Mateo 11:1-30
11 Le ka tsʼoʼok u tsolik Jesús tiʼ u 12 discípuloʼob baʼax unaj u beetkoʼobeʼ, lukʼ teʼeloʼ ka bin kaʼansaj yéetel u tsikbalt u tʼaan Dios teʼ kaajoʼob yanoʼob naatsʼoʼ.+
2 Le tiaʼan Juan teʼ cárceloʼ+ tu yuʼubaj u yaʼalaʼal baʼax ku beetik Cristo, ka tu túuxtaj u discípuloʼob tu yiknal+
3 utiaʼal u kʼáatkoʼobtiʼ: «¿Teech wa le Máax aʼalaʼan kun taaloʼ, wa yaan k-páaʼtik u taal uláakʼ?».+
4 Jesúseʼ tu núukajtiʼob: «Xeen a waʼaleʼex tiʼ Juan le baʼax ka wuʼuyikeʼex yéetel ka wilkeʼexaʼ:+
5 le chʼóopoʼoboʼ ku yantal u sáasiloʼob,+ le móoch u yookoʼoboʼ ku xíimbaloʼob, le yaan lepra+ tiʼoboʼ ku yutstaloʼob, le kóokoʼoboʼ ku jeʼepajal u xiknoʼob, le kimenoʼoboʼ ku kaʼa kuxkíintaʼaloʼob, yéetel táan u tsikbaltaʼal tiʼ le óotsiloʼob le maʼalob baʼaloʼob kun úuchloʼoboʼ.+
6 Kiʼimak u yóol le máax maʼ tu tʼóochpajal tin woʼolaloʼ».+
7 Le táan u lukʼul u discípuloʼob Juan teʼeloʼ Jesúseʼ káaj u tʼaan tu yoʼolal Juan tu táan le yaʼabkach máakoʼoboʼ, tu yaʼalaj: «¿Baʼax jóokʼeʼex a wileʼex teʼ desiertooʼ?+ ¿Junkúul sakʼab ku yúuntaʼal tumen le iikʼoʼ?+
8 ¿Jach baʼax túun jóokʼeʼex a wileʼex? ¿Juntúul máak u búukintmaj koʼokoj nookʼoʼob? ¡Si le máaxoʼob búukintik koʼokoj nookʼoʼoboʼ tu yotoch reyoʼob yanoʼob!
9 ¿Baʼax oʼolal túun jóokʼeʼex? ¿Jóokʼeʼex wa a wileʼex juntúul profeta? Teneʼ kin waʼalikteʼex: letiʼeʼ maas nojoch ke juntúul profeta.+
10 Lelaʼ letiʼe baʼax tsʼíibtaʼan tu yoʼolal Juanaʼ: ‹¡Ilawile! ¡Táan in túuxtik juntúul máak* utiaʼal ka xiʼik táanil tiʼ teech, letiʼeʼ yaan u maʼalobkíintik le bej tuʼux kan máanoʼ!›.+
11 Tu jaajil kin waʼalikteʼex: ichil tuláakal le máaxoʼob tsʼoʼok u síijloʼoboʼ mix máak maas nojoch tiʼ Juan Bautista, chéen baʼaleʼ le máax maas chichan tu Reinoil le kaʼanoʼ maas nojoch ke letiʼ.+
12 Desde tu kʼiiniloʼob Juan Bautista tak bejlaʼeʼ, le máakoʼoboʼ jach táan u yilik u yookloʼob tu Reinoil kaʼan, yéetel le máaxoʼob jach ku tsʼáaik u yóoloʼobeʼ ku yookloʼobiʼ.+
13 Tumen tak ka chíikpaj Juaneʼ, le Profetaʼob yéetel le Leyoʼ tu yaʼaloʼob baʼax kun úuchul.+
14 Kex ka a wóot a kʼameʼex wa maʼeʼ, le máakaʼ letiʼe ‹Elías aʼalaʼan kun taaloʼ›.+
15 Le máax yaan u xikineʼ u yuʼub baʼax kin waʼalik.
16 ¿Máax yéetel ken in ket le generaciónaʼ?+ Le generaciónaʼ bey jeʼex le mejen paalaloʼob kulukbaloʼob teʼ kʼíiwikoʼ, letiʼobeʼ ku yaʼalikoʼob tiʼ u yéet báaxaloʼob:
17 ‹T-paxaj le flautaoʼ, chéen baʼaleʼ teʼexeʼ maʼ óokʼotnajeʼexiʼ; awat okʼolnajoʼon, chéen baʼaleʼ teʼexeʼ maʼ ta loʼoloxaj a tseemeʼex utiaʼal a weʼeskeʼex yaachajaʼan a wóoleʼexiʼ›.
18 Bey xan úuchik tiʼ Juanoʼ, letiʼeʼ ku ayunar kaʼachi yéetel maʼatech u yukʼik vino, chéen baʼaleʼ le máakoʼoboʼ tu yaʼaloʼob: ‹Okaʼan demonio tiʼ›.
19 U Paal máakeʼ ku janal yéetel ku yukʼik vino,+ chéen baʼaleʼ le máakoʼoboʼ ku yaʼalikoʼob: ‹¡Ilawileʼex! Le máakaʼ jach maʼatech u tsʼáaik u pʼiis u janal yéetel yaʼab u yukʼik vino, ku biskuba yéetel le máaxoʼob cobrartik impuestoʼoboʼ bey xan yéetel le j-kʼeban máakoʼoboʼ›.+ Chéen baʼaleʼ le baʼaloʼob maʼalobtak ku beetik máakoʼ ku yeʼesik yaan u naʼat».+
20 Jesús túuneʼ joʼopʼ u tʼaan tu contra le kaajoʼob tuʼux tu beetaj yaʼab milagroʼoboʼ, tumen u kajnáaliloʼobeʼ maʼ tu kʼexaj u tuukuloʼobiʼ. Letiʼeʼ tu yaʼalajtiʼob:
21 «¡Yaj baʼax kun úuchultech, Corazín! ¡Yaj baʼax kun úuchultech, Betsaida!, tumen wa tu kaajil Tiro yéetel Sidón ka beetaʼak kaʼach le milagroʼob beetaʼab ichileʼexaʼ bejlaʼa úuch u yeʼesoʼob tsʼoʼok u kʼexik u tuukuloʼobeʼ, bejlaʼa úuch kulakoʼob ich taʼan u búukintmoʼob toʼotoch nookʼeʼ.*+
22 Le oʼolal kin waʼalikteʼex: tu Kʼiinil le Juiciooʼ maas jeʼel u chʼaʼabal óotsilil tiʼ u kaajil Tiro yéetel tiʼ Sidón ke tiʼ teʼexeʼ.+
23 Kux túun teech Capernaúm,+ ¿yaan wa a nojbaʼalkúuntaʼal tak teʼ kaʼanoʼ? Maʼ, baʼaxeʼ tak teʼ Muknal* kan éemeloʼ;+ tumen wa tu kaajil Sodoma ka beetaʼak kaʼach le milagroʼob beetaʼab ta wiknaloʼ, bejlaʼa tsʼoʼok u pʼáatal kaʼach tak teʼ kʼiinoʼobaʼ.
24 Le oʼolaleʼ kin waʼaliktech: tu Kʼiinil le Juiciooʼ maas jeʼel u chʼaʼabal óotsilil tiʼ u kaajil Sodomaeʼ ke tiʼ teech».+
25 Teʼ kʼiin jeʼeloʼ Jesúseʼ tu yaʼalaj: «In Yuum, teech u Yuumil kaʼan yéetel luʼum. Kin alabarkech tu táan le máakoʼoboʼ, tumen tiʼ le mejen paalaloʼoboʼ ta weʼesaj le kaʼansajoʼob a taʼakmaj tiʼ le máaxoʼob jach kaanbalnajaʼanoʼob yéetel yaan u naʼatoʼoboʼ.+
26 In Yuum, leloʼ bey ta wóotilak ka úuchkoʼ.
27 Tuláakal le baʼaloʼobaʼ tsʼoʼok u tsʼaʼabal in wojéelt tumen in Taata.+ Chéen le Taata jach kʼaj óoltmil le Paaloʼ,+ yéetel chéen le Paal jach kʼaj óoltmil le Taataoʼ. Le máakoʼoboʼ chéen jeʼel u kʼaj óoltikoʼob le Taata wa ku kaʼansaʼaloʼob tumen le Paaloʼ.+
28 Teʼex jach yaʼab a meyajeʼex yéetel aal a kuucheʼexeʼ, taalakeʼex tin wiknal, teen ken in beet a jeʼelsikabaʼex.
29 Biseʼex ta wóokʼoleʼex u cheʼil in kuuch yéetel kaanbalneneʼex tiʼ teen, tumen teneʼ maʼ séeb in kʼuuxiliʼ yéetel kabal u yóol in puksiʼikʼal,+ beyoʼ jeʼel a jeʼelsikabaʼexeʼ.
30 Tumen u cheʼil in kuucheʼ chéen chʼaʼabil u bisaʼal, yéetel in kuucheʼ jach sáal».
