¡MA’ U NÁAYAL A WÓOLE’EX!

Te’ tu ts’ook 50 añosa’ wíinike’ ta’aytak u xu’ulsik ti’ le ba’alche’obo’ | ¿Ba’ax ku ya’alik le Bibliao’?

PAX ICH

Tu k’iinil 9 ti’ octubre ti’ 2024, le Fondo Mundial para la Naturalezao’ tu ya’ale’ wíinike’ táan u bin u xu’ulsik ti’ u ba’alche’ilo’ob yóok’ol kaab. Le informeo’ tu ya’ale’ «te’ tu ts’ook 50 añosa’ (1979 tak 2020) ts’o’ok u xu’ulsa’al u 73% u ba’alcheilo’ob k’áax». Tu ya’alaj xan: «Le kuxtal way Lu’ume’ ku depender ti’ ba’ax ken u beet wíinik tu yáamil le cinco años ku taalo’oba’».

Ya’ab máako’obe’ ku ja’ak’al u yóolo’ob yo’olal le ba’ax a’ala’aba’. Normal k-u’uyikba beya’ tumen jats’uts k-ilik le ba’alche’obo’ yéetel ku yaatal k-óol k-ilik bix u xu’ulsalti’ob, ts’o’ole’ Diose’ tu beeto’on yéetel u ts’íibolalil k-kanáantik le ba’alche’obo’ (Génesis 1:27, 28; Proverbios 12:10).

Yo’olal le ba’axo’ob ku yúuchla’ ma’ xaane’ ka tuklik: «¿Je’el wa u páajtal k-beetik wa ba’ax utia’al k-salvartik le ba’alche’obo’? ¿Ba’ax ku ya’alik le Bibliao’?».

Junp’éel jats’uts esperanza

Chéen Dios je’el u páajtal u yutskíintik le ba’ax ku yúuchul way yóok’ol kaaba’, le o’olale’ kex je’el ba’axak ka u beet wíinike’ ma’ tu páajtal u salvartik le ba’alche’obo’. Apocalipsis 11:18, ku ya’alike’ Diose’ yaan u «xu’ulsik ti’ le máako’ob táan u k’askúuntiko’ob le lu’umo’». Le tekstoa’ ku ye’esik ka’ap’éel ba’al:

1. Diose’ ma’ ken u cha’a u k’askúunta’al le Lu’uma’.
2. ¿Ba’axten seguro’on de ke Diose’ jach ta’aytak u yutskíintik le ba’ax ku yúuchla’? Tumen wíinike’ jach chich u bin u xu’ulsik ti’ le ba’alche’obo’.

¿Bix ken u yutskíintil Dios le ba’ax ku yúuchla’? Yaan u beetik yéetel u Reino, junp’éel gobierno kun gobernartik tuláakal le Lu’uma’ (Mateo 6:10). Le kéen káajak u gobernar u Reino Dios way Lu’ume’ yaan u ka’ansa’al ti’ wíinik bix ken u kanáantil le ba’alche’obo’ (Isaías 11:9).