Santiago 3:1-18
3 In sukuʼuneʼex, yaʼab tiʼ le yanoʼob ichileʼexoʼ maʼ unaj u kaʼansajoʼob* teʼ múuchʼuliloʼ, tumen toʼoneʼ k-ojel maas yaj bix ken k-juzgarbil.+
2 Tuláakloʼon k-tʼóochpajal yaʼab u téenel.*+ Wa yaan juntúul máak maʼ tu tʼóochpajal ichil u tʼaaneʼ u kʼáat u yaʼaleʼ perfecto, yéetel jeʼel u páajtal u controlartik tuláakal u wíinklileʼ.
3 Wa k-tsʼáaik u freno le tsíiminoʼob utiaʼal u yuʼubikoʼob k-tʼaanoʼ jeʼel u páajtal xan k-controlartik tuláakal u wíinkliloʼobeʼ.
4 Ilawileʼex xan le barcoʼoboʼ, kex jach nuuktakoʼob yéetel ku túulchʼintaʼaloʼob tumen kʼaʼamkach iikʼoʼobeʼ, chéen yéetel junpʼéel chan guíaeʼ ku páajtal u nuʼuktaʼaloʼob jeʼel tuʼuxak u kʼáat bin le máax nuʼuktikoʼ.
5 Bey túun xanoʼ u yaakʼ wíinikeʼ junpʼéel baʼal chichan yaan tu wíinklil máak, chéen baʼaleʼ jach nojbaʼal u yuʼubikuba kéen tʼaanak. U jaajileʼ tak chéen yéetel junpʼéel chan kʼáakʼeʼ ku páajtal u tʼaʼabal junpʼéel nojoch kʼáax.
6 Bey túunoʼ u yaakʼ wíinikeʼ bey junpʼéel kʼáakʼeʼ.+ U yaakʼ máakeʼ bey junpʼéel yóokʼol kaab chuup yéetel kʼasaʼanileʼ, tumen ku kʼaskúuntik tuláakal u xéexetʼal le wíinkliloʼ+ yéetel ku kʼaskúuntik tuláakal u kuxtal máak. Le aakʼoʼ bey jeʼex u kʼáakʼil le Gehenaoʼ,* ku xuʼulsik tiʼ máak.
7 Wíinikeʼ jeʼel u páajtal u suukbesik tuláakal u jejeláasil tsʼíitsʼik baʼalcheʼobeʼ, chʼíichʼoʼob, baʼalcheʼob ku jíiltikubaʼob yéetel u baʼalcheʼiloʼob kʼáaʼnáab. U jaajileʼ wíinikeʼ tsʼoʼok u beetik lelaʼ.
8 Chéen baʼaleʼ mix juntúul wíinik páajchajak u suukbesik le aakʼ jeʼex u beetik yéetel le baʼalcheʼoboʼ. Lelaʼ maʼ tu páajtal u controlartaʼal yéetel jach ku beetik loob, chuup xan yéetel veneno ku kíimsik máak.+
9 Tu yéeteleʼ k-alabartik Jéeoba le Taataoʼ, chéen baʼaleʼ tu yéetel xaneʼ k-maldecirtik le máaxoʼob «beetaʼanoʼob jeʼex Diosoʼ».+
10 Yéetel u chiʼ máakeʼ ku alabartik yéetel ku maldecirtik u maasil.
In sukuʼuneʼex, maʼ maʼalob ka úuchuk baʼaloʼob beyaʼ.+
11 ¿Máasaʼ tiʼ junpʼéel sayab tuʼux ku jóokʼol chʼujuk jaʼeʼ maʼ tu páajtal xan u jóokʼol kʼáakʼaj jaʼiʼ?
12 In sukuʼuneʼex, ¿máasaʼ maʼ tu páajtal u tʼoʼokol aceitunaʼob tiʼ junkúul higuera mix higoʼob tiʼ junkúul uva?+ Tiʼ le chʼóochʼ jaʼ xanoʼ maʼ tu páajtal u chʼaʼabal chʼujuk jaʼiʼ.
13 ¿Yaan wa máax ichileʼex jach yaan u naʼat yéetel yaʼab baʼax u yojel? Wa yaneʼ unaj u yeʼesik yéetel u kuxtal, yéetel unaj u beetik tuláakal baʼal yéetel jeetsʼelil jeʼex u beetik le máaxoʼob jach tu jaajil yaan u naʼatoʼoboʼ.
14 Chéen baʼaleʼ wa ichil a puksiʼikʼaleʼex ka chʼaʼkʼuxtikeʼex wa máax,+ yéetel yaan u tuukulil baʼateleʼ*+ maʼ a máan a waʼaleʼex jach yaan a naʼateʼex+ mix a waʼalikeʼex baʼax maʼ jaajiʼ.
15 Lelaʼ maʼ letiʼe naʼat ku taal teʼ kaʼanoʼ, baʼaxeʼ junpʼéel luʼumkabil naʼat,+ u naʼat baʼalcheʼob, u naʼat demonioʼob.
16 Tumen jeʼel tuʼuxak yaan kʼuuxilil yéetel u tuukulil baʼateleʼ* mix baʼal ku beetaʼal jeʼex unajeʼ yéetel ku kʼastal tuláakal baʼaliʼ.+
17 Chéen baʼaleʼ le naʼat ku taal teʼ kaʼanoʼ yáaxeʼ ku beetik u yantal tiʼ máak junpʼéel puksiʼikʼal limpio,+ ku tsʼoʼokoleʼ ku taasik jeetsʼelil,+ ku beetik u yantal tiʼ máak junpʼéel utsul puksiʼikʼal,+ junpʼéel puksiʼikʼal séeb u yuʼubik tʼaan, nojoch u chʼaʼ óotsilal. Le naʼatoʼ ku taasik baʼaloʼob maʼalobtak,+ le máax yaantiʼ le naʼataʼ mix máak jelaʼan u paktik+ yéetel maʼ j-kaʼapʼéel ichiʼ.+
18 U beetaʼal baʼax maʼalob tu táan Dioseʼ ku yáantaj utiaʼal u biskuba máak maʼalob yéetel u maasil,+ yéetel ku yáantaj utiaʼal u yantal jeetsʼelil.+
Notas
^ Wa «maʼ unaj u beetik u j-kaʼansajiloʼob».
^ Wa «Yaʼab u téenel k-beetik baʼax maʼ maʼalobiʼ».
^ Lelaʼ junpʼéel lugar tuʼux ku tóokaʼal kaʼach basura tu joʼokajil Jerusalén.
^ Uláakʼ bix u traducirtaʼaleʼ «yaanteʼex kʼaakʼas tsʼíibolaleʼ».
^ Uláakʼ bix u traducirtaʼaleʼ «kʼaakʼas tsʼíibolaleʼ».
