1 Samuel 31:1-13
-
Ku kíimil Saúl yéetel óoxtúul u hijoʼob (1-13)
31 Le filisteoʼoboʼ táan kaʼach u baʼateloʼob tu contra Israel.+ U soldadoiloʼob Israeleʼ púutsʼoʼob tu táan le filisteoʼoboʼ, yaʼab tiʼ letiʼobeʼ kíimsaʼaboʼob teʼ Montaña Guilboaoʼ.+
2 Le filisteoʼoboʼ joʼopʼ u chʼaʼpachtikoʼob Saúl yéetel u hijoʼob, ka túun tu kíimsoʼob Jonatán,+ Abinadab yéetel Malki-suwa, u hijoʼob Saúl.+
3 Saúl túuneʼ joʼopʼ u maas atacartaʼal, le ka ilaʼab tumen le arqueroʼoboʼ chʼiʼin yéetel flechaʼobeʼ ka sen loobiltaʼabi.+
4 Saúl túuneʼ tu yaʼalaj tiʼ le máax kuchik u armaʼoboʼ: «Jóoʼs a espadaeʼ ka a táatsʼlomten, utiaʼal beyoʼ maʼ in maltratartaʼal mix in kíimsaʼal tumen le máakoʼob maʼatech u meyajtikoʼob Diosoʼ».*+ Chéen baʼaleʼ le máax kuchik u armaʼoboʼ maʼ tu yóotaj u beetiʼ tumen jach sajak. Le oʼolaleʼ Saúleʼ tu chʼaʼaj u espadaeʼ ka lúub tu yóokʼol.+
5 Le máax kuchik u armaʼoboʼ le ka tu yilaj tsʼoʼok u kíimil Saúleʼ+ tu chʼaʼaj xan u espadaeʼ ka lúub tu yóokʼol, ka kíimi.
6 Teʼ kʼiin túun jeʼeloʼ, kíim Saúl, óoxtúul u hijoʼob, le máax kuchik u armaʼoboʼ bey xan tuláakal le máaxoʼob meyajtikoʼ.+
7 Le ka tu yilaj le israelitaʼob yanoʼob teʼ táax luʼum bey xan le yanoʼob naatsʼ tiʼ le Jordán tsʼoʼok u púutsʼul u soldadoiloʼob Israel yéetel tsʼoʼok u kíimil Saúl yéetel u hijoʼobeʼ joʼopʼ u jóokʼloʼob tiʼ le kaajoʼob utiaʼal u púutsʼloʼoboʼ.+ Le filisteoʼob túunoʼ taaloʼobeʼ ka pʼáatoʼob kajtaliʼ.
8 Le ka sáaschaj tuláakʼ kʼiineʼ, le ka taal le filisteoʼob u chʼaʼob le baʼaloʼob yaan tiʼ le máakoʼob tu kíimsoʼoboʼ, tu yiloʼobeʼ Saúl yéetel óoxtúul u hijoʼobeʼ tiʼ jáayunjáayoʼob teʼ Montaña Guilboaoʼ.+
9 Letiʼobeʼ tu kúulxotʼtoʼob u pooleʼ, tu luʼsoʼob u armaduraeʼ ka tu túuxtoʼob aʼalbil tiʼ tuláakal le luʼum tuʼux kajaʼan le filisteoʼob le baʼax úuchoʼ,+ utiaʼal ka ojéeltaʼak tu templo u imagenoʼob+ bey xan ichil le kaajoʼ.
10 Le ka tsʼoʼokeʼ tu tsʼáajoʼob u armadura teʼ templo tuʼux yaan u imageniloʼob Astoretoʼ ka tu chʼuykíintoʼob u kimen wíinklil tu pakʼil u kaajil Bet-san.+
11 U kajnáaliloʼob túun Jabés-galaadeʼ+ le ka tu yuʼuboʼob le baʼax beetaʼab tiʼ Saúl tumen le filisteoʼoboʼ,
12 tuláakal le soldadoʼoboʼ líikʼoʼobeʼ, viajarnajoʼob bul áakʼabeʼ ka tu chʼaʼajoʼob u kimen wíinklil Saúl yéetel u hijoʼob teʼ tu pakʼil Bet-sanoʼ. Suunajoʼob tu kaajil Jabéseʼ ka tu tóokoʼob teʼeloʼ.
13 Le ka tsʼoʼokeʼ tu chʼaʼajoʼob u baakeloʼobeʼ+ ka tu mukoʼob yáanal junkúul tamarisco* yaan tu kaajil Jabés,+ ka ayunarnajoʼob durante siete días.
Notas
^ Ich hebreoeʼ ku yaʼalaʼal kaʼach «le máakoʼob maʼ circuncidadoʼoboʼ».
^ Le cheʼaʼ mejentak u leʼob, yéetel u looloʼobeʼ rosadoʼob wa saktak.
