Kad weliyed ko fa binem e article murung’agen e pow ni pi’ Jesus. Re pow ney e be micheg ni ke tabab Gil’ilungun Got ko gagiyeg u tharmiy ni Jesus Kristus e ir e Pilung riy.

Be yog e Bible nnap’an nra tabab Jesus ko gagiyeg, ma n’en nra rin’ nsom’on e nge chuweg Satan nge pi moonyan’ rok u tharmiy. Chiney e kemus ni yigoo fayleng e rayog ni ngaur rin’ed boch ban’en riy. Ireray reb i fan ni kari gel e kireb ni ka nap’an e duw ni 1914.​—Revelation 12:7, 9.

Yugu aram rogon ni be gel e kireb u fayleng i yan, ma bay boch ban’en ni ke rin’ Jesus ni ir e Pilung u Gil’ilungun Got ni fan ko girdi’ u ga’ngin yang e fayleng. Bochan ni yibe fil e Bible ko girdi’ u ga’ngin yang e fayleng, ma aram fan ni boor e girdi’ ni ke yag ni ngar filed boch i kenggin e motochiyel u Bible ma yad be fol riy ni gubin e rran. (Isaiah 2:2-4) Bokum milyon e girdi’ ni kar nanged rogon ni nge fel’ boch e par u lan e tabinaw rorad nge rogon ndab kur paged e maruwel ni yad ma un ngay ni nge yag e salpiy riy nge chugum ni nge par ni aram e n’en th’abi m’on u wan’rad. Pi girdi’ ney e yad be fil rogon ni nge fel’ boch e par rorad e ngiyal’ ney, maku yad be guy rogon ni ngar manged e re miti girdi’ ni baadag Got ni nge par u tan Gil’ilungun.

Yugu aram rogon ni be gagiyeg Jesus u tharmiy e chiney, machane ka be gagiyeg e am ko girdi’ u roy u fayleng. Machane, i yog Got ngak Jesus ni gaar: “Um gagiyegnag e pi toogor rom.” (Psalm 110:2) Dabki n’uw nap’an ma ra gel Jesus ko pi toogor rok, me chuweg e piin nib m’agan’rad ni ngar folgad rok Got u fithik’ e pi magawon rorad.

Ra taw ko ngiyal’ nem ma Gil’ilungun Got e ra

• Chuweg e teliw ni googsur. Pi yurba’ i teliw ni ke yan bokum e chibog ni yad be fil boch ban’en nde riyul’ u murung’agen Got ko girdi’ maku yad be gafgownagrad e goo ra chuw. Ke taarebrogonnag e Bible e pi yurba’ i teliw ni googsur ngak be’ nib pin ni ma chuway’ ngak. Boor e girdi’ ni yad ra gin u nap’an yira thang e pi yurba’ i teliw ni googsur.​—Revelation 17:15, 16.

• Museg e gagiyeg ko girdi’. Ra chuweg Gil’ilungun Got e gagiyeg ni be tay e girdi’.​—Revelation 19:15, 17, 18.

• Chuweg e girdi’ nib kireb. Uw rogon e piin kar dugliyed u wan’rad ni ngaur rin’ed e kireb, ma dubrad ni ngar folgad rok Got? “Got e bayi buk’liy e piin kireb ko fare nam.”​—Proverbs 2:22, BT.

• Chuweg Satan nge pi moonyan’ rok. Dabkiyog ni nge bannag Satan nge pi moonyan’ rok “girdien e pi nam.”​—Revelation 20:3, 10.

Ere mang e ra buch rok e piin yad ra fol u Gil’ilungun Got?

Yugu aram rogon nra par Jesus u tharmiy nge gagiyeg ni ir e Pilung, ma ka boor e tin rayog ni nge rin’ ngak be’ nib girdi’ ni ma gagiyeg. Bay 144,000 e girdi’ ni kan mel’egrad u fayleng ni yad ra un ngak ko gagiyeg. (Revelation 14:1, 3; 20:4, 6) Ra guy rogon ni ngan rin’ e tin nib m’agan’ Got ngay u roy u fayleng. Ere mang e ra rin’ Gil’ilungun Got ni fan ko girdi’ nu fayleng?

• Ra chuweg e m’ar nge yam’. “Dariy be’ ni be par u lan e nam rodad ni bay ki yog nib m’ar,” ma “dab ku unim’.”​—Isaiah 33:24; Revelation 21:4.

• Ra yibnag e bin riyul’ e gapas nge pagan’ ko girdi’. Bayi “pi’ e fel’ rogon nge gapas ngorad” ma “gubin e girdi’ ni bayi be’ me par u fithik’ e gapas u tooben e woldug rok ni grapes nge woldug ni yu ke gek’iy ni fig, ma be par ndakuriy be’ nra k’aring e marus ngak.”​—Isaiah 54:13; Mikah 4:4.

• Ra pi’ e maruwel ni nge rin’ e girdi’ nra yib angin. “Pi n’en ni kar muruwliyed e ri bayi fel’ rogorad riy. Ma maruwel ni bay ur ngongliyed e bay yan i aw nib fel’.”​—Isaiah 65:22, 23.

• Ra chuweg e magawon ko yafang nge boch ban’en ni bay rogon ngay. “Bay i felfelan’ e yungi ted nder tugul ban’en riy, ma floras e bay i puf ko yungi binaw ni i par ni kan n’ag.”​—Isaiah 35:1.

• Ra fil ko girdi’ rogon ni nge yag e yafos ni manemus ngorad. “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.”​—John 17:3.

Baadag Got ni nge yag e pi tow’ath ney ngom. (Isaiah 48:18) Bin migid e article e ra weliy e n’en nib t’uf ni ngam rin’ e chiney ya nge yag e pi tow’ath ney ngom boch nga m’on.