Sally * ni ma par u Meriken e nap’an ni kireb gubin e chugum rok u tan e yoko’, me yog ni gaar: “Gu lemnag ndabkiyog ni nggu athamgil u fithik’ e magafan’ rog. Boor e rran ni ma chugur ni nge mulan’ug.”

Uw rogon ni faanra ke yim’ be’ nib t’uf rom? Janice ni ma par u Australia e gaar: “Nap’an ni yim’ l’agruw i pumoon ni fakag ma gowa bod ni ke par e yafos rog ni ke masengseng u but’, ma thingar kug guy rogon ni nggu sul nga rogog ko som’on. Ere gu wenig ngak Got ni lungug: ‘Wenig ngom, dabkiyog rog ni nggu athamgil! Mu pageg nggu mol ndab kug od.’”

Ku bay be’ ni ka nog Daniel ngak ni ki kireban’ nib gel u nap’an ni nang nder yul’yul’ e ppin rok ngak. I yog ni gaar: “Nap’an ni yog e ppin rog nder yul’yul’ ngog, ma gowa bod ni kan fek bangi yar kan rogoy nga gum’irchaeg. Gu par u lan in e pul ni kari mooch’och lanin’ug.”

Re ke Wulyang ko Damit ney e be weliy fan ni ka rayog ni nge l’agan’um ko yafos rom ni yugu aram rogon ni

• Ke buch ban’en nib tomgin ni kam gafgow riy

• Ke yim’ be’ nib t’uf rom

• Der yul’yul’ e en mabgol rom

• Keb ba mit e m’ar ngom nib ubchiya’

• Dakir yag ni ngam athamgiliy e tin be buch u lan e yafos rom

Ere som’on e, uw rogon ni ngad athamgilgad u tomuren e yoko’, ara durru’, ara boch ban’en ni ma yib ni yima gafgow riy?