1 Samuel 4:1-22
4 Samueleʼ seguernaj u tʼaan yéetel tuláakal u kaajil Israel.
U kaajil Israeleʼ jóokʼ baʼateʼel tu contra le filisteoʼoboʼ, letiʼobeʼ pʼáatoʼob jeʼelel tu tséel Ebenézer, yéetel le filisteoʼoboʼ pʼáatoʼob jeʼelel tu kaajil Afek.
2 Le filisteoʼob túunoʼ tu tsolubaʼob utiaʼal u baʼateloʼob tu contra Israel. Le israelitaʼob túunoʼ joʼopʼ u bin kʼaasil tiʼob, ka ganartaʼaboʼob. Le filisteoʼoboʼ tu kíimsoʼob kex 4,000 israelitaʼob teʼ tuʼux ku baʼateloʼoboʼ.
3 Le ka suunaj le israelitaʼob teʼ tuʼux jelekbaloʼoboʼ, u nuuktakil u kaajil Israeleʼ tu yaʼaloʼob: «¿Baʼaxten teʼ kʼiinaʼ Jéeobaeʼ tu chaʼaj k-ganartaʼal* tumen le filisteoʼoboʼ?+ Koʼoneʼex chʼaʼik u cajail u pacto Jéeoba yaan Silóoʼ+ ka k-bis t-éetel, utiaʼal ka u salvartoʼon tiʼ u kʼab k-enemigoʼob».
4 Le israelitaʼob túunoʼ tu túuxtoʼob u jaats máakoʼob tu kaajil Siló, letiʼob túuneʼ tu chʼaʼajoʼob u cajail u pacto Jéeoba, le máax gobernartik le ángeloʼoboʼ, le máax ku kutal tu trono yaan tu yóokʼol* le querubínoʼoboʼ.*+ U kaʼatúul paalal Elí, Ofní yéetel Fineáseʼ+ tiaʼanoʼob xan kaʼach teʼ tuʼux yaan u cajail u pacto le u jaajil Diosoʼ.
5 Chéen pʼelak oksaʼabik u cajail u pacto Jéeoba teʼ tuʼux jelekbaloʼoboʼ, tuláakal le israelitaʼoboʼ joʼopʼ u sen kʼaʼam awatoʼob, hasta tu tíituba le luʼumoʼ.
6 Le ka tu yuʼubaj le filisteoʼob u juum u yawat le israelitaʼoboʼ, tu yaʼaloʼob: «¿Baʼaxten táan u yawat le hebreoʼob teʼ tuʼux jelekbaloʼoboʼ?». Le ka tu yojéeltoʼob de ke tsʼoʼok u yoksaʼal u cajail u pacto Jéeoba teʼ tuʼux yaan le israelitaʼoboʼ,
7 le filisteoʼoboʼ sajakchajoʼob, ka tu yaʼaloʼob: «¡Dioseʼ tsʼoʼok u yokol teʼ tuʼux jelekbaloʼoboʼ!».+ Tu yaʼaloʼob xan: «¡Yaan u bintoʼon kʼaasil, tumen mix juntéen úuchuk junpʼéel baʼal beyaʼ!
8 ¡Yaan u bintoʼon kʼaasil! ¿Máax jeʼel u salvarkoʼon tiʼ u kʼab le Dios jach yaan u poderaʼ? Lelaʼ letiʼe Dios tu xuʼulsaj tiʼ u kaajil Egipto yéetel jejeláas castigoʼob teʼ desiertooʼ.+
9 Filisteoʼex, maʼ a chʼaʼikeʼex saajkil, eʼeseʼex de ke xiibeʼex, beyoʼ maʼ ken a meyajteʼex le hebreoʼob jeʼex tsʼoʼok u meyajtikeʼexoʼoboʼ.+ ¡Baʼatelnakeʼex, eʼeseʼex de ke xiibeʼex!».
10 Le filisteoʼob túunoʼ baʼatelnajoʼobeʼ ka tu ganartoʼob le israelitaʼoboʼ,+ le israelitaʼob túunoʼ púutsʼoʼob tak tu yotochoʼob. Jach yaʼab máaxoʼob kíimsaʼabi, tiʼ u soldadoiloʼob Israeleʼ 30,000 u túulal kíimsaʼabi.
11 Tsʼoʼoleʼ chʼaʼab xan u cajail u pacto Dios, kíim xan Ofní yéetel Fineás,+ u kaʼatúul paalal Elí.
12 Teʼ kʼiin jeʼeloʼ, juntúul máak tiʼ u tribu Benjamíneʼ lukʼ teʼ tuʼux táan le baʼateloʼ ka bin áalkabil tak Siló, le ka kʼucheʼ jaʼajaʼat u nookʼ yéetel yaan luʼum tu pool.+
13 Le ka kʼucheʼ, Elíeʼ kulukbal kaʼach tiʼ junpʼéel silla tu jáal le bejoʼ, táan kaʼach u páaʼtik u yilik baʼax kun úuchul, tumen jach chiʼichnak yoʼolal u cajail u pacto le u jaajil Diosoʼ.+ Le máak túunoʼ ook teʼ kaaj utiaʼal u tsʼáaik ojéeltbil le baʼax tsʼoʼok u yúuchloʼ, tuláakal le kaaj túunoʼ joʼopʼ u yawat.
14 Le ka tu yuʼubaj Elí u juum u yawat le kaajoʼ, tu kʼáataj: «¿Baʼaxten táan u yawat le kaajoʼ?». Le máak túunoʼ tu séebaʼanil bineʼ ka tu yaʼalaj tiʼ Elí le baʼax úuchoʼ.
15 (Elí kaʼacheʼ yaan 98 años tiʼ, tsʼoʼok u bin u sáasilil u yich yéetel maʼ tu páajtal u paakat).+
16 Le máak túunoʼ tu yaʼalaj tiʼ Elí: «¡Teen le máax taal desde teʼ tuʼux ku yúuchul le baʼateloʼ! Chéen bejlaʼa púutsʼen teʼ tuʼux táan u yúuchul le baʼateloʼ». Elí túuneʼ tu kʼáatajtiʼ: «¿Baʼax túun úuchi hijo?».
17 Le máak taal u yaʼal baʼax úuchoʼ, tu yaʼalaj: «U kaajil Israeleʼ tsʼoʼok u púutsʼul tiʼ le filisteoʼoboʼ, ganartaʼaboʼob yéetel jach yaʼab le máaxoʼob kíimsaʼaboʼoboʼ.+ Ofní yéetel Fineás, a kaʼatúul paalaleʼ kíimsaʼaboʼob+ xan, tsʼoʼoleʼ chʼaʼab tak u cajail u pacto le u jaajil Diosoʼ».+
18 Jach teʼ súutuk le ka tʼaanaj le máak tiʼ u cajail u pacto le u jaajil Diosoʼ, Elíeʼ jawkʼaj teʼ tuʼux kulukbal tu tséel le joonajoʼ ka káach u kaaleʼ ka kíimi, tumen letiʼ kaʼacheʼ sen aal yéetel tsʼoʼok kaʼach u chʼíijil. Letiʼeʼ 40 años tu juzgartaj u kaajil Israel.
19 U yilib Elí u yatan Fineáseʼ, embarazada kaʼachi yéetel taʼaytak u síijil u chaambal.* Le ka tu yojéeltaj tsʼoʼok u chʼaʼabal u cajail u pacto le u jaajil Dios yéetel tsʼoʼok xan u kíimil u suegro yéetel u yíichameʼ, chinlajeʼ ka káaj u doloreʼ ka síij le chaambaloʼ.
20 Mientras táan u kíimileʼ, le koʼoleloʼob waʼalakbaloʼob tu tséeloʼ, tu yaʼaloʼobtiʼ: «Maʼ a chʼaʼik saajkil, tumen tsʼoʼok u síijil juntúul a chan hijo». Letiʼeʼ maʼ tu núukaj mix baʼaliʼ mix tu beetaj u cuentailiʼ.
21 Pero tu tsʼáaj u kʼaabaʼt Ikabod*+ tiʼ le chan xiʼipaloʼ, ka tu yaʼalaj: «Le poder yaan kaʼach tiʼ Israeloʼ tsʼoʼok u bisaʼal»,+ lelaʼ tu yaʼalaj tumen chʼaʼab u cajail u pacto le u jaajil Diosoʼ yéetel yoʼolal le baʼax úuch tiʼ u suegro yéetel tiʼ u yíichamoʼ.+
22 Letiʼeʼ tu yaʼalaj: «Le poder yaan kaʼach tiʼ Israeleʼ tsʼoʼok u bisaʼal, tumen tsʼoʼok u chʼaʼabal u cajail u pacto le u jaajil Diosoʼ».+
Notas
^ Ich hebreoeʼ ku yaʼalaʼal kaʼach «¿Baʼaxten tu ganartoʼon Jéeoba?».
^ Uláakʼ bix u traducirtaʼaleʼ «chúumuk tiʼ».
^ Ilawil página 2577.
^ Tuláakʼ tuʼuxeʼ ku yaʼalaʼal «chaanpal».
^ U kʼáat u yaʼal «¿Tuʼux Yaan le Poderoʼ?».
