1 Samuel 13:1-23
13 Saúleʼ yaan kaʼach...* años tiʼ ka kʼuch u beetuba reyil+ tu kaajil Israel, yéetel dos años xáanchaj táan u beetik u reyil.
2 Saúleʼ tu yéeyaj 3,000 xiiboʼob tiʼ u kaajil Israel, 2,000 tiʼ letiʼobeʼ tiaʼanoʼob kaʼach tu yiknal teʼ lugar ku kʼaabaʼtik Mikmaas yéetel teʼ tu montañailoʼob Beteloʼ, yéetel 1,000 u túulaloʼobeʼ tiaʼanoʼob tu yiknal Jonatán+ tu kaajil Guibea,+ tu luʼumil Benjamín. Le u maasil máakoʼoboʼ tu túuxtoʼob tu yotochoʼob.
3 Jonatán túuneʼ tu ganartaj le u jaats soldadoʼob filisteoʼob+ yanoʼob kaʼach Guebaoʼ,+ le filisteoʼoboʼ kʼuch u yojéeltoʼob le baʼax úuchaʼ. Saúl túuneʼ tu beetaj u yustaʼal le baak+ tiʼ tuláakal u luʼumil Israeloʼ, yéetel tu beetaj ka aʼalaʼak: «¡Hebreoʼex, uʼuyeʼex!».
4 Tuláakal u kaajil Israel túuneʼ tu yuʼuboʼob le mensajeaʼ: «Saúleʼ tsʼoʼok u ganartik junjaats tiʼ le soldadoʼob filisteoʼoboʼ, beora túunaʼ le filisteoʼoboʼ tsʼoʼok u jach pʼektikoʼob u kaajil Israel». Le kaaj túunoʼ tʼaʼan utiaʼal ka xiʼik u muchʼuba yéetel Saúl tu kaajil Guilgal.+
5 Le filisteoʼob túunoʼ tu muchʼubaʼob utiaʼal u baʼateloʼob tu contra Israel, tu taasoʼob 30,000 u carroiloʼob baʼateʼel yéetel 6,000 soldadoʼob u natʼmaj u tsiiminoʼob, yéetel yaʼabkach uláakʼ soldadoʼob jeʼex u yaʼabil le arena yaan tu jáal le kʼáaʼnáaboʼ.+ Letiʼobeʼ seguernaj u naʼakloʼob tak ka pʼáatoʼob jeʼelel teʼ lugar ku kʼaabaʼtik Mikmaasoʼ, tu lakʼinil* Bet-aven.+
6 Le israelitaʼob túunoʼ tu tsʼáajoʼob cuentaeʼ tiaʼanoʼob tiʼ junpʼéel nojoch problema yoʼolal bix u atacartaʼaloʼoboʼ. Le oʼolal bin u taʼakubaʼob tiʼ sajkaboʼob,+ tiʼ jooloʼob, tu yáam nukuch tuunichoʼob, tiʼ áaktunoʼob yéetel tiʼ cisternaʼob.
7 Yaan tiʼ le hebreoʼoboʼ tu kʼáatmáansoʼob le Jordán tak tu luʼumil Gad yéetel Galaadoʼ.+ Chéen baʼaleʼ Saúleʼ láayliʼ tiʼ pʼaatal kaʼach tu luʼumil Guilgaleʼ, tuláakal le máaxoʼob yanoʼob tu yéeteloʼ táan kaʼach u kikilankiloʼob.
8 Letiʼeʼ tu páaʼtaj Samuel durante siete días jeʼex aʼalaʼaniltiʼ* tumen Samueleʼ, chéen baʼaleʼ Samueleʼ maʼ kʼuch Guilgaliʼ, yéetel le kaajoʼ joʼopʼ u lukʼul tu yiknal Saúl.
9 Le ka tsʼoʼokeʼ Saúleʼ tu yaʼalaj: «Taaseʼexten le tóokbil sacrificiooʼ bey xan le u ofrendailoʼob múul janaloʼ». Letiʼ túuneʼ tu kʼubaj le tóokbil sacrificiooʼ.+
10 Jach chéen pʼelak tsʼoʼokik u kʼubik le tóokbil sacrificiooʼ kʼuch Samuel. Saúl túuneʼ jóokʼ u chʼaʼa u beel Samueleʼ ka tu saludartaj.
11 Samuel túuneʼ tu yaʼalajtiʼ: «¿Baʼax le tsʼoʼok a beetik beyaʼ?». Saúleʼ tu núukaj: «Es ke tin wilaj táan u káajal u pʼatken le máakoʼoboʼ,+ yéetel techeʼ maʼ kʼuchech teʼ kʼiin a waʼalmoʼ, tsʼoʼoleʼ le filisteoʼoboʼ táan xan u muchʼkubaʼob Mikmaas.+
12 Le oʼolaleʼ tin tuklaj: ‹Le filisteoʼoboʼ yaan u yéemloʼob baʼateʼel tin contra tu kaajil Guilgal, tsʼoʼoleʼ todavía maʼ in kaxt u yáantaj Jéeobaiʼ›. Le oʼolal tin wuʼuyaj jach kʼaʼabéet in kʼubik le tóokbil sacrificiooʼ».
13 Samuel túuneʼ tu yaʼalaj tiʼ Saúl: «Minaʼan a naʼat yoʼolal le baʼax ta beetaʼ. Maʼ ta beetaj le baʼax tu yaʼalajtech Jéeoba a Diosoʼ.+ Wa ka a beet kaʼacheʼ Jéeobaeʼ yaan u tsʼáaikech a beet a reyil teech bey xan a paalal yóokʼol u kaajil Israel utiaʼal mantatsʼ.
14 Chéen baʼaleʼ beoraaʼ yaan u xuʼulul a beetik a reyil.+ Jéeobaeʼ yaan u kaxtik juntúul xiib jach maʼalob u lúubul tiʼ,+ yéetel Jéeobaeʼ yaan u tsʼáaik utiaʼal ka u nuʼukt u kaajal,+ tumen techeʼ maʼ ta beetaj le baʼax tu yaʼalajtech Jéeobaoʼ».+
15 Samuel túuneʼ lukʼ Guilgaleʼ ka joʼopʼ u bin u naʼakal tak ka kʼuch Guibea, tu luʼumil Benjamín. Saúl túuneʼ tu xokaj le máakoʼoboʼ ka tu yileʼ le máakoʼob pʼáat tu yéeteloʼ yaan kex 600 u túulaloʼob.+
16 Saúl, Jonatán u hijo, yéetel le máakoʼob yanoʼob tu yéeteloʼoboʼ pʼáatoʼob tu kaajil Gueba,+ tu luʼumil Benjamín, yéetel le filisteoʼoboʼ tiaʼanoʼob kaʼach Mikmaaseʼ.+
17 Ichil u ejército le filisteoʼoboʼ ku jóokʼol óoxpʼéel grupo soldadoʼob. Le yáax grupooʼ bin teʼ bej ku bin tak tu kaajil Ofrá, tu luʼumil Sualoʼ.
18 Uláakʼ grupoeʼ bin teʼ bej ku bin tak Bet-orónoʼ,+ yéetel le u yóoxpʼéel grupooʼ bin teʼ bej ku bin tak teʼ frontera desde tuʼux ku páajtal u yilaʼal u táax luʼumil Zeboímoʼ, tu tojil le desiertooʼ.
19 Teʼ kʼiinoʼob jeʼeloʼ tiʼ tuláakal u luʼumil Israeleʼ minaʼan kaʼach mix juntúul herreroiʼ, tumen le filisteoʼoboʼ tu yaʼaloʼob: «Beyoʼ le hebreoʼoboʼ maʼ ken u beetoʼob mix junpʼéel espada yéetel mix junpʼéel lanza».
20 Tuláakal le israelitaʼoboʼ kʼaʼabéet u binoʼob kaʼach tu yiknal le filisteoʼob utiaʼal ka jóoʼsaʼak u yej le nuʼukuloʼob ku meyajtiʼob utiaʼal u péeksikoʼob le luʼumoʼ, u picoʼob, u báatoʼob yéetel u lóobcheʼob.*
21 Óoliʼ ocho gramos* plata ku cobrartaʼal kaʼach utiaʼal u jóoʼsaʼal u yej le nuʼukul ku meyaj utiaʼal u péeksaʼal le luʼumoʼ, le picooʼ, le rastrillo óoxpʼéel u puntaoʼ yéetel le báatoʼ. Letiʼe bukaʼaj ku cobrartaʼal xan utiaʼal u pʼaʼatal fijoil u punta le nuʼukul ku meyaj utiaʼal u loʼomol le baʼalcheʼoboʼ.*
22 Tu kʼiinil le baʼateloʼ mix juntúul tiʼ le máakoʼob láakʼintik Saúl yéetel Jonatán yaan u espadaʼob wa u lanzaʼoboʼ. Chéen Saúl yéetel Jonatán,+ u hijo, yaan kaʼach u armaʼob.
23 Junjaats túun soldadoʼob filisteoʼobeʼ binoʼob tak teʼ nuʼunuʼutʼ bej yaan Mikmaasoʼ.+
Notas
^ Teʼ teksto ich hebreooʼ maʼ chíikaʼan le número jeʼeloʼ.
^ Wa «este».
^ Wa «yéeyaʼanil».
^ Wa «hoz».
^ Ich hebreoeʼ ku yaʼalaʼal kaʼach «junpʼéel pim». Ilawil «Pim», página 2576.
^ Lelaʼ chíikaʼan tiʼ junpʼéel xúul, yéetel ku meyaj kaʼach utiaʼal u loʼomol le baʼalcheʼob utiaʼal u beetaʼal u xíimbaloʼoboʼ.
