Génesis 4:1-26
4 Adán túuneʼ yanchaj baʼal u yil yéetel Eva u yataneʼ ka pʼáat embarazadail.+ Le ka síij túun Caíneʼ,+ Evaeʼ tu yaʼalaj: «Tsʼoʼok u síijil juntúul in chan hijo yéetel u yáantaj Jéeoba».
2 Ka máan tiempoeʼ síij Abel,+ u yíitsʼin Caín.
Abeleʼ kʼuch u beetuba j-kanan taman, pero Caíneʼ tu kanaj u meyajt le luʼumoʼ.
3 Juntéenjeakileʼ Caíneʼ tu taasaj u yich jujunpʼéel tiʼ le baʼaxoʼob u pakʼmoʼ ka tu kʼubaj tu táan Jéeoba bey junpʼéel ofrendaeʼ.
4 Abel xaneʼ, ichil le tamanoʼob ku kanáantikoʼ tu chʼaʼaj le yáax síijoʼoboʼ+ ka tu kʼubaj paʼteʼ yéetel u tsaatseloʼob. Abeleʼ lúub utsil tiʼ Jéeoba bey xan le baʼax tu kʼuboʼ,+
5 pero Caíneʼ maʼ lúub utsil tiʼ Diosiʼ mix xan le baʼax tu kʼuboʼ. Le oʼolal Caíneʼ sen pʼuʼuji yéetel jach lúub u yóol.
6 Jéeoba túuneʼ tu yaʼalaj tiʼ Caín: «¿Baʼaxten jach pʼujaʼanech yéetel jach lubaʼan a wóol?
7 Wa ka a tsʼáaba a beet baʼax maʼalobeʼ, ¿maʼ wa jeʼel a kaʼa lúubul utsil tiʼ teneʼ?* Pero wa maʼ ta tsʼáaikaba a beet baʼax maʼalobeʼ, le kʼebanoʼ bey waʼalakbal táan u páaʼtikecheʼ tumen u kʼáat u dominartech, pero techeʼ unaj a wilik a dominartik».
8 Ka tsʼoʼok leloʼ Caíneʼ tu yaʼalaj tiʼ Abel, u yíitsʼin: «Koʼox xíimbal teʼ kʼáaxoʼ». Le ka kʼuchoʼob túun teʼ kʼáaxoʼ Caíneʼ tu atacartaj Abeleʼ ka tu kíimsaj.+
9 Maʼ sáam tiʼ leloʼ Jéeobaeʼ tu kʼáataj tiʼ Caín: «¿Tuʼux yaan Abel, a wíitsʼin?». Caín túuneʼ tu núukaj: «Tuʼux in wojéeltik. Si teneʼ maʼ tu paach in wíitsʼin kin máan utiaʼal in kanáantikiʼ».
10 Dios túuneʼ tu yaʼalajtiʼ: «¿Baʼax tsʼoʼok a beetik beyaʼ? Uʼuy a wuʼuye, u kʼiʼikʼel a wíitsʼineʼ táan u sen kʼáatikten desde teʼ luʼumoʼ ka in beet justicia.+
11 Beora túunaʼ kin maldecirkech, yéetel kin jóoʼsikech tiʼ le luʼum tuʼux wéek u kʼiʼikʼel a wíitsʼin ta kíimsoʼ.+
12 Le kéen a meyajt le luʼumoʼ maʼ ken u tsʼáa u yich. Mix tuʼux kan pʼáatal kajtal, yéetel mantatsʼ yaan a taʼakikaba jeʼel tuʼuxak ka xiʼikecheʼ».
13 Le oʼolal Caíneʼ tu yaʼalaj tiʼ Jéeoba: «Jach nojoch yéetel jach yaj le castigo ka tsʼáaikten yoʼolal le baʼax tin beetoʼ.
14 Bejlaʼeʼ táan a jóoʼsiken tiʼ le luʼumaʼ, maʼ ken in wil a wutsil tu kaʼatéen mix tuʼux kin pʼáatal kajtal, yéetel mantatsʼ yaan in taʼakikinba jeʼel tuʼuxak ka xiʼikeneʼ. Tsʼoʼoleʼ jeʼel máaxak ka u yileneʼ yaan u yóotik u kíimsen».
15 Jéeoba túuneʼ tu yaʼalajtiʼ: «Yoʼolal leloʼ jeʼel máaxak ka u kíims Caíneʼ siete u téenel u maas yajil le castigo ken u kʼamoʼ».
Bey túunoʼ Jéeobaeʼ tu tsʼáaj junpʼéel señal, utiaʼal beyoʼ jeʼel máaxak ka u yil Caíneʼ maʼ u beetik loob tiʼ.
16 Caín túuneʼ lukʼ tu táan Jéeobaeʼ ka bin kajtal tu luʼumil Nod, lelaʼ tu lakʼinil Edén yaan.+
17 Caín túuneʼ yanchaj baʼal u yil yéetel u yatan.+ Letiʼeʼ pʼáat embarazadaileʼ ka síij túun Enok. Tsʼoʼoleʼ Caíneʼ tu beetaj junpʼéel kaajeʼ ka tu tsʼáaj u kʼaabaʼt Enok, jeʼex u kʼaabaʼ u hijoeʼ.
18 Ka máan kʼiineʼ síij Irad, u hijo Enok. Iradeʼ u papá Meujael. Meujaeleʼ u papá Metusael, yéetel Metusaeleʼ u papá Lamek.
19 Lamekeʼ yanchaj kaʼatúul u yatan. U kʼaabaʼ le yáaxoʼ Adá, yéetel le uláakʼoʼ Zilá.
20 Adáeʼ yanchaj juntúul u hijo ku kʼaabaʼtik Jabal. Jabaleʼ letiʼe máax yáax káaj u kajtal tiʼ najoʼob de nookʼoʼ. Letiʼeʼ yaan xan kaʼach u yalakʼ baʼalcheʼob.
21 Jabaleʼ yanchaj juntúul u yíitsʼin ku kʼaabaʼtik Jubal. Jubaleʼ letiʼ káajs u paxik le arpa yéetel le flautaoʼ.
22 Ziláeʼ yanchaj juntúul u hijo ku kʼaabaʼtik Tubal-caín, letiʼeʼ ku beetik kaʼach u jejeláasil nuʼukuliloʼob meyaj de cobre yéetel de fierro. Tubal-caíneʼ yanchaj xan juntúul u kiik* ku kʼaabaʼtik Naamá.
23 Lamek túuneʼ tu yaʼalaj tiʼ Adá yéetel Zilá le tʼaanoʼobaʼ:
«In wataneʼex, uʼuyeʼex in tʼaan.
Jach uʼuyeʼex le baʼax ken in waʼalaʼ:
tsʼoʼok in kíimsik juntúul máak tumen tu beetajten loob.
Tin kíimsaj le táankelmaʼ tumen tu jatsʼen.
24 Wa 7 u téenel kun vengarbil Caíneʼ,+Lamekeʼ 77 u téenel».
25 Adáneʼ kaʼa anchaj baʼal u yil yéetel u yataneʼ ka yanchaj juntúul u hijo. Tiʼ le chan xiʼipaloʼ Evaeʼ tu tsʼáaj u kʼaabaʼt Set,*+ tumen tu yaʼalaj: «Dioseʼ tsʼoʼok u tsʼáaikten uláakʼ in hijo utiaʼal u jeelintik Abel, le máax kíimsaʼab tumen Caínoʼ».+
26 Ka máan kʼiineʼ síij juntúul u hijo Set, ka tu tsʼáaj u kʼaabaʼt Enós.+ Teʼ kʼiinoʼob jeʼeloʼ le máakoʼoboʼ káaj u yaʼalikoʼob u kʼaabaʼ Jéeoba.
Notas
^ Wa «¿maʼ wa jeʼel in kaʼa aceptarkecheʼ?».
^ Maʼ ojéelaʼan máax u maas nojchiliʼ, Naamá wa Tubal-caín.
^ U kʼáat u yaʼal «Yéeyaʼan; Tsʼaʼan; Colocartaʼan».
