Luka 1:1-80
1 Nyãse siya uputariwaita umpinima sese kua usasawawaa yanepitera rupi,
2 Kuaye aintaumbeuwaa yawe yande arama kuaita uyupiruwaita umaa ae kuaita yuiri kuaita umbuewaita kua inyenga,
3 Yawete yuiri hamanduari puranga hampinima inde arama inde Teufilu, hamaa rire panye uyupirungawa suiwara.
4 Rekuawa arama supiwa kua yambuewaa inde.
Zakaria
5 Aintaruixawa rame kuerare kua Erudi kuaita Judeyawaraita, ape aikue yepe saserduti sera Zakaria Abia rimiariru ae, asui kua ximiriku sera Izabel Arão rimiariru ae.
6 Asui kuaita mukuĩwaita aintauiku puranga Deus umaa aintauruyari puranga panye yaneruixawa umbeuwaa ae.
7 Tiaintauriku aintaraira nyãse kua Izabel tiupuderi uriku imembira tuyuweana ainta.
Juão Batista rundere
8 Asui upuraki irumu saserduti yawe Deus supe sumuaraita irumu.
9 Yawe aintaumunyawera uxariwaa yawe uwike yaneruixawa ruka upe usapi arama insensu.
10 Asui kuaita miraita siyawaita aintauiku ukara kiti aintaumbeu Deus usapi pukusawa insensu.
11 Asui uri ipiri yepe yaneruixawa anju upuamu insensu uikuwaa rendawa ruaki ikatusawa sui.
12 Asui Zakaria umaa irumu ae nẽ ukuawa maye uiku, asui usikie turusu isui.
13 Maa kua anju umbeu ixupe:
—Teresikie inde Zakaria, nyãse Deus usendu inde arama kua repuranduwaa irumu, asui kua nerimiriku Izabel uriku kuri imembira, asui rexari kuri sera arama Juão.
14 Ape suuri kuri inde turusu, siya yuiri suuri aintapia unaseri resewara umaa kua ara.
15 Asui yaneruixawa umaa kuri aintaara kiti ae tikuri uu vinyu furtiwaa tiyuiri uu kawĩ teresemu kuri ae Espiritu Santu irumu imaya marika upe pukusaware ae.
16 Asuiwana kuri umuyereu siya Israel rimiariruita aintaruixawa Deus supe.
17 Usu kuri senunde kiti iespiritu irumu ukuawasawa irumu yuiri kua Elia umuyereu arama kuri aintapayaita pia aintarairaita supe, umuyereu yuiri kuaita tiwaita uruyari aintausikari arama aintaukuawasawa kuaita purangawaita umukaturu arama yaneruixawa supe imiraita umukaturuwaita.
18 Asui Zakaria upurandu kua anju:
—Mayetaa kuri hapuderi hakuawa supiwa kua rembeuwaa? Nyãse tuyuweana ixe, asui kua serimiriku waimiana ae.
19 Asui kua anju umbeu ixupe:
—Ixete Gabriel, ixete kua upuamuwaa Deus runde kiti, asui umundu ixe hapurungita arama neirumu hambeu arama inde arama kua kuekatu purangawaa.
20 Ape kuiri repita kuri mudu (inyengaimawa) inde, tikuri repuderi repurungita ate usasawa kuri panye kua hambeuwaa nyãse tireruyari senyenga kua usasawawaa kuri sangawa upe.
21 Asui kuaita miraita aintausaru Zakaria aintaumanduari, marantaa uiku uikupuku templu upe.
22 Asui usemu irumu tiana upuderi upurungita ainta supe, asui aintaumanduari umaa yepe manungara templu upe, asui ipu irumu umukame uxari arama aintaukuawa, asui muduwaa upita.
23 Asui umbawa rire upuraki templu upe uyuiri suka kiti.
Suuri kua Izabel
24 Asui yawewaa rire ipuruã kua Izabel asui uyuyumimi miraita sui sinku yasi.
25 Unyee:
—Yawe umunya ixe arama kua seruixawa, pirasuawaa umaa ixe arama, uyuka sesui kua puxuwerawa miraita umaawaa serese.
Anju umbeu Jesus unaseri kuri
26 Asui seis yasi rire Deus umundu kua anju sera Gabriel yepe tetama kiti Galileya upewaa sera Nazare,
27 Ipiri yepe kunya tirewaa usasawa apigawa irumu upuranduwaa ximiriku arama yepe ximiariru kua Davi sera Juze, asui kua kunya sera Maria.
28 Asui kua anju uwike suka upe umbeu ixupe:
—Suuri inde, inde purangawaa, yaneruixawa uiku neirumu.
29 Asui usendu irumu kua nyenga turusu uyumuapatuka asui umanduari mayesawataa kua umukuemawaa.
30 Asui kua anju umbeu ixupe:
—Teresikie Maria nyãse Deus umaa puranga inde arama.
31 Asui reriku kuri nembira inde, asui unaseri nesui yepe kurumi asui rexari kuri sera arama Jesus.
32 Turusu piri kuri aintaara kiti ae, aintauseruka ae taira kua kirimbawa piriwaa panye sui, asui yaneruixawa Deus uxari kuri uwapika itrunu upe kua samunya Davi,
33 Asui aintaruixawa kuri ae yawewarawate kuaita Jaku rimiariruita, asui tikuri mairame upawa aintaruixawa arama ae.
34 Asui Maria umbeu anju supe:
—Maitaa maa panye kua, nyãse tihaiku apigawa irumu.
35 Asui kua anju usuaxara:
—Uwiye kuri nerese kua Espiritu Santu asui ukuawasawa kua kirimbawa piriwaa umusuaki kuri inde, asui kua purangawaa unaseri kuri, aintauseruka kuri Deus raira ae.
36 Nyãse kua neprima Izabel yawete uriku yuiri imembira waimi rameana ae urikuana seis yasi kua aintaumbeuwaa tiwa uriku imembira ae.
37 Nyãse tiyamaa kua tiwa Deus upuderi umunya.
38 Asui Maria umbeu:
—Ikete ixe seruixawa iyara, rexari umunya ixe arama kuaye rembeuwaa yawe. Asui kua anju uyuiriana isui.
Maria usu umaa Izabel ipiri
39 Asui kua Maria uyumukaturu usu arama kutara yepe tetama kiti Judá upewaa iwitera rese.
40 Asui uwike suka kiti kua Zakaria asui umukuema kua Izabel.
41 Asui usendu irumu Maria umukuema ae ukataka imembira imarika upe asui teresemu kua Izabel Espiritu Santu irumu.
42 Asui kirimbawa umbeu:
—Deus uabensuariwaa inde panye aintasui kuaita kunyaita uabensuariwaa yuiri kua unaseriwaa kuri nesui.
43 Ape marantaa uxari uri umaa sepiri imaya kua seruixawa.
44 Nyãse hasendu irumu remukuema ixe suuri ukataka sembira semarika upe.
45 Asui suuri kuri kua kunya uruyariwaa umunya kuri ixupe arama panye kua umbeuwaa ixupe kua yaneruixawa.
Maria umee purangawaa Deus supe
46 Asui kua Maria unyee:
—Sepia upe hamuturusu kua seruixawa.
47 Suuri sepia hamanduari seDeus kua umukaturuwaa ixe.
48 Nyãse umaawana kua kunya ixupe aramawaa aintawira kitiwaa, Kuiri kuri suuri kuri aintaumaa ixe panye kuaita miraita.
49 Nyãse kua kirimbawawaa umunya ixe arama turusu purangawaa.
Purangawaa kua sera
50 Pirasua umaa panye kuaita usikiewaita isui panye kuaita miraita kuiriwaita panye aintarakakuerawaraita yuiri.
51 Kirimbawa upuraki iyuwa irumu umusãi arama kuaita umanduariwaita aintapia upe puranga ainta amuita sui, kuaita umanduariwaita tenyuntu.
52 Umburi ainta aintatrunu sui kuaita kirimbawawaita, asui usupiri kuaita aintawira kitiwaraita.
53 Umuteresemu purangawaa irumu kuaita sasiwaita ixupe yumãsi, asui umundu isui kuaita rikuwaita timaa nungara aintaurasu.
54 Uajudari kua ixupe aramawaa Israel umanduari arama pirasua umaa ae.
55 Yawe umunya Abraão resewara panye ximiariruita resewara yuiri yawewarawate kuaye umbeuwaa yawe yaneramunyaita supe.
56 Asui Maria uiku musapiri yasi irumu kua Izabel, asui uyuiri suka kiti.
Unaseri Juão Batista
57 Asui usikana sangawa kua Izabel asui unaseri isui kua imembira.
58 Asui kuaita uikuwaita sendawa upe panye yuiri kuaita ianamaita aintausendu irumu pirasua yaneruixawa umaa ixupe asui aintauyumusuuri irumu.
59 Asui uitu ara rire aintausu aintausirkunsidari kua kurumi, asui aintauxari putari sera Zakaria ipaya rapixara.
60 Asui imaya umbeu:
—Umbaa, tiyawe, yaxari sera arama Juão.
61 Asui aintaunyee ixupe:
—Tiyamaa peanamaita piterupiwaa serawaa Juão.
62 Asui aintaipu irumu aintaupurandu taina ipaya, maataa uputari aintauxari sera arama.
63 Asui upurandu aintairumu papera umpinima arama, asui umpinima, sera kuri Juão. Asui aintaakayemu panye.
64 Apete uyupirari iyuru uyuyurawa iapeku asui upurungitana umee purangawaa Deus supe.
65 Asui aintausikie panye kuaita sendawa puraita asui sesewara usika aintapiri panye kuaita uikuwaita iwitera rese Judeya upe.
66 Asui panye kuaita usenduwaita sesewara aintaumanduari aintapia upe, aintaunyee:
—Awataa kuri nyã kurumi? Asui Deus ipu uiku irumu puranga.
Zakaria umee purangawaa
67 Asui ipaya Zakaria teresemu ae Espiritu Santu irumu utitika, unyee:
68 —Purangawaa Israelitaita aintaruixawa Deus, nyãse, uri umaa umukaturu arama imiraita,
69 Nyãse usupiriana yande arama yepe umukaturu aramawaa yande kirimbawawaa aintasuiwara kuaita ximiariruita kua Davi Deus supe aramawaa,
70 Kuaye umbeuwaa yawe aintayuru sui kuaita utitikawaita purangawaita,
71 Uyurawa arama yande yaneruanyanaita sui, aintaipu sui yuiri panye kuaita ipiaiwawaita umaa yande arama.
72 Pirasua arama umaa yaneramunyaita supe umanduari arama kua purangawaa umbeuwaa ainta supe,
73 Umanduari arama kua umbeuwaa kirimbawa ixupe kua yaneramunya Abraão.
74 Uyurawa arama yande aintaipu sui kuaita yaneruanyanaita yapuderi arama yamunya ixupe arama benditu tiwa irumu yasikie,
75 Yamunya arama benditu ixupe yamanduarisawa ikiaimawaa irumu, purangawaa yawe umaa yande muiri ara ate yamanu.
76 Asui inde kurumi aintauseruka kuri inde utitikawaa uriwaa isui kua kirimbawa piriwaa, nyãse reyuiri yaneruixawa runde kiti remukaturu arama ixupe sapee,
77 Rexari arama kuri imiraita aintaukuawa arama umukaturu ainta umburi resewara aintasui aintapekadu,
78 Pirasua resewara umaa yande kua yaneDeus, ape uri kuri umaa yanepiri kua umuturiwaa iwate sui,
79 Umuturi arama aintarese kuaita uikuwaita pitunawasuwaa upe aintarese yuiri kuaita uikuwaita manusawa piterupi sasiyarawaa upe, uxari arama yaneipi uwata kua pee purangawaa rupi uxariwaa timaarese yaiku.
80 Asui kua kurumi uyukiriari puranga asui ukuawasawa kirimbawawaa. Asui uiku kampu upe ate usika sangawa uyumuyukuawa Israelitaita supe.
