Génesis 12:1-20
12 Jéeoba túuneʼ tu yaʼalaj tiʼ Abrán: «Jóokʼkech tiʼ le luʼum tuʼux yanechoʼ yéetel lukʼkech tu yiknal a láakʼtsiloʼob utiaʼal ka xiʼikech teʼ luʼum ken in weʼestechoʼ.+
2 Teneʼ yaan in beetik u jóokʼol junpʼéel nojoch nación tiʼ teech, yaan in bendecirkech, yaan in beetik a jach kʼaj óoltaʼal, yéetel ta woʼolaleʼ yaan in bendecirtik u maasil máakoʼob.+
3 Yaan in bendecirtik le máaxoʼob bendecirkechoʼ yéetel yaan in maldecirtik le máaxoʼob maldecirkechoʼ,+ tsʼoʼoleʼ ta woʼolaleʼ yaan xan in bendecirtik tuláakal le kaajoʼob yanoʼob teʼ luʼumoʼ».+
4 Abrán túuneʼ bin jeʼel bix aʼalaʼabiktiʼ tumen Jéeobaoʼ, Lot xaneʼ bin tu yéetel. Abráneʼ 75 años yaantiʼ ka jóokʼ tu kaajil Arán.+
5 Abráneʼ jóokʼ u binbal tak tu luʼumil Canaán+ junmúuchʼ yéetel Sarai+ u yatan, Lot u sobrino,+ le sirvienteʼob yanchajtiʼ le tiaʼan tu kaajil Aránoʼ yéetel tuláakal le baʼaxoʼob yaantiʼoʼ.+ Le ka kʼuchoʼob tu luʼumil Canaáneʼ,
6 Abráneʼ bin tak tu kaajil Sikem,+ naatsʼ teʼ tuʼux yaan u nukuch cheʼiloʼob Moréoʼ.+ Teʼ kʼiinoʼob jeʼeloʼ le cananeoʼoboʼ tiʼ kajaʼanoʼob tu luʼumil Canaáneʼ.
7 Jéeoba túuneʼ tu chíikbesuba tiʼ Abráneʼ ka tu yaʼalajtiʼ: «Le luʼumaʼ+ yaan in tsʼáaik tiʼ a paalal».+ Le oʼolal letiʼeʼ tu beetaj junpʼéel altar tiʼ Jéeoba, le máax tu chíikbesuba tiʼoʼ.
8 Ka máan kʼiineʼ bin teʼ montañaʼob yaan tu lakʼinil u kaajil Beteloʼ+ ka tu armartaj junpʼéel naj de nookʼiʼ. Betel túuneʼ pʼáat chikʼin* tiʼ le najoʼ, yéetel u kaajil Ayeʼ+ pʼáat tu lakʼinil. Teʼeloʼ tu beetaj junpʼéel altar tiʼ Jéeobaeʼ+ ka káaj u alabartik u kʼaabaʼ Jéeoba.+
9 Ka tsʼoʼokeʼ Abrán yéetel le máaxoʼob yanoʼob tu yéeteloʼ tu chʼaʼajoʼob tuláakal baʼax yaantiʼobeʼ ka jóokʼ u binbaloʼob tak tu desiertoil Négueb,+ letiʼobeʼ mantatsʼ táan u binoʼob kajtal yaanal tuʼux.
10 Teʼ kʼiinoʼob jeʼeloʼ yanchaj junpʼéel nojoch wiʼijil tu luʼumil Canaán, le oʼolal Abráneʼ bin kajtal tu luʼumil Egipto junpʼéel tiempo,*+ tumen jach pʼáat minaʼan baʼal utiaʼal jaantbil teʼ tuʼux yaan kaʼachoʼ.+
11 Le jach taʼaytak u yokol tu luʼumil Egiptooʼ letiʼeʼ tu yaʼalaj tiʼ Sarai, u yatan: «Yaan junpʼéel baʼal taak in kʼáatiktech ka a beete, beet uts a wuʼuyiken. Teneʼ in wojleʼ jach kiʼichpanech.+
12 Le kéen ilaʼakech tumen le egipcioʼoboʼ jach seguro yaan u yaʼalikoʼob: ‹Le koʼolelaʼ u yatan›. Yaan túun u kíimskenoʼob, pero tiʼ techeʼ mix baʼal ken u beetoʼob.
13 Le oʼolaleʼ beet uts a waʼalik in wíitsʼinech. Beyoʼ ta woʼolaleʼ yaan u binten utsil yéetel maʼ kin kíimsbil».+
14 Chéen pʼelak kʼuchik Abrán Egiptoeʼ, le egipcioʼoboʼ tu yiloʼobeʼ jach táaj kiʼichpan Sarai.
15 Le príncipeʼob tsʼaʼanoʼob tumen Faraónoʼ* tu yiloʼob xan Sarai, letiʼobeʼ joʼopʼ u yaʼalikoʼob tiʼ Faraón jach kiʼichpan le koʼoleloʼ. Le oʼolaleʼ Saraieʼ bisaʼab tu yotoch Faraón.
16 Faraón túuneʼ maʼalob tu tratartil Abrán tu yoʼolal Sarai. Le beetkeʼ tiʼ Abráneʼ tu tsʼáaj tamanoʼob, wakaxoʼob, burroʼob yéetel x-burraʼob, camelloʼob bey xan sirvienteʼob yéetel sirvientaʼob.+
17 Jéeoba túuneʼ tu beetaj u sen muʼyaj Faraón bey xan le máaxoʼob yanoʼob tu yotoch úuchik u bisik Sarai, u yatan Abránoʼ.+
18 Le beetik Faraóneʼ tu túuxtaj tʼanbil Abráneʼ ka tu yaʼalajtiʼ: «¿Baʼax le tsʼoʼok a beetikten beyaʼ? ¿Baʼaxten maʼ ta waʼalajten wa a wataniʼ?
19 ¿Baʼaxten ta waʼalajten de ke a wíitsʼin?+ Yoʼolal leloʼ óolak in chʼaʼ in watante. Jeʼel a watanaʼ, ¡chʼaʼe, xeen yéetel!».
20 Faraón túuneʼ tu yaʼalaj tiʼ u j-meyajoʼob ka u yiloʼob ka jóokʼok Abrán, u yatan, paʼteʼ yéetel tuláakal baʼax yaantiʼ.+
Notas
^ Wa «oeste».
^ Wa «bin kajtal tu luʼumil Egipto bey j-táanxel luʼumileʼ».
^ Ilawil página 2563.
