Bẹ́ẹ̀ ni, torí pé Ọlọ́run fẹ́ kí àwa èèyàn máa pé jọ láti jọ́sìn òun. Bíbélì sọ pé: “Ẹ sì jẹ́ kí a gba ti ara wa rò lẹ́nì kìíní-kejì láti ru ara wa sókè sí ìfẹ́ àti sí àwọn iṣẹ́ àtàtà kí a má máa kọ ìpéjọpọ̀ ara wa sílẹ̀.”​—Hébérù 10:24, 25.

 Jésù jẹ́ ká mọ̀ pé àwọn ọmọlẹ́yìn òun máa jẹ́ àwùjọ kan tá a ṣètò fún ìjọsìn nígbà tó sọ fún wọn pé: “Nípa èyí ni gbogbo ènìyàn yóò fi mọ̀ pé ọmọ ẹ̀yìn mi ni yín, bí ẹ bá ní ìfẹ́ láàárín ara yín.” (Jòhánù 13:35) Ọ̀nà pàtàkì kan tí àwọn ọmọ ẹ̀yìn Kristi gbà ń fi ìfẹ́ yìí hàn ni pé kí wọ́n máa kẹ́gbẹ́ pẹ̀lú àwọn onígbàgbọ́ ẹlẹgbẹ́ wọn. Wọ́n á máa pà dé pọ̀ déédéé gẹ́gẹ́ bí ìjọ láti jọ́sìn pa pọ̀. (1 Kọ́ríńtì 16:19) Gbogbo àwọn ìjọ yìí á para pọ̀ di ẹgbẹ́ ará kárí ayé.​—1 Pétérù 2:17.

Ohun míì tún wà tó ṣe pàtàkì ju kéèyàn kàn máa ṣe ẹ̀sìn kan lọ

 Bó tilẹ̀ jẹ́ pé Bíbélì fi hàn pé ó yẹ kí àwa èèyàn máa jọ́sìn Ọlọ́run pa pọ̀, àmọ́ kò kọ́ wa pé bí ẹnì kan bá sáà ti ń ṣe ẹ̀sìn kan ó ti ń ṣe ohun tó ń mú inú Ọlọ́run dùn nìyẹn. Tá a bá fẹ́ kí inú Ọlọ́run dùn sí wa, ẹ̀sìn tí à ń ṣe gbọ́dọ̀ hàn nínú ìgbésí ayé wa ojoojúmọ́. Bí àpẹẹrẹ, Bíbélì sọ pé: “Ọ̀nà ìjọsìn tí ó mọ́, tí ó sì jẹ́ aláìlẹ́gbin ní ojú ìwòye Ọlọ́run àti Baba wa ni èyí: láti máa bójú tó àwọn ọmọ òrukàn àti àwọn opó nínú ìpọ́njú wọn, àti láti pa ara ẹni mọ́ láìní èérí kúrò nínú ayé.”​—Jákọ́bù 1:27.