Tukulte: Kareneʼ tsʼoʼok diez minutos kʼuchuk tiʼ junpʼéel fiesta, chéen ka tu yuʼubaj u yaʼalaʼaltiʼ:

Ken paakatnak paachileʼ ku yilkeʼ Jessica, u amiga tʼanik yéetel u machmaj kaʼapʼéel cervezaʼob. Jessicaeʼ ku tsʼáaik junpʼéel tiʼ Kareniʼ yéetel ku yaʼaliktiʼ: «Maʼ paalechiʼ. Jeʼel u páajtal a divertirkaba junpʼíiteʼ».

Kareneʼ maʼ taak u yukʼik cervezaiʼ tumen menor de edad, chéen baʼaleʼ maʼ xan u kʼáat u beet u tuklik u amiga wa maʼatech u divertirkubaiʼ. Tsʼoʼoleʼ Jessicaeʼ maʼ kʼasaʼaniʼ, le oʼolal wa letiʼ ku yukʼikeʼ, u kʼáat u yaʼaleʼ maʼ kʼaas u yuʼukʼuliʼ. Kareneʼ ku tuklik: «Chéen junpʼéel cerveza, maʼ drogaiʼ».

Wa teech Kareneʼ, ¿baʼax jeʼel a beetkeʼ?

Utiaʼal a chʼaʼtuklik tubeel baʼax ken a beet teʼ súutukiloʼob beyoʼ unaj u kʼaʼajaltech máaxechiʼ yéetel baʼaxoʼob kʼaʼabéet a beetik. Lelaʼ jeʼel u yáantkech a kanáantabaeʼ yéetel jeʼel yáantkech utiaʼal maʼ a controlartaʼal tumen u maasileʼ (1 Corintoiloʼob 9:26, 27).

¿Baʼax jeʼel u yáantkech a beet baʼax maʼalobeʼ? A tuukul tiʼ le preguntaʼob ku segueroʼ.

Wa a wojel baʼaxoʼob ku páajtal a beetik yéetel baʼax jatsʼuts modosil yaantecheʼ lelaʼ jeʼel u yáantkech utiaʼal u yantaltech confianzaeʼ.

MÁAX BEET BEYOʼ: Apóstol Pabloeʼ tu yaʼalaj: «Maʼ jach in wojel tʼaaniʼ, baʼaleʼ yaʼab baʼaxoʼob in wojel» (2 Corintoiloʼob 11:5, 6). Tumen jach u yojel baʼax ku yaʼalik le Kiliʼich Tsʼíiboʼoboʼ, maʼ sajakchaj kaʼ joʼopʼ u yaʼalaʼal baʼal tiʼ. Maʼ tu chaʼaj u lúuʼsaʼal u yóol yoʼolal le baʼaxoʼob maʼ jaajtak aʼalaʼab tu contraoʼ (2 Corintoiloʼob 10:10).

XAKʼALT A TUUKUL: Tsʼíibt junpʼéel baʼax jach a wojel a beete.

Beoraaʼ tsʼíib le modos maas ka weʼesikoʼ. (Maʼ xaaneʼ jach utsech, uts ta tʼaan a síik baʼax yaantech, confiablech wa puntualech).

Jeʼex junpʼéel cadena séeb jeʼel u tʼóokol teʼ tuʼux maʼ chúukaʼan u aceroiloʼ, teech xaneʼ jeʼel a tuʼubsik máaxecheʼ yéetel baʼaxoʼob unaj a beetik wa ka chaʼik a controlartaʼal tumen le baʼaxoʼob maʼ tu páajtal a beetkoʼ.

MÁAX BEET BEYOʼ: Pabloeʼ u yojel baʼaxoʼob maʼ tu páajtal u beetik. Letiʼeʼ tu yaʼalaj: «U jaajileʼ jach ku kiʼimaktal u yóol in puksiʼikʼal yoʼolal u ley Dios, baʼaleʼ kin tsʼáaik cuentaeʼ tin wíinklileʼ yaan uláakʼ ley ku baʼateʼel tu contra le ley yaan tin tuukuloʼ, yéetel ku bisken bey palitsil tiʼ u leyil le kʼeban[oʼ]» (Romailoʼob 7:22, 23).

XAKʼALT A TUUKUL: ¿Baʼax unaj a kanik a controlart ichil a kuxtal?

¿Máasaʼ maʼ ta naʼakal tiʼ junpʼéel taxi, tsʼoʼoleʼ ka waʼalik tiʼ le chofer ka u tsʼáa vueltas tak ken láaj xuʼupuk le gasolina yaan tiʼoʼ? Leloʼ chéen kunel yéetel koʼoj ken u tojolt tech.

¿Baʼax ku kaʼansiktoʼon lelaʼ? Wa ka chʼaʼtuklik baʼax ken a beeteʼ, maʼ ken a tsʼáa vueltas chéen minaʼan u cuentail. Baʼaxeʼ a wojel tuʼux kan bin yéetel bix kan kʼuchliʼ.

MÁAX BEET BEYOʼ: Pabloeʼ tu yaʼalaj: «Le bix táan in wáalkaboʼ maʼ chéen minaʼan u cuentailiʼ» (1 Corintoiloʼob 9:26). Pabloeʼ maʼ chéen tu beetaj baʼaloʼob minaʼan u cuentailiʼ, baʼaxeʼ tu chʼaʼtuklaj baʼax ken u beete yéetel tu tsʼáaj u yóol u tsʼoʼokbese (Filiposiloʼob 3:12-14).

XAKʼALT A TUUKUL: Beoraaʼ tsʼíibt óoxpʼéel baʼaloʼob a kʼáat a beet teʼ añoaʼ.

Wa maʼ seguroech tiʼ baʼax ka creertikeʼ yaan u kaʼapʼéeltal a tuukul. Yaan a wilik a beetik chéen baʼax ku beetik a amigos, jeʼex le camaleón ku kʼexik u color según le tuʼux yanoʼ. Le máaxoʼob beetik beyoʼ ku tuʼubultiʼob jach máaxoʼobiʼ yéetel baʼaxoʼob ku creertikoʼob.

Chéen baʼaleʼ wa ka beetik baʼax maʼalobeʼ, kex jeʼel baʼaxak ka beetaʼak tumen u maasileʼ, ka weʼesik maʼ tubaʼantech jach máaxechiʼ yéetel baʼaxoʼob ka creertik.

MÁAX BEET BEYOʼ: Maʼ xaaneʼ profeta Danieleʼ, jach paal ka luʼsaʼab ichil u familia. Kex beyoʼ tu chʼaʼtuklaj u beetik baʼax ku yaʼalik u Ley Dios (Daniel 1:8). Maʼ tuʼubtiʼ jach máaxiʼ mix baʼax ku creertikiʼ.

XAKʼALT A TUUKUL: ¿Baʼaxoʼob ka creertik? ¿Ka creertik wa Dios? ¿Baʼaxten? ¿Baʼax áantkech a creert jach tu jaajil yaan?

A tuklikeʼ, ¿ku yáantkech wa le a beetik baʼax ku yaʼalik Diosoʼ? ¿Baʼaxten?

¿A kʼáat wa ka bisaʼakech jeʼex u bisaʼal junpʼéel chan leʼ tumen le iikʼoʼ wa a kʼáat a beetaba jeʼex junkúul cheʼ maʼ tu péeksaʼal kex jach kʼaʼam le iikʼoʼ? Wa a kʼáat a beetaba jeʼex le cheʼoʼ, ilawil maʼ a tuʼubsik jach máaxechiʼ. Lelaʼ le kun áantkech a núuk le preguntaaʼ: ¿Máaxen jach tu jaajil?