa binem e article ni ke yan. Da i cham Got ni pa’ e pi Kristiano ko bin som’on e chibog, maku da i pi’ mat’awrad ni ngar uned ko mahl ni un tay e ngiyal’ nem. Ere, ba tamilang ni ngiyal’ nem e gathi aram e ngiyal’ ni ke lemnag Got ni ngan cham ngak e piin ni yad ba kireb nge piin ni yad be gafgownag boch e girdi’.

Pi tapigpig rok Got ni ur moyed u nap’an e bin som’on e chibog e ku taareb rogorad ko tin som’on e tapigpig rok Got kakrom, ya ku thingar ra sonnaged e ngiyal’ nra chuweg Got e piin ni yad ba kireb nge piin ni yad be gafgownag boch e girdi’. Ma nap’an ni yad be sonnag e re ngiyal’ i n’em, ma thingar dab ra chamgad ko pi toogor rorad. Ireray e n’en ni tamilangnag Jesus ko machib ni i tay. Bod nde yog ngak pi gachalpen ni ngar uned ko mahl, ya yog ngorad ni: ‘Nge t’uf rorad e pi toogor rorad, mar pied e meybil rok e piin ni yad be ngongliy e kireb ngorad.’ (Matthew 5:44) Nap’an ni be yiiynag Jesus murung’agen e ngiyal’ nra cham piyu Roma ko fare nam nu Jerusalem, me yog ngak pi gachalpen ndab ra pared ngar uned ko cham ni yira tay, ya thingar ra milgad ngar chuwgad u rom.​—Luke 21:20, 21.

Maku reb e, kun thagthagnag nga laniyan’ apostal Paul ni nge yoloy ni gaar: “Dab mu fulweged ngak be’ taban e kireb ni rin’ ngomed . . . Ya be yog e babyor nib thothup ni be gaar, ‘Be gaar Somol, ke mil fan ngog, ni gag e bay gu fulweg taban e kireb.’” (Roma 12:19) Be sul Paul u daken fapi thin ni ke yog Got boch e chibog u m’on riy ni bay ko Levitikus 19:18 nge  Deuteronomy 32:35. Kad weliyed ko fa binem e article ni ke yan nreb e kanawo’ ni i fulweg Got taban e kireb ni un rin’ ko girdi’ rok kakrom e aram e i ayuwegrad ni ngar chamgad ko pi toogor rorad. Ere, ba tamilang ko pi thin ney ni yog Paul ndawori thil e lem rok Got u murung’agen e mahl. Nap’an e bin som’on e chibog ma ka ma tay Got ni mahl e aram e bin nib mat’aw e kanawo’ nrayog ni nge fulweg taban e kireb riy ni yima rin’ ko pi tapigpig rok me taleg e ngongol nib kireb ni yibe rin’ nge gafgow ni yibe tay ko girdi’. Machane, kemus ni yigoo ir e bay mat’awun ni nge dugliy e ngiyal’ ni ngan cham riy nge piin ni ngar chamgad.