Ezequiel 9:1-11
9 Dioseʼ kʼaʼam tʼaanajeʼ ka tu yaʼalajten: «¡Muchʼkíint le máaxoʼob kun xuʼulsik tiʼ le kaajoʼ, cada juntúuleʼ unaj u chʼaʼamaj u nuʼukulil u xuʼulsaj!».
2 Teen túuneʼ tin wilaj seis máakoʼob táan u taaloʼob tu tojil le joonaj yaan maas kaʼanaloʼ,+ le joonaj yaan tu tojil xamanoʼ. Cada juntúuleʼ u chʼaʼamaj junpʼéel nuʼukul utiaʼal u xíikjatsʼtaʼal máak. Tu yiknaloʼobeʼ tiaʼan kaʼach juntúul máak u takmaj junpʼéel nookʼ de lino yéetel u chʼiknakʼmaj u nuʼukulil u tsʼíib juntúul secretario. Letiʼobeʼ ookoʼobeʼ ka pʼáatoʼob waʼatal tu tséel le altar de cobreoʼ.+
3 Ka tsʼoʼokeʼ u kiʼichkelem sáasil u Dios Israeleʼ+ lukʼ tu yóokʼol le querubínoʼoboʼ* ka náatsʼ tu joonajil le templooʼ.+ Dios túuneʼ tu tʼanaj le máak u takmaj junpʼéel nookʼ de lino yéetel u chʼiknakʼmaj u nuʼukulil u tsʼíib juntúul secretariooʼ.
4 Jéeobaeʼ tu yaʼalaj tiʼ le máakoʼ: «Máankech ichil le kaajoʼ, máankech ichil Jerusaléneʼ ka a tsʼáa junpʼéel marca tu táanpoolal tuláakal le máaxoʼob yaachajaʼan u yóoloʼob yéetel táan u muʼyajoʼob+ yoʼolal tuláakal le baʼaloʼob sen kʼaastak ku beetaʼal teʼ kaajoʼ».+
5 Teneʼ tin wuʼuyaj xan u yaʼalik Dios tiʼ le seis máakoʼoboʼ: «Xeeneʼex tu paach le máakoʼ ka máankeʼex ichil le kaaj utiaʼal a xuʼulskeʼex tiʼ le máakoʼoboʼ. Maʼ a chʼaʼikeʼex óotsilil tiʼob mix u yaatal a wóoleʼex kéen a wileʼex bix u tsʼoʼokoltiʼob.+
6 Xuʼulseʼex tiʼ tuláakal le chʼijaʼanoʼoboʼ, le táankelmoʼoboʼ, le x-chʼúupalaloʼoboʼ, le mejen paalaloʼoboʼ yéetel le koʼoleloʼoboʼ.+ Chéen baʼaleʼ maʼ a náatsʼleʼex tu yiknal le máaxoʼob tsʼaʼan le marca tiʼoboʼ.+ Desde teʼ lugar santo unaj a káajleʼexoʼ».+ Letiʼob túuneʼ káaj u kíimskoʼob le u nuuktakil le kaaj yanoʼob tu táan le templooʼ.+
7 Ka tsʼoʼokeʼ tu yaʼalaj tiʼ le seis máakoʼoboʼ: «¡Xeeneʼex!, ookeneʼex tak teʼ templooʼ, kíimseʼex le máaxoʼob yanoʼob tu táankabiloʼoboʼ».+ Letiʼob túuneʼ binoʼobeʼ ka tu beetoʼob. Le ka tsʼoʼokeʼ binoʼob teʼ kaajoʼ ka tu kíimsoʼob le máakoʼob yanoʼoboʼ.
8 Le táan u kíimsaʼal le máakoʼoboʼ chéen teen maʼ kíimsaʼabeniʼ. Teen túuneʼ xolajeneʼ ka tin kʼaʼam aʼalaj: «Jéeoba, teech le máax yaan tuláakal autoridad tiʼoʼ. ¿Yaan wa a xuʼulsik tiʼ u yalab u kajnáaliloʼob Israel ikil a láalik a pʼujaʼanil tu yóokʼol Jerusalén?».+
9 Letiʼeʼ tu núukajten: «U kaajil Israel yéetel Judáeʼ jach táaj kʼaas baʼax tsʼoʼok u beetkoʼob.+ Tuláakal le luʼumoʼ chuup yéetel u kʼiʼikʼel le máaxoʼob tsʼoʼok u kíimsaʼaloʼoboʼ,+ yéetel le kaajoʼ chuup yéetel máakoʼob tsʼoʼok u kʼastaloʼob.+ Letiʼobeʼ ku yaʼalikoʼob: ‹Jéeobaeʼ tsʼoʼok u xúumpʼattik le luʼumaʼ. Jéeobaeʼ maʼ táan u yilkoʼoniʼ›.+
10 Le oʼolal teneʼ maʼ ken in chʼaʼ óotsilil tiʼob mix kun yaatal in wóol kéen in wil bix u tsʼoʼokoltiʼob.+ Yaan in beetik u taal tu yóokʼoloʼob le baʼax tsʼoʼok u náajaltikoʼob tu yoʼolal le baʼax ku beetkoʼoboʼ».
11 Ka tsʼoʼokeʼ tin wilaj le máax u takmaj junpʼéel nookʼ de lino yéetel u chʼiknakʼmaj u nuʼukulil tsʼíiboʼ, letiʼeʼ suunajeʼ ka tu yaʼalaj: «Tsʼoʼok in beetik jach jeʼex ta waʼalajtenoʼ».
Notas
^ Ilawil página 2577.
