Jeremáyà 31:1-40
31 “Ní àkókò yẹn,” ni Jèhófà wí, “màá di Ọlọ́run gbogbo ìdílé Ísírẹ́lì, wọ́n á sì di èèyàn mi.”+
2 Ohun tí Jèhófà sọ nìyí:
“Àwọn tó bọ́ lọ́wọ́ idà rí ojú rere ní aginjùNígbà tí Ísírẹ́lì ń rìn lọ sí ibi ìsinmi rẹ̀.”
3 Jèhófà ti fara hàn mí láti ọ̀nà jíjìn, ó sì sọ pé:
“Ìfẹ́ tí mo ní sí ọ jẹ́ ìfẹ́ ayérayé.
Ìdí nìyẹn tí mo fi fà ọ́ mọ́ra pẹ̀lú ìfẹ́ tí kì í yẹ̀.*+
4 Síbẹ̀ náà, màá tún ọ kọ́ bí ilé, wàá sì dà bí ilé tí a tún kọ́.+
Ìwọ wúńdíá Ísírẹ́lì, wàá tún pa dà mú ìlù tanboríìnì rẹWàá sì máa jó lọ tayọ̀tayọ̀.*+
5 Wàá tún pa dà gbin àwọn ọgbà àjàrà sórí àwọn òkè Samáríà;+Àwọn tó gbìn wọ́n á sì gbádùn èso wọn.+
6 Nítorí ọjọ́ ń bọ̀, nígbà tí àwọn olùṣọ́ tó wà lórí àwọn òkè Éfúrémù máa ké jáde pé:
‘Ẹ dìde, ẹ jẹ́ ká lọ sí Síónì, sọ́dọ̀ Jèhófà Ọlọ́run wa.’”+
7 Nítorí ohun tí Jèhófà sọ nìyí:
“Ẹ fi ìdùnnú kọrin sí Jékọ́bù.
Ẹ sì kígbe ayọ̀ nítorí ẹ ti ga ju àwọn orílẹ̀-èdè lọ.+
Ẹ kéde rẹ̀; ẹ yin Ọlọ́run, kí ẹ sì sọ pé,‘Jèhófà, gba àwọn èèyàn rẹ là, àwọn tó ṣẹ́ kù ní Ísírẹ́lì.’+
8 Màá mú wọn pa dà wá láti ilẹ̀ àríwá.+
Màá sì kó wọn jọ láti ibi tó jìnnà jù lọ láyé.+
Àwọn afọ́jú àti àwọn arọ máa wà lára wọn,+Aboyún àti ẹni tó ń rọbí, gbogbo wọn pa pọ̀.
Bí ìjọ ńlá ni wọ́n máa pa dà sí ibí yìí.+
9 Wọ́n á wá pẹ̀lú ẹkún.+
Màá máa darí wọn bí wọ́n ṣe ń wá ojú rere.
Màá ṣamọ̀nà wọn lọ sí ìṣàn* omi,+Lórí ọ̀nà tó tẹ́jú tí wọn ò ti ní kọsẹ̀.
Nítorí èmi ni Bàbá Ísírẹ́lì, Éfúrémù sì ni àkọ́bí mi.”+
10 Ẹ gbọ́ ọ̀rọ̀ Jèhófà, ẹ̀yin orílẹ̀-èdè,Ẹ sì kéde rẹ̀ láàárín àwọn erékùṣù tó jìnnà réré pé:+
“Ẹni tó tú Ísírẹ́lì ká máa kó o jọ.
Á máa bójú tó o bí olùṣọ́ àgùntàn ṣe ń bójú tó agbo ẹran rẹ̀.+
11 Nítorí Jèhófà máa ra Jékọ́bù pa dà+Á sì gbà á* lọ́wọ́ ẹni tó lágbára jù ú lọ.+
12 Wọ́n á wá, wọ́n á sì kígbe ayọ̀ ní ibi gíga Síónì+Inú wọn á dùn nítorí oore* Jèhófà,Nítorí ọkà àti wáìnì tuntun+ pẹ̀lú òróró,Nítorí àwọn ọmọ inú agbo ẹran àti ọ̀wọ́ ẹran.+
Wọ́n* á dà bí ọgbà tí a bomi rin dáadáa,+Wọn kò sì ní ráágó mọ́.”+
13 “Ní àkókò yẹn, wúńdíá á máa jó ijó ayọ̀,Àwọn ọ̀dọ́kùnrin àti àwọn àgbà ọkùnrin á máa jó pa pọ̀.+
Màá sọ ọ̀fọ̀ wọn di ìdùnnú.+
Màá tù wọ́n nínú, màá sì fún wọn ní ayọ̀ dípò ẹ̀dùn ọkàn tí wọ́n ní.+
14 Màá fi ọ̀pọ̀ nǹkan* tẹ́ àwọn àlùfáà* lọ́rùn,Oore mi á sì tẹ́ àwọn èèyàn mi lọ́rùn,”+ ni Jèhófà wí.
15 “Ohun tí Jèhófà sọ nìyí:
‘A gbọ́ ohùn kan ní Rámà,+ ìdárò àti ẹkún kíkorò:
Réṣẹ́lì ń sunkún nítorí àwọn ọmọkùnrin* rẹ̀.+
Wọ́n tù ú nínú nítorí àwọn ọmọ rẹ̀, àmọ́ kò gbà,Torí pé wọn kò sí mọ́.’”+
16 Ohun tí Jèhófà sọ nìyí:
“‘Má sunkún mọ́, má sì da omi lójú mọ́,Nítorí èrè wà fún iṣẹ́ rẹ,’ ni Jèhófà wí.
‘Wọ́n á pa dà láti ilẹ̀ ọ̀tá.’+
17 ‘Ìrètí wà fún ọ ní ọjọ́ ọ̀la,’+ ni Jèhófà wí.
‘Àwọn ọmọ rẹ á sì pa dà sí ilẹ̀ wọn.’”+
18 “Mo ti gbọ́ tí Éfúrémù ń kérora,‘O ti tọ́ mi sọ́nà, mo sì ti gba ìtọ́sọ́nà,Bí ọmọ màlúù tí a kò fi iṣẹ́ kọ́.
Mú mi pa dà, màá sì ṣe tán láti yí pa dà,Nítorí ìwọ ni Jèhófà Ọlọ́run mi.
19 Torí pé lẹ́yìn tí mo pa dà, mo kẹ́dùn;+Lẹ́yìn tí wọ́n ti fi yé mi, mo gbá itan mi tẹ̀dùntẹ̀dùn.
Ojú tì mí, ẹ̀tẹ́ sì bá mi,+Nítorí mo ti ru ẹ̀gàn ìgbà èwe mi.’”
20 “Ǹjẹ́ Éfúrémù kì í ṣe ọmọ mi àtàtà, ọmọ tí mo nífẹ̀ẹ́?+
Torí bí mo ṣe ń sọ̀rọ̀ sí i tó, síbẹ̀ mo ṣì ń rántí rẹ̀.
Ìdí nìyẹn tí ọkàn* mi fi gbé sókè nítorí rẹ̀.+
Ó sì dájú pé màá ṣàánú rẹ̀,” ni Jèhófà wí.+
21 “Ri àwọn àmì ojú ọ̀nà mọ́lẹ̀ fún ará rẹ,Ri àwọn òpó àmì mọ́lẹ̀.+
Fiyè sí òpópónà, ọ̀nà tí o máa gbà.+
Pa dà, ìwọ wúńdíá Ísírẹ́lì, pa dà wá sí àwọn ìlú rẹ.
22 Ìgbà wo lo máa ṣiyèméjì dà, ìwọ aláìṣòótọ́ ọmọbìnrin?
Nítorí Jèhófà ti dá ohun tuntun kan sí ayé:
Obìnrin kan á máa fìtara lé ọkùnrin kan kiri.”
23 Ohun tí Jèhófà Ọlọ́run àwọn ọmọ ogun, Ọlọ́run Ísírẹ́lì sọ nìyí: “Wọ́n á tún ọ̀rọ̀ yìí sọ ní ilẹ̀ Júdà àti ní àwọn ìlú rẹ̀, nígbà tí mo bá kó àwọn èèyàn rẹ̀ tó wà lóko ẹrú pa dà: ‘Kí Jèhófà bù kún ọ, ìwọ ibùgbé òdodo,+ ìwọ òkè mímọ́.’+
24 Inú rẹ̀ ni Júdà àti gbogbo àwọn ìlú rẹ̀ á jọ máa gbé, àwọn àgbẹ̀ àti àwọn tó ń da agbo ẹran.+
25 Nítorí ẹni* tí àárẹ̀ mú ni màá tẹ́ lọ́rùn, màá sì pèsè fún gbogbo ẹni* tó jẹ́ aláìní.”+
26 Bí mo ṣe gbọ́ èyí ni mo jí, mo la ojú mi, oorun mi sì dùn mọ́ mi.
27 “Wò ó! Ọjọ́ ń bọ̀,” ni Jèhófà wí, “tí màá sọ àtọmọdọ́mọ* ilé Ísírẹ́lì àti ilé Júdà di púpọ̀, tí màá sì sọ àwọn ẹran agbéléjẹ̀ wọn di púpọ̀.”+
28 “Bí mo ṣe kíyè sí wọn láti fà wọ́n tu, láti ya wọ́n lulẹ̀, láti fà wọ́n ya, láti pa wọ́n run àti láti ṣe wọ́n léṣe,+ bẹ́ẹ̀ ni màá kíyè sí wọn láti kọ́ wọn bí ilé àti láti gbìn wọ́n,”+ ni Jèhófà wí.
29 “Ní àkókò yẹn, wọn kò tún ní sọ pé, ‘Àwọn baba jẹ èso àjàrà kíkan, ṣùgbọ́n àwọn ọmọ ni eyín kan.’*+
30 Àmọ́ nígbà náà, kálukú máa kú nítorí ẹ̀ṣẹ̀ rẹ̀. Ẹni tó bá sì jẹ èso àjàrà kíkan ni eyín máa kan.”
31 “Wò ó! Ọjọ́ ń bọ̀,” ni Jèhófà wí, “tí màá bá ilé Ísírẹ́lì àti ilé Júdà dá májẹ̀mú tuntun.+
32 Kò ní dà bíi májẹ̀mú tí mo bá àwọn baba ńlá wọn dá ní ọjọ́ tí mo dì wọ́n lọ́wọ́ mú láti mú wọn kúrò ní ilẹ̀ Íjíbítì,+ ‘májẹ̀mú mi tí wọ́n dà,+ bó tilẹ̀ jẹ́ pé èmi ni ọ̀gá wọn tòótọ́,’* ni Jèhófà wí.”
33 “Nítorí májẹ̀mú tí màá bá ilé Ísírẹ́lì dá lẹ́yìn ìgbà yẹn nìyí,” ni Jèhófà wí. “Màá fi òfin mi sínú wọn,+ inú ọkàn wọn sì ni màá kọ ọ́ sí.+ Màá di Ọlọ́run wọn, wọ́n á sì di èèyàn mi.”+
34 “Kálukú wọn kò tún ní máa kọ́ ẹnì kejì rẹ̀ àti arákùnrin rẹ̀ mọ́ pé, ‘Ẹ mọ Jèhófà!’+ nítorí gbogbo wọn á mọ̀ mí, látorí ẹni tó kéré jù lọ dórí ẹni tó tóbi jù lọ láàárín wọn,”+ ni Jèhófà wí. “Nítorí màá dárí àṣìṣe wọn jì wọ́n, mi ò sì ní rántí ẹ̀ṣẹ̀ wọn mọ́.”+
35 Ohun tí Jèhófà sọ nìyí,Ẹni tó ń mú kí oòrùn máa tan ìmọ́lẹ̀ ní ọ̀sán,Tó sì ṣe òfin* pé kí òṣùpá àti àwọn ìràwọ̀ máa tàn ní òru,Ẹni tó ń ru òkun sókè, tó sì ń mú kí ìgbì rẹ̀ máa pariwo,Ẹni tí orúkọ rẹ̀ ń jẹ́ Jèhófà Ọlọ́run àwọn ọmọ ogun:+
36 “‘Bí àwọn ìlànà yìí bá yí pa dà
Nìkan ni àtọmọdọ́mọ Ísírẹ́lì kò fi ní jẹ́ orílẹ̀-èdè níwájú mi mọ́,’ ni Jèhófà wí.”+
37 Ohun tí Jèhófà sọ nìyí: “‘Àyàfi bí a bá lè díwọ̀n ọ̀run lókè, tí a sì lè wá ìpìlẹ̀ ayé kàn nísàlẹ̀, ni màá tó kọ gbogbo àtọmọdọ́mọ Ísírẹ́lì sílẹ̀ torí àwọn ohun tí wọ́n ti ṣe,’ ni Jèhófà wí.”+
38 “Wò ó! Ọjọ́ ń bọ̀,” ni Jèhófà wí, “nígbà tí wọ́n á kọ́ ìlú+ fún Jèhófà láti Ilé Gogoro Hánánélì+ dé Ẹnubodè Igun.+
39 Okùn ìdíwọ̀n+ máa jáde lọ tààrà sí òkè Gárébù, á sì yíjú sí Góà.
40 Gbogbo àfonífojì* àwọn òkú àti ti eérú* pẹ̀lú gbogbo ilẹ̀ onípele títí dé Àfonífojì Kídírónì,+ títí lọ dé igun Ẹnubodè Ẹṣin,+ lápá ìlà oòrùn, yóò jẹ́ ohun mímọ́ fún Jèhófà.+ A kò ní fà á tu láé, bẹ́ẹ̀ ni a kò ní ya á lulẹ̀.”
Àlàyé Ìsàlẹ̀ Ìwé
^ Tàbí “tí mò ń fi ìfẹ́ tí kì í yẹ̀ hàn sí ọ.”
^ Tàbí “máa jó lọ bí àwọn tó ń jó tẹ̀ríntẹ̀rín.”
^ Tàbí “àfonífojì.”
^ Tàbí “gbà á pa dà.”
^ Tàbí “àwọn ohun rere látọ̀dọ̀.”
^ Tàbí “Ọkàn wọn.”
^ Ní Héb., “sísanra.”
^ Tàbí “ọkàn àwọn àlùfáà.”
^ Tàbí “ọmọ.”
^ Ní Héb., “ìfun.”
^ Tàbí “ọkàn.”
^ Tàbí “ọkàn.”
^ Ní Héb., “èso.”
^ Ní Héb., “eyín wọn kò mú.”
^ Tàbí kó jẹ́, “ọkọ wọn.”
^ Tàbí “pa àṣẹ.”
^ Tàbí “pẹ̀tẹ́lẹ̀.”
^ Tàbí “eérú ọlọ́ràá,” ìyẹn, eérú tí ọ̀rá tí wọ́n fi rúbọ ti rin.
