“RAYOG ni nge yan e bus, machane re pagel nu China ney e nge par u roy!” Ireray e n’en ni rung’ag Alexandra u nap’an ni bay u lan reb e bus ni keb i tal ko mathil u reb e binaw u South America ni be son ni nge yan nga yugu reb e binaw. Ere, nap’an ni og nga but’ ni nge guy ko mang e be buch, ma aram me guy ba pagel nu China ni be guy rogon ni nge weliy salpen ngak reb e matanag ni bay u rom ko mathil, machane gathi ri manang e thin ni Spanish. Cha’nem i Alexandra e ma un nga reb e ulung ko Pi Mich Rok Jehovah ni yima non riy ni thin ni Chinese. Ere, yan i yog ngak fare matanag nrayog ni nge pilyeg e thin rorow fare pagel nu China.

I yog fare pagel ni ir be’ ni ma par u rom, machane kan iring tafen e salpiy rok ni bay e salpiy riy nge boch e babyor rok. Som’on e lemnag fare matanag ni be ban e re pagel nem, miki lemnag ni Alexandra e ir bagayad e piin ni yad ma chuw’iy e girdi’ u boch e binaw ni ngar feked nga bang ngaur pied yad ni chuway’. Machane tomur riy, me mich u wan’ fare matanag e n’en ni be yog fare pagel. Yugu aram rogon mi nog ko re pagel nem ni bay urngin e salpiy ni nge pi’ ni bochan e be milekag ndariy babyoren. Ere, pi’ Alexandra 20 e dolla ngak e re pagel nem ni bochan e dariy e salpiy rok. Ri pining e re pagel nem e magar ngak e re ppin ney me yog nra sulweg lon fare reliw’ i dolla ni ke pi’ ngak ni ka boor nga urngin ni ke pi’ ngak ko som’on. I weliy Alexandra ngak nder lemnag ni ngan sulweg e re salpiy rok nem; kemus nib felfelan’ ngay ni ke yag ni nge pi’ e ayuw ni bochan e manang ni aram e n’en nib fel’ ni nge rin’. Ere, pi’ boch e babyor ngak fare pagel nib puluw e thin riy ko Bible, me pi’ e athamgil nga laniyan’ ni nge un ngak e Pi Mich ko fol Bible.

Ri gad ma felfelan’ u nap’an ni gad ra rung’ag murung’agen boch e girdi’ ni kar rin’ed boch ban’en ni fan ngak boch e girdi’ ndar nanged owcherad. Ku dariy e maruwar riy ni bay boch e girdi’ u yugu boch e teliw ara boch e girdi’ ndarur uned nga barba’ e teliw ni yad ma rin’ boch ban’en ni aray rogon. Machane faanra gur, ma ra m’agan’um ngay ni ngam pag fam ngam rin’ ban’en ni aray rogon ni fan ngak be’, fa? Rib ga’ fan e re deer ney, ya yog Jesus ni gaar: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Kub puluw e re n’ey ko n’en ni ma yog e piin llowan’ ni bochan e boor e piin ni yad ma gay murung’agen boch ban’en ni ka rogned ni faanra gur be’ ni gab gol, ma ra yib angin ngom. Ngad weliyed boch e kanawo’ nib puluw e re thin ney riy.

Boor ban’en ni ke buch ni be dag ni rogon ni gad ma pi’ ban’en e ba peth nga rogon e felfelan’ ni gad ma tay. I yoloy apostal Paul ni “Got e ba t’uf rok e en ni ma pi’ ban’en u fithik’ e felfelan’.” Be weliy Paul u roy murung’agen e pi Kristiano ni ur pied boch ban’en ni ayuw ni fan ngak e piin taareb e michan’ rorad ni kar gafgowgad. (2 Korinth 8:4; 9:7) Gathi be yog Paul ni i gol e pi walag nem ngak yugu boch e girdi’ ni bochan e yad ba felfelan’. Ya bin riyul’ riy e, yad ba felfelan’ ni bochan e be yag ni ngar ayuweged yugu boch e girdi’.

Bay boch e girdi’ ni yad ma fal’eg i gay murung’agen e re n’ey ni ka rogned nnap’an ni ga ra pi’ ban’en ngak be’, “ma aram me tabab e gin baaram ko man’ey rom ni bay rogon ko felfelan’ ni ga ma tay, nge rogon ni ga ma ngongol ngak yugu boch e girdi’, nge rogon ni ma pagan’um ko girdi’ ni nge maruwel. Ma aram e n’en nra k’aringem ni ngam ‘felfelan’’ u nap’an ni kam pi’ ban’en ngak be’.” Ku bay boch e girdi’ ni kar fal’eged i gay murung’agen e re n’ey  ni ka rogned “nib gel e felfelan’ ni ke tay boch e girdi’ u tomuren ni kar pied e salpiy ngak be’ ko felfelan’ ni kar ted u nap’an ni kar fanayed fapi salpiy nga boch ban’en ni fan ngorad.”

Bay yu ngiyal’ ni ga ma lemnag ndabiyog ni ngam rin’ boch ban’en ni fan ngak be’ ni bochan rarogom, fa? Bin riyul’ riy e, gubin e girdi’ nrayog ni ngar ‘pied ban’en u fithik’ e felfelan’.’ De t’uf ni nge yoor ban’en ni ngam pi’ ngak be’, ya n’en nib ga’ fan e nge puluw fan ni kam pi’ fare n’em ngak facha’. Immoy reb e Pi Mich Rok Jehovah ni yoloy e pi thin ni baaray nge yan ngak e piin ni yad ma ngongliy e re ke babyor ney, ni kub muun buchuuw e salpiy ni ayuw ngay. I yog ni gaar: “Ke yoor e duw ni ke yan ni kemus nri buchuuw e salpiy ni ayuw e rayog ni nggu pi’ u Tagil’ e Liyor rodad.” Miki ulul ngay ni gaar: “Machane, puluwon ni ke sulweg Jehovah Got ngog e kab ga’ ko ayuw ni gu ma pi’. . . . Kammagargad ni kam ayuweged gag ke yag ni nggu pi’ e re tow’ath ney, ya ri ma fal’eg lanin’ug.”

Machane, gathi kemus ni yigoo salpiy e ir e rayog ni ngaum pi’. Ku boor e kanawo’ nrayog ni ngam pi’ boch ban’en riy.

Be gaar e Bible: “Ba fel’ ngom ni ga ra gol. Ma faanra damur runguy be’, ma kemus ni gur e ngam gafgownigem.” (Proverbs 11:17, BT) Girdi’ nib gol e yad baadag ni yad ma pi’ ban’en, ma kub m’agan’rad ngay ni ngar pied e tayim rorad, nge gelngirad, mar daged ngak yugu boch e girdi’ ni yad be lemnagrad, nge ku boch ban’en. Re n’ey e boor angin ni ma yib ngorad, machane reb riy e ra yib angin nga fithik’ i dowrad.

Kan pirieg ni piin ni yad ma ognaged yad ni ngar ayuweged yugu boch e girdi’ e gathi ri ma amith fithik’ i dowrad mab war e kireban’ ni ma yib ngorad. Ba ga’ ni girdi’ ni aram rogon e ba fel’ fithik’ i dowrad. Girdi’ ni bay fa gal miti m’ar rorad ni ka nog e multiple sclerosis ngay nge HIV e kan pirieg ni bay boch i yad ni ke war e m’ar rorad ni bochan e yad ma gol ko girdi’. Kun pirieg ni piin ni immoy e magawon rorad ko chingaw kafram e ke yag ni nge war e kireban’ ni ma yib ngorad ni bochan e ayuw ni yad ma pi’ ngak yugu boch e girdi’, maku reb e ki ayuwegrad e re n’ey ni nge dab kur sulod ko chingaw bayay.

Ka nog ni fan ni ma buch e re n’ey e bochan ni “runguy, nge sumunguy, nge gol e ma ayuweg e girdi’ ni nge dab kur lemnaged boch ban’en nib kireb.” Maku reb e, faanra un pi’ ban’en ma rayog ni nge ayuweg be’ ni nge war e mochuch rok me ayuweg ni nge par gelngin e racha’ rok nib fel’. Maku reb e, piin ni ke yim’ e en mabgol rorad e faanra ur ayuweged yugu boch e girdi’ ma ra papey ni nge war e kireban’ rorad.

Ere, dariy e maruwar riy ni faanra um gol ko girdi’ mab ga’ angin nra yib ngom.

I pi’ Jesus e athamgil nga laniyan’ pi gachalpen ni gaar: “Mu golgad ngak e girdi’ me gol Got ngomed: nra pi’ ngomed nge yan i mus nga rogon e fol riy u wan’, nra map’ nga pa’med ni pire’​—nge sugsug pa’med riy. Ya re fol ni ga ra pi’ ngak be’ e ereram e re fol nra pi’ Got ngom.” (Luke 6:38) Faanra um gol ko girdi’, ma aram e ra pining e girdi’ e magar ngom miki k’aringrad e re n’ey ni ngkur golgad ngak yugu boch e girdi’. Re n’ey e ra k’aring e girdi’ ni ngar adaged ni ngar pied e ayuw miki fel’ thilrad yugu boch e girdi’.

Piin ni yad ma fil murung’agen rogon e ngongol ni ma dag e girdi’ ngak yugu boch e girdi’ e kar pirieged ni “piin ni yugu yad ma gol ko girdi’ e yad ma pi’ e athamgil nga laniyan’ yugu boch e girdi’ ni ngar folwokgad rorad.” Bin riyul’ riy e, “faanra beeg boch e girdi’ murung’agen boch ban’en nib fel’ ni ke rin’ be’ ngak be’ ma ra k’aringrad e re n’ey ni ngar adaged ni ngar golgad ngak yugu boch e girdi’.” Ku bay boch e girdi’ ni yad ma fil murung’agen boch ban’en ni kar pirieged nnap’an “nra gol taabe’ ngak be’ ma  rayog ni nge k’aring boor e girdi’ ara bokum miriay e girdi’ ni ngkur golgad ngak yugu boch e girdi’, ma bay boch e pi girdi’ ney nra yib angin e re n’ey ngorad nde nangrad facha’ ara dawori mada’nagrad biid.” Bin riyul’ riy e, taabe’ nra gol ngak be’ me k’aring boor e girdi’ ni ngkur golgad ngak yugu boch e girdi’ u toobrad. Ere, gathi ga ra adag ni ngam par u bang ni aram rogon? Arrogon, faanra gubin e girdi’ ni ur golgad mab ga’ angin nra yib riy.

Bay reb e ban’en ni buch u Florida u Meriken ni be micheg nriyul’ e re n’ey. Immoy boch e Pi Mich Rok Jehovah nra ognaged yad ni ngar pied e ayuw ngak boch i walagrad u tomuren reb e yoko’ nib gel ni aw e ngaram. Ere, nap’an ni yad bay u reb e naun ni yad be son ni nge taw mam’en e re naun nem ni ngar ngongliyed bayay, ma aram mar guyed e yoror ko buguli yoror rok faen ni ma par ko re naun nem ni ke kireb, ma aram ma rogned ngak nrayog ni ngar ngongliyed. Tomuren e re n’ey, ma aram me yol e re pumoon nem ko tochuch rok e Pi Mich Rok Jehovah ni gaar, “Dabi m’ay u wan’ug e n’en ni ke rin’ e pi cha’ney ni fan ngog. Dawor gu mada’nag boch e girdi’ ni yad ba gol ni bod rogon e pi girdi’ ney.” I yog ni maruwel ni be rin’ e Pi Mich e ba maruwel nib pag feni fel’. Ere, pi’ boch e salpiy ni ayuw ni ngar fanayed ko maruwel ni yad ma rin’.

Bay ban’en ni yira ngat ngay ni ke pirieg e piin llowan’ u nap’an ni yad be gay murung’agen boch ban’en. Kar pirieged ni “bay ban’en ni ir e ma k’aring e girdi’ ni ngar ayuweged yugu boch e girdi’.” Ka rogned ni lungurad, “Mus ko piin bitir nra dawor ra nanged e thin ma yad manang rogon ni ngaur golgad.” Mang fan? Ke pi’ e Bible e fulweg riy, ya be yog ni kan sunmiy e girdi’ ni yad “bod yaan Got.” Re n’ey e be yip’ fan ni bay pi fel’ngin Got rorad.​—Genesis 1:27.

Reb i fel’ngin Jehovah Got ni ir e En ni Ke Sunmiydad nrib manigil e aram e gol. Ke pi’ e yafos nge gubin ban’en nib t’uf rodad ya nge yag nda felfelan’gad. (Acts 14:17; 17:26-28) Rayog ni ngad nanged murung’agen e Chitamangidad ni bay u tharmiy nge n’en nib m’agan’ ngay ni fan ngodad ni aram e ngad filed e Thin rok ni aram e Bible. Ku be tamilangnag e re ke babyor ney ni bay boch ban’en ni ke ngongliy Got rogon ni fan ngodad boch nga m’on. * (1 John 4:9, 10) Bochan ni Jehovah Got e ir e ke yib e biney e fel’ngin rok ma kun sunmiyem ni ga bod yaan, ma aram fan ndariy e maruwar riy ni faan ga ra folwok rok ngaum gol ko girdi’, ma ra yib angin ngom ma ka ga ra fel’ u wan’.​—Hebrews 13:16.

Ka ga manang Alexandra ni faan kad weliyed murung’agen u tabolngin e re article ney? Ere, mang e buch rok? Yugu aram rogon ni yog be’ ko re bus nem ngak ni ke adbey e salpiy rok, machane me weliy fare pagel salpen ngak boch e fager rok ni yad ma par u reb e mach ni yan i tal e re bus nem ngay, ma aram mar sulweged ngak Alexandra fare reliw’ i dolla ni fek fare pagel rok. Ngemu’ miki rin’ fare pagel e n’en ni yog Alexandra ngak, ma aram me tabab i fil e Bible. Dalip e pul nga tomuren ma aram miki mada’ Alexandra nge re pagel nem u nap’an reb e convention ko Pi Mich Rok Jehovah nni tay u Peru ni fan ngak e piin ni yad ma thin ni Chinese. Ere, pining e re pagel nem Alexandra nge piin ni ur milekaggad u taabang ko re convention nem ko restaurant rok ni ngar abichgad u taabang ni bochan e baadag ni nge pining e magar ngak ko n’en ni ke rin’ ni fan ngak.

Faanra ud golgad ma gad be ayuweg yugu boch e girdi’, mab gel e felfelan’ nra yib riy ngodad. Kub gel e felfelan’ ni gad ra tay ni faan gad ra ayuweg e girdi’ ni ngar nanged boch ban’en u murung’agen Jehovah Got ni Ir e Ke Yib urngin mit e tow’ath nrib manigil rok! (James 1:17) Ere, ga be guy ni be yib angin ngom e gol ni ga ma tay ko girdi’, fa?