1 Timoteo 6:1-21
6 Le máaxoʼob táan u meyajoʼob bey esclavoʼobeʼ maʼ u xuʼulul u jach respetartik u tsʼuuliloʼob,+ utiaʼal maʼ u tʼaan mix máak tu contra u kʼaabaʼ Dios mix tu contra le baʼaxoʼob ku kaʼansikoʼ.+
2 Tsʼoʼoleʼ le máaxoʼob yaan u tsʼuuliloʼob ku creerkoʼob Cristooʼ maʼ unaj u xuʼulul u jach respetartik u tsʼuuliloʼob chéen tumen sukuʼunoʼobiʼ. Baʼaxeʼ maas unaj u tsʼáaik u yóoloʼob meyaj, tumen u yojloʼobeʼ le máaxoʼob kʼamik u yutsil le maʼalob meyaj ku beetkoʼoboʼ u yéet sukuʼuniloʼob, tsʼoʼoleʼ u yaabiltmoʼob xan.
Seguernak a kaʼansik yéetel a sen aʼalik ka beetaʼak le baʼaloʼobaʼ.
3 Wa yaan máax táan u kaʼansik junpʼéel baʼal ku bin tu contra le maʼalob kaʼansaj+ ku taal tiʼ k-Yuumtsil Jesucristo yéetel ku kaʼansik maʼ tsaaj u tsʼáaik u yóol máak u meyajt Dioseʼ+
4 le máak jeʼeloʼ chéen táan u nojbaʼalkúuntkuba yéetel maʼ tu naʼatik mix baʼal.+ Chéen ku tuukul tiʼ baʼateltʼaanoʼob yéetel tiʼ sakachtʼaanoʼob.+ Le baʼaloʼobaʼ ku beetik u pʼektik máak u yéet máakil, u baʼateʼel máak, u kʼaakʼastʼaan, u tuklaʼal baʼal kʼaas yoʼolal wa máax
5 yéetel u baʼateltʼaan máak mantatsʼ yoʼolal baʼaloʼob maʼ kʼaʼanaʼantakoʼobiʼ. Tuláakal lelaʼ ku taal tiʼ máakoʼob kʼaschajaʼan u tuukuloʼob+ minaʼan u jaajil tiʼob, ku tuklikoʼobeʼ u jach kʼubik u yóol máak u meyajt Dioseʼ ku taasik yaʼab náajalil.+
6 U jaajileʼ wa k-kʼubik k-óol utiaʼal k-meyajt Dioseʼ yaʼab utsil jeʼel u taasiktoʼoneʼ,+ chéen baʼaleʼ chéen wa kiʼimak k-óol yéetel le baʼaxoʼob yaantoʼonoʼ.
7 Tumen mix baʼal t-taasaj way yóokʼol kaabeʼ yéetel mix baʼal xan jeʼel u páajtal k-biskeʼ.+
8 Le oʼolaleʼ wa yaan baʼal k-jaante, yaan k-nookʼ bey xan tuʼux k-antaleʼ yaan u kiʼimaktal k-óol yéetel le baʼaloʼobaʼ.+
9 Chéen baʼaleʼ le máaxoʼob u chʼaʼtukultmaj u ayikʼaltaloʼoboʼ ku túuntaʼal u yóoloʼob yéetel ku lúubloʼob tiʼ junpʼéel léech+ bey xan tiʼ kʼaakʼas tsʼíibolaloʼob chéen kuneloʼob ku biskoʼob máak tiʼ kʼaskúunajil yéetel xuʼulsajil.+
10 Tumen u yaabiltaʼal le taakʼinoʼ u moots tuláakal u jejeláasil baʼaloʼob kʼaastak. Yaan máakoʼobeʼ tumen ku sen tsʼíiboltkoʼob u yantaltiʼob taakʼineʼ tsʼoʼok u náachkuntaʼaloʼob tiʼ le fejoʼ yéetel tsʼoʼok u sen muʼyajoʼob.*+
11 Chéen baʼaleʼ teech táan a meyajtik Dioseʼ púutsʼen tiʼ le baʼaloʼobaʼ. Xeen tu paach le justiciaoʼ, ilawil a tsʼáaik a wóol a meyajt Dios, xeen tu paach le fejoʼ, le yaabilajoʼ, le chúukaʼan óolaloʼ yéetel ilawil maʼ a séeb kʼuuxil.+
12 Baʼatelnen tu yoʼolal le fejoʼ, chich machaba tiʼ le kuxtal minaʼan u xuuloʼ. Kʼaʼajaktecheʼ Dioseʼ tu tʼanech utiaʼal ka kuxlakech minaʼan u xuul, teech xaneʼ tsʼoʼok a tʼaan tu táan yaʼab máakoʼob yoʼolal le kuxtalaʼ.
13 Tu táan Dios le máax ku tsʼáaik kuxtal tiʼ tuláakal baʼal bey xan tu táan Cristo Jesús, le máax tʼaanaj maʼalob bey juntúul testigo tu táan Poncio Pilatoeʼ,+ kin waʼaliktech
14 ka a tsʼoʼokbes le baʼax tsʼoʼok u yaʼalaʼaltechoʼ. Le kéen a beeteʼ ilawil a beetik jeʼex unajoʼ yéetel ilawil maʼ u yantal baʼax oʼolal a kʼeʼeyel, bey unaj a beetik tak le kʼiin ken chíikpajak k-Yuumtsil Jesucristooʼ.+
15 Le kéen kʼuchuk u kʼiinileʼ yaan u chíikbeskuba Jesucristo, le máax kiʼimak u yóoloʼ, le juntúuliliʼ Máax yaan páajtalil tiʼoʼ. Letiʼeʼ u Rey le máaxoʼob ku reinaroʼoboʼ, u Yuumtsil le máaxoʼob ku gobernaroʼoboʼ,+
16 chéen letiʼ maʼ tu páajtal u kíimil+ yéetel tiʼ kajaʼan tiʼ junpʼéel lugar jach táaj sáasil+ tuʼux mix máak jeʼel u páajtal u náatsʼleʼ. Letiʼeʼ mix máak ilmil yéetel maʼ tu páajtal u yilaʼal.+ Letiʼ unaj u respetartaʼal yéetel tiʼ letiʼ unaj u tsʼaʼabal páajtalil utiaʼal mantatsʼ. Ka béeyak.*
17 Tiʼ le máaxoʼob ayikʼaloʼob teʼ yóokʼol kaabaʼ aʼaltiʼob maʼ unaj u kaʼantal u yichoʼobiʼ yéetel maʼ unaj u kʼubik u yóoloʼob tiʼ le ayikʼaliloʼob ku xuʼululoʼoboʼ,+ baʼaxeʼ unaj u kʼubik u yóoloʼob tiʼ Dios le máax tsʼáaiktoʼon tu chúukaʼanil tuláakal le baʼaxoʼob taasiktoʼon kiʼimak óolaloʼ.+
18 Aʼaltiʼob ka u beetoʼob baʼax uts, ka yaʼabchajak le baʼaloʼob maʼalobtak ku beetkoʼoboʼ, mantatsʼ ka u síiʼob baʼaloʼob tiʼ u maasil yéetel ka u beetoʼob jeʼex u síijil tu puksiʼikʼaloʼobeʼ.+
19 Wa ku beetkoʼobeʼ yaan u yantaltiʼob le ayikʼalil ku suut bey junpʼéel maʼalob chuunpakʼ utiaʼal le kʼiinoʼob kun taaloʼoboʼ+ yéetel yaan u páajtal u chich machkubaʼob tiʼ le kuxtal jach tu jaajil kuxtaloʼ.+
20 Timoteo, in paal, kanáant le baʼax tsʼoʼok u kʼubéentaʼaltechoʼ,+ náachkuntaba tiʼ le tʼaanoʼob chéen kuneltak yéetel ku binoʼob tu contra le baʼaloʼob santoʼoboʼ. Náachkuntaba xan tiʼ le máaxoʼob ku yaʼalikoʼob u kʼaj óoloʼob Diosoʼ chéen baʼaleʼ le baʼax ku kaʼanskoʼoboʼ ku bin tu contra le baʼax jaajoʼ.+
21 Yaan máakoʼobeʼ ikil u creerkoʼob le kaʼansajoʼob jeʼeloʼ tsʼoʼok u náachtaloʼob tiʼ le fejoʼ.
U nojoch utsil Dios ka yanak ta wéeteleʼex.
