1 Timuteu 5:1-25
5 Terembeu kirimbawa ipekadu ixupe kua tuyu, maa rembeu ixupe kuaye rembeuwaa yawe nepaya supe, asui kuaita kurumiwasuita, remunya ainta supe kuaye nemuita yawe.
2 Asui kuaita kunyaita waimiita, remunya ainta supe kuaye nemaya yawe, asui kuaita kunyamukuita, remunya ainta supe kuaye nerendiraita yawe, remanduarisawa purangawaa irumu.
Viuvaita rese
3 Rerespetari puranga kuaita viuvaita pirasuawaita.
4 Maa uriku ramere imembiraita kua viuva, u ximiariruita yuiri, rexari aintauyupiru aintauyumbue aintaumunya puranga aintarukapuraita supe, asui rexari aintawajudari aintapaya, aintamaya yuiri puranga, nyãse suuri Deus umaa yawe.
5 Asui kua viuva supiwa pirasua yepenyu, anyunte umanduari Deus, asui upurandu irumu, muiri ara, pituna yuiri upurandu Deus irumu.
6 Maa kua uyumusuuriwaa aepawate, anyunte umanuwaa ae, upaka ramere ae.
7 Yawe rembeu ainta, tiarama aintaumunya puxi.
8 Awa rame tiwajudari kuaita sumuaraita, aintayuiri kuaita suka puraita, anyunte uyumimi sesewara kua uruyariwaa, puxuwera piri ae isui kua tiwa uruyari.
9 Tereseruka viuva kua tirewaa uriku sesenta akayu, kua tiwa uriku kuera yepenyu imena.
10 Aintaurikute aintaukuawa sesewara umunyawaita purangawaita resewara, umukiriariwaa imembiraita puranga, suuriwaa usuanti miraita, umuyasukawaa aintaipi kuaita uruyariwaita, uajudariwaa kuaita upurarawaita, uputariwaa umunya purangawaa yawewarawate.
11 Tereseruka viuvaita kuaita kunyamukuitare, nyãse pitua rame aintaumanduari Kristu rese, anyunte aintaumanduari aintauriku arama aintamena;
12 Asui aintaumunya puxi ainta supe pawate, aintaumutenyuntu resewara kua aintaumbeuwaa aintauyupiru.
13 Nyãse anyunte aintauyupiru tiaintaupuraki ainta, aintauwata uka yaweyawe, maa timaa anyunte yatima ainta, maa aintaumbeu yuiri amuita rese, asui aintaumbeu yuiri nyenga puxuwerawa tiwa puranga yambeu.
14 Sesewara haputari aintauriku aintamena kuaita viuvaita pisasuwaitare aintaumukiriari arama aintamembiraita, aintaumukaturu arama puranga aintarukapuraita, tiarama yaneruanyana umbeu puxi aintarese.
15 Nyãse yepeyepe aintauyusupariana ainta, aintausu Yurupari rakakuera.
16 Yepe uruyariwaa uriku rame yepe iamu viuva, urikute uajudari ae, tiarama iwasu ingreja supe arama ae; ingreja upuderi uajudari kuaita viuvaita pirasuawaita.
Kuaita ansiãoita usaruwaita puranga
17 Rexari aintaurespetari ainta supe kuaita ansiãoita usaruwaita puranga kua ingreja, kuaita upurarawaa sesewara kua nyenga, sesewara yuiri kua umbuesarawaa.
18 Nyãse Deus nyenga umbeu: Terepukuari bui yuru upiru rame inde arama trigu karusu. Aintaumpinima yuiri: Kua upurakiwaa uganyari sikuyara kua upurakiwaa.
19 Tereruyari aintaumbeu rame puxi sese yepe ansião, tirame aintaumbeu sesewara mukuĩ u musapiri.
20 Maa kuaita aintauiku aintapekadu rese, rembeu ainta supe aintapekadu aintausenduwaa upe panye, aintausikie arama yuiri kuaita amuita.
21 Kuiri hambeu inde arama Deus usendu, Jesus Kristu usendu yuiri, aintausendu yuiri kuaita anjuita uparawakawaita; remunya arama ainta supe yepewasu kua hambeuwaa inde arama, tiarama reparawaka remaa amuita supe.
22 Teneranyee rexari neipu amuita rese. Tereajudari ainta aintaumunya aintapuxuwerasawa; remukaturu ikiaimawaa remanduarisawa.
23 Tereu iipawa, maa reu kuaira vinyu nepia resewara, sesewara kua nemãsisawa.
24 Uyukuawana aintapekadu kuaita yepeyepe apigawaita, asui kutara aintaupurara sesewara, maa aintapekadu kuaita amuita uikupuku xinga kuri uyukuawa ae.
25 Yawete yuiri uyukuawa aintaumunyawaita purangawaita, tirame uyukuawa ainta kuiri, timaa kuri aintaupuderi aintauyumimi ainta.
