Immoy bochi buliyel ni i par nga i yaliy e ath ni be yib u reb e factory ma bod yaan yungi manileng. Ere, lemnag nre factory nem e ma ngongliy e manileng. Chi oloboch ney ni ke rin’ e re tir ney e gad ra par ngad fal’eged i lemnag ma ban’en nib mak’ak’ar. Machane, bay boch ban’en ni gad ma oloboch riy nrayog ni nge thilyeg e yafos rodad. Bod ni, faanra dabi beeg be’ e babyor ni kan tay nga downgin e falay rok nib fel’ rogon, ma rayog ni nge unum e falay rok nib pag urngin me magawon.

Oloboch ni gad ma tay u murung’agen boch ban’en ni bay rogon ko tirok Got ban’en e ku rayog ni nge yib wenegan nrib kireb ngodad. Bod ni, immoy boch e girdi’ kakrom nda i tamilang u wan’rad e n’en ni i machibnag Jesus. (John 6:48-68) Yugu aram rogon ma dar guyed rogon ni ngar nanged fan, ma aram mar siyeged urngin ban’en ni i machibnag. Ere, bochan e re n’ey ma aram e de yag ni ngar filed boch ban’en rok Jesus!

Ga ma beeg e Bible ni ngam fil boch ban’en riy nrayog ni nge pow’iyem, fa? Faanra ga ma rin’ ni aram rogon, ma rib manigil. Machane gur, ga be lemnag ma rayog ni ngam beeg ban’en u Bible mag lemnag fan nga bang nde puluw? Ya bin riyul’ riy e boor e girdi’ ni ke buch e re n’ey rorad. Am lemnag dalip ban’en ni ma oloboch e girdi’ riy u murung’agen boch e machib u lan e Bible.

• Bay boch e girdi’ nde puluw rogon ni yad ma lemnag fan fare thin ni be gaar “nguum par ni ba’ madgun Got u wun’um.” Yad ma lemnag nre thin ney e be yip’ fan ni ngad rusgad ngak Got. (Eklesiastes 12:13) Machane, dabun Got ni nge rus e pi tapigpig rok ngak. Be gaar: “Dab mu tamdag, ya gu ba’ rom. I gag e Got rom, dab mu rus nga ban’en. Bay gu gelnigem mu gu ayuwegem.” (Isaiah 41:10) Ra ngad pared ni bay madgun Got u wan’dad ma be yip’ fan ni ngar ud ted fan.

• Bay boch e girdi’ ni yad ma fek fan fare thin nga bang ni kan thagthagnag ni be gaar: “Gubin ban’en ni bay ngal’an , . . . ngal’an e gargel nge ngal’an e yam’.” Bay boch e girdi’ nnap’an ni yad ra beeg e re thin ney ma yad ma lemnag ni ke dugliy Got e ngiyal’ ni nge yim’ be’ riy. (Eklesiastes 3:1, 2, NW) Machane, re thin nu Bible ney e be tamilangnag rarogon e pi n’en ni ma buch u lan e yafos rodad, maku be tamilangnag ni gad gubin ni gad ra yim’. Ku be fil e Thin rok Got ni pi n’en ni gad ma dugliy ni ngad rin’ed e ra ngochnag fa n’uwnag nap’an e yafos rodad. Bod ni, be gaar: “Ra um liyor ngak Somol, ma ra n’uw nap’am.” (Proverbs 10:27, BT; Psalm 90:10; Isaiah 55:3) Ni uw rogon? Faanra ud folgad ko Thin rok Got ma ra k’aringdad ni ngad siyeged boch e ngongol nrayog ni nge k’aring boch e m’ar ngodad ni bod rogon e chingaw nge ngongol ndarngal.​—1 Korinth 6:9, 10.

• Bay boch e girdi’ ni yad ma lemnag ni fare thin ni be yog ni kan tay lan e lang nge re fayleng ney ni nge “yib e nifiy i kirebnag” e be yip’ fan nra kirebnag Got e re fayleng ney. (2 Peter 3:7) Machane, bin riyul’ riy e ke micheg Got ndabi kirebnag e re fayleng ney. Fayleng e ke tay Got “nga daken e def riy nri be par nib mudugil, ndabiyog ni ngan mithmitheg.” (Psalm 104:5; Isaiah 45:18) Re m’ag nib kireb ney e aram e n’en ni yira thang nge chuw ni bod rogon ban’en ni kan urfiy, ma gathi re fayleng ney ni gad be par riy. Ma lan e lang e rayog ni nge yip’ fan lan e lang ni bay e t’uf riy ara gin ni ma par Got riy. Dariy reb e pi n’ey ni yira gothey.

Ba tamilang ko fapi n’en ni kad weliyed nib ga’ ni ma oloboch e girdi’ u murung’agen boch ban’en ni yad ma beeg u lan e Bible. Machane, mang fan ni ma pag Got ni nge buch e re n’ey? Bay boch e girdi’ nsana ma lungurad u wan’rad: ‘Faanra rib ga’ e gonop rok Got ma gubin ban’en ni manang, ma ere rayog ni nge pi’ ba ken e babyor ngodad nrib tamilang e thin riy mab mom nrayog ni ngan nang fan. Ere, mang fan nde rin’ ni aram rogon?’ Am lemnag dalip fan nib ga’ ni ma oloboch e girdi’ u murung’agen boch ban’en ni yad ma beeg u Bible.

1. Kan ngongliy e Bible ni nge nang fan e piin nib sobut’an’rad ma yad baadag ni ngar nanged e thin riy. I gaar Jesus ko Chitamangin: “Chitamag ni gur e Somol  u tharmiy ngu but’! Kari mmagar ya kam dag ngak e piin ndar sukulgad e n’en ni kam mithag rok e piin ni yad ba llowan’ nge piin ni yad ba sukul. Chitamag, i gur e mu turguy ni nge yodoro’ nrogon nib m’agan’um ngay.” (Luke 10:21) Kan yoloy e Bible u reb e kanawo’ ni kemus ni yigoo piin ni yad baadag ni ngar nanged e tin riyul’ e rayog ni ngar nanged fan e thin riy. Girdi’ ni yad ba tolangan’ ni aram reb e lem nib ga’ ni bay rok e “piin ni yad ba llowan’ nge piin ni yad ba sukul” e ba ga’ ndarur nanged fan e thin nu Bible. Machane, piin ni yad ma lem ni bod rogon e “piin ndar sukulgad” ara piin nib sobut’an’rad ma yad baadag ni ngar nanged e tin riyul’ e aram e piin nrayog ni ngar nanged fan e thin rok Got. Ere, rib gonop Got nga rogon ni ke ngongliy e Bible!

2. Kan ngongliy e Bible ni fan ngak e piin nriyul’ ni yad baadag ni nge ayuwegrad Got ni ngar nanged fan e thin riy. I yog Jesus nib t’uf ni ngan ayuweg e girdi’ ya nge yag ni ngari tamilang u wan’rad e pi n’en ni i machibnag. Ere, uw rogon ni yira ayuwegrad? I weliy Jesus ni gaar: “En ni bay i ayuwegmed e aram [“gelngin Got nib thothup,” NW] ni en ni Chitamangiy e bayi l’og nge yib ni owcheg, ma bayi fil urngin ban’en ngomed.” (John 14:26) Ere, ma pi’ Got gelngin nib thothup ni aram e re gelngin th’abi gel ni nge ayuweg e girdi’ ni ngar nanged fan e n’en ni kar beeged u Bible. Machane, der ma pi’ Got gelngin ngak e piin ndarur taga’gad ngak ni nge ayuwegrad. Ere, aram fan ndarur nanged fan e thin riy. Ku ma pow’iy gelngin Got nib thothup e pi Kristiano ni ke yoor ban’en u Bible ni ke tamilang u wan’rad ni ngar ayuweged e piin ni yad baadag ni ngki yoor ban’en ni ngar nanged u murung’agen e Bible.​—Acts 8:26-35.

3. Bay yu yang u lan e Bible ni fin nra tamilang u wan’ e girdi’ ko ngiyal’ nib puluw ni nge tamilang riy. I yog reb e engel ngak Daniel ni profet ni nge yoloy boch e thin ni fin nra lebug nga tomuren e ngiyal’ ni immoy riy. I gaar ngak: “Daniel, chiney e ngam uchumiy fare ke babyor ma ga yip’ e hang ngay nge par nge yan i mada’ ko tin tomuren e rran.” Ke yan boor e chibog ni ke beeg e girdi’ e re babyor rok Daniel ney ni bay u Bible, machane der yag ni ngar nanged fan e thin riy. Bin riyul’ riy e, mus ngak Daniel maku de nang fan e pi n’en ni i yoloy nga but’. I yog ni gaar: “Gu rung’ag e tin ni ke yog, machane da gu nang fan.” Machane, ra munmun ma ra tamilang u wan’ e girdi’ fan e pi n’en ni yiiynag Got ngak Daniel me yog ngak ni nge yoloy nga but’. Machane, fin ra tamilang ko ngiyal’ ni ke dugliy Got ni nge tamilang riy. Ki ulul fare engel ngay ni gaar: “Daniel, rayog ni ngam man e chiney, ya pi thin ney e ngan tay ndab nnang ma mmith nge yan i mada’ ko tungun.” Ere, mini’ e ra nang fan e pi thin ney ni ke yog Got? “Girdi’ nib kireb e bay dab ra nanged fan, . . . ma piin ni yad ba gonop e bay ra nanged fan.” (Daniel 12:4, NW, 8-10) Ere, bay boch e thin nu Bible nder ma tamilangnag Got fan nge yan i mada’ ko ngiyal’ ni ke dugliy ni nge tamilang riy.

Ere gur, bay boch ban’en ni ke oloboch e Pi Mich Rok Jehovah riy kafram ni bochan e re n’ey, fa? Arrogon. Machane, nap’an ni taw ko ngiyal’ ni ke dugliy Got ni nge tamilang e pi n’em, ma aram me m’agan’ e Pi Mich ngay ni ngar thilyeged rogon ni ke tamilang boch ban’en u wan’rad ya nge puluw nga rogon nib m’agan’ Got ngay. Ere, ba mich u wan’rad ni yad ma folwok rok pi gachalpen Kristus nra sobut’naged lanin’rad me m’agan’rad ngay ni ngar thilyeged e lem rorad u murung’agen boch ban’en u nap’an ni i yal’uwegrad Jesus.​—Acts 1:6, 7.

N’en ni yog fachi buliyel u murung’agen e gin ni ma yib e manileng riy e rayog ni nga nog ni bochi oloboch nde ga’. Machane, n’en ni be yog e Bible e rib ga’ fan ngom. Rib ga’ fan e thin nu Bible ma de fel’ ni nga i beeg be’ ni yigoo ir me guy rogon ni nge nang fan ni yigoo ir rok. Ere, mu ning e ayuw ya nge yag nim nang fan e n’en ni ga be beeg. Mu gay e piin ni yad ma fil e Bible u fithik’ e sobut’an’, ma yad ma taga’ nga gelngin Got nib thothup ni nge ayuwegrad ni ngar nanged fan, ma kub mich u wan’rad ni gad be par ko ngiyal’ ni baadag Got ni ngari tamilang u wan’dad fan e thin nu Bible. Ere, dab mu magagawon ni ngam non ngak e Pi Mich Rok Jehovah ara mu beeg boch ban’en ni kar fal’eged i gay murung’agen kar ted ko fare website ni jw.org. Ke micheg e Bible ni gaar: “Mu ning e llowan’ . . . , ma ra fel’ rogon ni ngam nang murung’agen Got.”​—Proverbs 2:3-5, BT.