1 Samuel 27:1-12
-
Le filisteoʼoboʼ ku tsʼáaikoʼob Ziklag tiʼ David (1-12)
27 Chéen baʼaleʼ Davideʼ tu tuklaj: «Junpʼéel tiʼ le kʼiinoʼobaʼ yaan in kíimsaʼal tumen Saúl. Maas maʼalob ka xiʼiken tu luʼum le filisteoʼoboʼ.+ Beyoʼ Saúleʼ yaan u náakal u yóol u kaxten tiʼ tuláakal u luʼumil Israel,+ teen túuneʼ yaan in púutsʼul tiʼ u kʼab».
2 Davideʼ líikʼ yéetel le 600 xiiboʼob+ láakʼintikoʼ ka bin tak tuʼux yaan Akís,+ u hijo Maok, u reyil Gat.
3 Davideʼ tiʼ pʼáat tu yiknal Akís tu kaajil Gateʼ, tiʼ pʼáat xan le máakoʼob láakʼintikoʼ, cada juntúuleʼ yéetel u familia. Tu yéetel Davideʼ tiaʼan kaʼach tu kaʼatúulil u yatanoʼobiʼ: Ainoam+ le ku taal tu kaajil Jezreeloʼ, yéetel Abigaíl+ le u yatan Nabal kaʼachoʼ, le ku taal tu kaajil Carmelooʼ.
4 Le ka aʼalaʼab tiʼ Saúl tsʼoʼok u bin u taʼakuba David tu kaajil Gateʼ, letiʼeʼ xuʼul u kaxtik.+
5 David túuneʼ tu yaʼalaj tiʼ Akís: «Wa tsʼoʼok in lúubul utsil ta táaneʼ, tsʼáaten tuʼux in kajtal tiʼ junpʼéel tiʼ le chan kaajoʼoboʼ. Tumen teneʼ maʼ unaj in kajtal teʼ kaaj tuʼux kajaʼan le reyoʼ».
6 Akís túuneʼ tu tsʼáaj u kaajil Ziklag+ tiʼ David. Le oʼolal tak bejlaʼeʼ u kaajil Ziklagueʼ u tiaʼal u reyiloʼob Judá.
7 Davideʼ junpʼéel año yéetel cuatro meses+ xáanchaj kajaʼan teʼ luʼum tsʼaʼabtiʼ tumen le filisteoʼoboʼ.
8 Letiʼ yéetel le máakoʼob láakʼintikoʼ ku yookloʼob kaʼach u atacartoʼob u luʼum le guesuritaʼoboʼ,+ u luʼum le guirzitaʼoboʼ yéetel le amalekitaʼoboʼ,+ tumen le máakoʼobaʼ tiʼ kajaʼanoʼob kaʼach desde tu luʼumil Telam tak Sur+ yéetel tak tu luʼumil Egipto.
9 Le kéen u atacart kaʼach David junpʼéel kaajeʼ ku láaj kíimsik le xiiboʼob yéetel le koʼoleloʼoboʼ,+ chéen baʼaleʼ ku chʼaʼik le tamanoʼoboʼ, le wakaxoʼoboʼ, le burroʼoboʼ, le camelloʼoboʼ yéetel le nookʼoʼoboʼ, le kéen tsʼoʼokok túuneʼ ku kaʼa suut tu yiknal Akís.
10 Le kéen kʼáataʼaktiʼ tumen Akís: «¿Tuʼux banda bineʼex atacar bejlaʼeʼ?». Davideʼ ku núukik: «T-atacartaj u noojolil* Judá»+ wa «T-atacartaj u noojolil u luʼum le jerameelitaʼoboʼ»+ wa «T-atacartaj u noojolil u luʼum le kenitaʼoboʼ».+
11 David kaʼacheʼ ku láaj kíimsik le xiiboʼob yéetel le koʼoleloʼoboʼ utiaʼal maʼ u taasik mix juntúul tu kaajil Gatiʼ, tumen ku yaʼalik kaʼachi: «Beyoʼ letiʼobeʼ maʼ ken u takoʼob k-pool, maʼ ken u yaʼaloʼob: ‹Lelaʼ letiʼe baʼax tu beetaj Davidaʼ›». (Davideʼ bey tu beetil tuláakal le tiempo kajlaj tu luʼum le filisteoʼoboʼ).
12 Akíseʼ tu creertaj le baʼax ku yaʼalik Davidoʼ yéetel ku tuklik kaʼachi: «Seguro tsʼoʼok u pʼektaʼal tumen u kajnáaliloʼob Israel, le oʼolal bejlaʼeʼ maʼ kun xuʼulul u meyajtiken».
Notas
^ Wa «Négueb».
