RI GIN Doreen u nap’an nni pirieg ni keb e cancer ko man’ey rok Wesley ni pumoon rok ndab ki gol riy. Pumoon rok e ka fini gaman 54 e duw rok. * I yog e togta ngak ni kemus nri in e pul e ka ra par, ma aram me yim’. I yog Doreen ni gaar: “Ba mo’maw’ ni nge mich u wan’ug e n’en ni gu be rung’ag. Boor e wik ni ug par ni gu be lemnag e re n’em, ya ka rug gin ngay. Rag lemnag ma gowa yugu be’ e ir e be buch e pi n’em rok. Dawor gu fal’eg rogog ni nggu mada’nag reb e magawon ni aram feni ga’.”

Rib gel e kireban’ riy, ya boor e girdi’ ni yad ma lem ni bod rogon Doreen. Demtrug be’ nrayog ni nge yib ba mit e m’ar ngak nra yim’ riy. Yugu aram rogon, ma boor e girdi’ e nap’an nra m’ar be’ nib t’uf rorad ni be n’en ni nge yim’, ma ri yad ma athamgil ni ngar ayuweged facha’ u rogon nrayog rorad. Machane, rib mo’maw’ e re maruwel ney. Ere, uw rogon nrayog ni nge fal’eg chon e tabinaw laniyan’ be’ ni keb ba mit e m’ar ngak ni be n’en ni nge yim’ riy, mu kur ayuweged facha’ ko pi n’en nib t’uf rok? Uw rogon nrayog ni nge athamgil e piin ni yad be ayuweg fare m’ar ko kireban’, ara magafan’, ara marus ni be yib ngorad u nap’an ni yad be ayuweg fare m’ar? Ma mang boch ban’en nra i buch ko fare m’ar u nap’an nra chugur ni nge yim’? Som’on e ngad weliyed fan nib mo’maw’ ni ngan ayuweg be’ e ngiyal’ ney ni keb ba mit e m’ar ngak ni bayi yim’ riy.

Bochan ni ke mon’og rogon e tafalay e ngiyal’ ney, ma aram fan ni ke thil rogon ni ma yim’ e girdi’. Sogonap’an reb e chibog ni ke yan, mab ga’ nder ma n’uw nap’an ni ma par e girdi’ nib fos, ni kub muun ngay e piin ni yad ma par u boch e nam nib fel’ rogon e par ko girdi’ riy. Ba ga’ nib papey ni ma yim’ e girdi’ u boch e m’ar nrayog ni nge af rok be’ ngak be’, ara nap’an ni ke maad’ad be’. Ngiyal’ nem e buchuuw e aspital, ma yooren e girdi’ e nap’an ni yad ra m’ar, mab ga’ ni yad ma par u tabinaw nge ayuwegrad chon e tabinaw rorad nge mada’ ko ngiyal’ ni kar m’ad.

Ngiyal’ ney e ke mon’og e tafalay. Ere, aram fan nrayog ko pi togta ni ngar tafalaynaged e m’ar rok be’ u reb e kanawo’  nrayog ni nge n’uwnag nap’an e yafos rok. Tin baaray e m’ar nrib papey ni ma yim’ e girdi’ riy kafram e rayog ni nge yib ngak be’ e chiney me par u lan boor e duw ni dab kaa yim’. Machane, yugu aram rogon ma bay boch e pi m’ar ney ndabiyog ni nge chuw. Bay boch e girdi’ ni ma yib e m’ar ngorad nib ubchiya’ ndabkiyog ni ngar ayuweged yad. Mab ga’ nib mo’maw’ rogon ni ngan ayuweg e pi girdi’ ney maku boor ban’en nthingar ni rin’ ni fan ngorad.

Bochan e re n’ey, ma aram fan ni ke yoor e girdi’ ni be yim’ u aspital ko girdi’ ni yad be yim’ u taferad. Yooren e girdi’ e ngiyal’ ney e dar nanged e pi n’en ni ma buch rok be’ u m’on ni nge yim’, maku in e girdi’ e kar guyed be’ ni ke yim’. Ere, faanra be rus be’ ni bochan e pi n’en nrayog ni nge buch rok reb i girdien e tabinaw rok ni ke m’ar, ma aram e rayog ni nge mo’maw’ rogon ngak ni nge ayuweg facha’. Ere, mang e rayog ni nge ayuweg e pi girdi’ ney?

Boor e girdi’ ni yad ma gin u nap’an nra yog e togta ni keb ba mit e m’ar ngak be’ nib t’uf rorad nra yim’ riy, ni bod rogon e n’en ni buch rok Doreen. Ere, mang e rayog ni nge ayuwegem ni ngam fal’eg rogom ni fan ko pi n’en nra buch nga m’on ni yugu aram rogon nib gel e magafan’, nge marus, nge kireban’ ni ga be tay? I meybil reb e tapigpig rok Got nib yul’yul’ ngak ni gaar: “Mu fil ngomad feni ngoch nap’an e yafos romad, nge yag ni gu gonopgad.” (Psalm 90:12, BT) Arrogon, mmeybil ngak Jehovah Got ni nge ayuwegem ni ngam nang “feni ngoch nap’an” ni ka bay ni nge par fare m’ar riy, nge rogon ni ngam maruwel ko tayim rom nib fel’ rogon, ya nge yag nim ayuweg facha’ nib t’uf rom ko bin th’abi fel’ e kanawo’ nrayog ni ngam ayuweg riy u m’on ni nge yim’.

Faanra nge yag ni ngan rin’ e re n’ey, ma thingar ni puruy’ u taabang nib fel’ rogon. Faanra ka rayog ni nge non fare m’ar, mab m’agan’ ngay ni ngan puruy’nag e n’en ni ngan rin’ ngak, ma sana ba fel’ ni ngan fith ngak ko mini’ e en nsusun e nge dugliy e n’en ni ngan rin’ ngak ko ngiyal’ ndabkiyog rok ni nge dugliy e n’en ni nge rin’. Faan yira weliy boch ban’en nib fel’ rogon u m’on riy ni bod ni nge dugliy fare m’ar ko baadag ni ngan guy rogon ni ngki pogofan bayay u nap’an ni ke tal e pogofan rok nib tomgin, ara nge par u aspital, ara nge un nga boch e tafalay, ma aram e rayog ni nge ayuweg girdien fare tabinaw ni nge dabi yoor lungurad u boch ban’en, ara k’aringrad ni ngar lemnaged ni bay ban’en ni kar rin’ed nib kireb u nap’an nra t’uf ni ngar dugliyed ban’en nib gur ko ngiyal’ ndabkiyog ko fare m’ar ni nge dugliy e n’en ni ngan rin’ ngak. Faan yira weliy boch ban’en u m’on riy, miki be’ me weliy laniyan’ nib fel’ rogon, ma aram e rayog ni nge ayuweg girdien fare tabinaw ni ngar tedan’rad nga rogon ni ngar ayuweged facha’ u nap’an nib m’ar. Be gaar e Bible: “Faanra dab ni puruy’nag e n’en ni yibe lemnag ni ngan rin’, ma dabi yib angin.”​—Proverbs 15:22, NW.

N’en nib ga’ nib milfan ngak faen ni be pigpig ko fare m’ar e aram e nga i fal’eg laniyan’ fare m’ar. Faanra be n’en ni nge yim’ be’, mab t’uf ni ngaun puguran ngak ni yibe t’ufeg ma dabin digey. Ere, uw rogon nrayog ni ngan rin’ e re n’ey? Rayog ni ngan beeg e babyor ngak ara un tang nga i  rung’ag. Machane, ba fel’ ni ngan mel’eg boch e babyor ara tang nrayog ni nge pi’ e athamgil nga laniyan’, maku ra adag ni nge motoyil ngay. Boor e girdi’ ni ma fel’ lanin’rad u nap’an nra kol reb i girdien e tabinaw rorad pa’rad, ara ur nonad ngorad u fithik’ e sumunguy nib achig lamrad.

Kub fel’ ni nga nog ngak fare m’ar e piin ni yad be yib ni ngar guyed. I yog reb e babyor ni gaar: “Yima yog ni n’en nth’abi tomur ni ma tal ndab ki maruwel u fithik’ fa lal i thamtham ni bay ko girdi’, e rogon ni yad ma rung’ag ban’en. Yugu aram rogon ni yugu be mol fare [m’ar], machane rayog ni ka be rung’ag ban’en nib fel’ rogon. Ere, dab mog ban’en u tooben ni dabum ni nga mog u nap’an ni be od.”

Mmeybilgad u taabang ni faanra rayog. Be yog e Bible ni immoy bayay ni yib e skeng nib gel ngak apostal Paul nge piin ni ur machibgad u taabang, ma aram me par e yafos rorad nga thatharen e riya’. Ere, mang ayuw e ra ninged ni ngan pi’ ngorad? I wenig Paul ngak e pi fager rok ni gaar: “Ku rayog ni ngam ayuweged gamad u daken e meybil ni gimed be tay ni fan ngomad.” (2 Korinth 1:8-11, NW) Ere, rib ga’ angin e meybil ni yira tay ni keb u gum’irchaey ni yugu aram rogon nib gel e mochuch ni yibe tay ara rib gel e ubchiya’ ko fare m’ar.

Ba ga’ nib gel e kireban’ ni gad ma tay u nap’an ni gad ra nang ni bayi yim’ be’ nib t’uf rodad. Gad ma lem ni aram rogon ni bochan e dan sunmiydad ni ngaud m’ad. (Roma 5:12) Aram fan ni be yog e Thin rok Got ni yam’ e aram reb e “toogor.” (1 Korinth 15:26) Ere, ka ban’en ni ma buch ni dubdad ni ngad lemnaged ni bayi yim’ be’ nib t’uf rodad.

Machane, faanra lemnag girdien e tabinaw e pi n’en nrayog ni nge buch ko fare m’ar boch nga m’on, ma rayog ni nge war e marus rorad mar guyed rogon ni ngar ayuweged fare m’ar u reb e kanawo’ nra fal’eg laniyan’ u m’on ni nge yim’. Bay boch ban’en nrayog ni nge buch ni kan weliy ko fare kahol ni kenggin e “ Tin Tomur e Wik ko Yafos Rok Be’.” Riyul’ ni gathi gubin e pi n’ey ni ma buch rok gubin e m’ar, maku gathi gubin ni ma buch nri bod rogon ni kan weliy. Machane, yooren e m’ar e ma buch e pi n’ey rorad.

Tomuren nra yim’ facha’, mab fel’ ni nge non fapi cha’ ni ur ayuweged fare m’ar ngak reb e fager rorad ni ke m’agan’ ngay ni nge pi’ e ayuw. Rayog nib t’uf ni nga nog ngak e piin ni ur ayuweged fare m’ar nge chon e tabinaw rok ni facha’ e ke chuw u fithik’ e gafgow. Ke micheg e En ni Ke Sunmiy e girdi’ ni “piin nib yam’ e dariy ban’en ni yad manang.”​—Eklesiastes 9:5, BT.

Rib ga’ fan ni ngam taga’ ngak Got u nap’an ni ke m’ar reb i girdien e tabinaw rom nrib ubchiya’ ngu nap’an ni ke kireban’um u tomuren ni ke yim’ facha’. Rayog ni nge ayuwegem Got u daken e thin nge ayuw ni ma pi’ boch e girdi’ ngom. I yog Doreen ni gaar: “Gu nang nthingar dab gu siyeg e ayuw ni ke ognag be’ ngomow. Bin riyul’ riy e, ri boor e girdi’ nra pied e ayuw ngomow. Ere, gu nangew e pumoon rog ni pi ayuw nem ni un pi’ ngomow e aram kanawoen ni be gaar Jehovah ngomow, ‘Gu bay romew ni nggu ayuwegmew u fithik’ e magawon ni keb ngomew.’ Dab gu pagtalin e re n’em.”

Arrogon, Jehovah Got e aram e En th’abi ga’ e Ayuw ni ma pi’ ngodad. Manang rogon e amith nge kireban’ ni gad ma tay ni bochan e Ir e Ke Sunmiydad. Rayog rok ma kub m’agan’ ngay ni nge ayuwegdad ko n’en nib t’uf rodad me pi’ e athamgil nga lanin’dad, ya nge yag nda athamgilgad u fithik’ e magawon ni keb ngodad. Ma bin th’abi fel’ riy e, ke micheg ngodad ndab ki n’uw nap’an ma ra chuweg e yam’ ndariy n’umngin nap’an me faseg bokum bilyon e girdi’ ni kar m’ad ndawori pagtilrad. (John 5:28, 29; Revelation 21:3, 4) Ra taw ko ngiyal’ nem, ma gubin e girdi’ nrayog ni ngar sulod u daken fapi thin ni yog apostal Paul ni faani gaar: “Yam’, ba uw e gel ni kam tay? Yam’, ke yan gelngim ngan ni ga ma amithnigey ngay?”​—1 Korinth 15:55.