Salmos 62:1-12
Utiaʼal máax ku nuʼuktaj. Jedutún. Le kʼaayaʼ David tsʼíibte.
62 Yaan u chúukpajal in wóol in páaʼt baʼax ken u beet Dios,letiʼ kun salvarken.+
2 Letiʼeʼ bey junpʼéel nuxiʼ tuunich tuʼux kin taʼakikinbaeʼ, letiʼ salvarken, letiʼ kanáantken.+
Mix bikʼin kin luʼsbil tuʼux yanen.+
3 Tuláakleʼexeʼ jach peligrosoʼex, beyeʼex junpʼéel pakʼ tsʼoʼok u chʼéebeleʼ, junpʼéel pakʼ taʼaytak u níikil.*
¿Baʼax kʼiin u xuʼulul a atacarkeʼex máak utiaʼal a kíimskeʼex?+
4 Teʼexeʼ ka chʼaʼtuklikeʼex bix jeʼel a luʼskeʼex máak teʼ puesto tuʼux yanoʼ.
Uts ta tʼaan a tuuseʼex.
Yéetel a chiʼexeʼ ka bendecirkeʼex máak, pero ichil a puksiʼikʼaleʼexeʼ táan a maldecirkeʼex.+ (Séla)
5 Yaan u chúukpajal in wóol in páaʼt baʼax ken u beet Dios,+tumen letiʼ tsʼáaikten esperanza.+
6 Letiʼeʼ bey junpʼéel nuxiʼ tuunich tuʼux kin taʼakikinbaeʼ, letiʼ salvarken, bey junpʼéel lugar seguro tuʼux kin balikinbaeʼ.
Mix bikʼin kin péeksbil tuʼux yanen.+
7 Chéen Dios jeʼel u salvarkeneʼ, chéen letiʼ jeʼel u beetik u binten utsileʼ.
Dios kun kanáantken, letiʼeʼ bey junpʼéel nuxiʼ tuunich tuʼux kin taʼakikinbaeʼ.+
8 In kaajal, maʼ u xuʼulul a kʼubik a wóoleʼex tiʼ Dios,jeʼekʼabt a puksiʼikʼaleʼex tiʼ letiʼ.+
Letiʼ kun kanáantkoʼon.+ (Séla)
9 Le j-kʼeban máakoʼoboʼ jach maʼatech u xáantal u kuxtaloʼob,mix baʼal u biilal ka confiarnak máak tiʼ letiʼob.+
Wa ka pesartaʼakoʼobeʼ maas aal le iikʼ tiʼ letiʼoboʼ.+
10 Maʼ a tuklikeʼex wa jeʼel u binteʼex utsil wa ka chʼaʼikeʼex baʼax maʼ a tiaʼaleʼexeʼ,maʼ a tuklikeʼex wa jeʼel u binteʼex utsil wa ka wookoleʼexeʼ.
Wa ka ayikʼaltaleʼexeʼ, maʼ a confiareʼex tiʼ le baʼaxoʼob yaanteʼexoʼ.+
11 Kaʼatéen tsʼoʼok in wuʼuyik u yaʼalik Diostiʼ letiʼ u taal le poderoʼ.+
12 Jéeoba Dios, techeʼ ka weʼesik nojoch yaabilaj,+ka boʼotik máak según baʼax u beetmaj.+
Notas
^ Uláakʼ bix u traducirtaʼaleʼ «Tuláakleʼex bey a beetkeʼexoʼ, letiʼeʼ bey junpʼéel pakʼ tsʼoʼok u chʼéebeleʼ, junpʼéel pakʼ taʼaytak u níikil».
