Tukulte: Sandra yéetel Marcoseʼ tsʼoʼok dos meses káajak u biskubaʼob, letiʼeʼ ku yuʼubik bey jach úuch u kʼaj óolt Marcoseʼ. Bul kʼiin táan u paklan túuxtikoʼob mensaje tu celularoʼob yéetel ku tʼankubaʼob, tak táanil tiʼ u tʼaan cada juntúuleʼ u paklan yojloʼob baʼax ken u yaʼaloʼob. Chéen baʼaleʼ Marcos beoraaʼ maʼ chéen u kʼáat tsikbaliʼ.

Ichil le kaʼapʼéel mes tsʼoʼok u máanoʼ chéen ku machik u kʼaboʼob yéetel chéen wa jaytéen tsʼoʼok u tsʼuʼutsʼkubaʼob. Sandraeʼ maʼ u kʼáat chital tu yéeteliʼ, pero maʼ u kʼáat ka xuʼuluk u biskubaʼobiʼ, tumen uts tu tʼaan bix u tratartaʼal. Le oʼolal ku tuklik: «Si teneʼ uts tin wich yéetel letiʼeʼ uts tu yichen».

Wa yaantech u jaʼabil utiaʼal u káajal a biskaba yéetel wa máaxeʼ, ¿baʼax jeʼel a beetik wa ka úuchuktech beyoʼ?

Wa ka pulkaba desde tu kaʼanlil junkúul cheʼ tumen ka tuklik jeʼel a volar jeʼex juntúul chʼíichʼeʼ, yaan u bintech kʼaasil. Lelaʼ bey xan jeʼel u yúuchul wa maʼ ta beetik u cuentail baʼax ku yaʼalik u ley Dioseʼ, junpʼéeleʼ ku yaʼalik: «Náachkuntabaʼex tiʼ le núupkʼebanoʼ» (1 Tesalonicailoʼob 4:3).

¿Baʼax jeʼel u yúuchul wa maʼ ta beetik le baʼax ku yaʼalikoʼ? Le Bibliaoʼ ku yaʼalik: «Le máax maʼ tu xuʼulul u núupkʼebantaleʼ ku kʼebantal tu contra u wíinklil» (1 Corintoiloʼob 6:18). ¿Baʼax u kʼáat u yaʼal lelaʼ?

 Tsʼoʼok u yilaʼaleʼ le táankelem paalaloʼob ku núupchitaloʼob kex maʼ tsʼokaʼan u beeloʼobeʼ tsʼoʼok u muʼyajtikoʼob junpʼéel tiʼ le baʼaloʼobaʼ:

• KU YAATAL U YÓOLOʼOB. Yaʼab tiʼ le táankelem paalaloʼob anchaj baʼax u yiloʼob yéetel wa máax kex maʼ tsʼokaʼan u beeloʼoboʼ arrepentirnajoʼob úuchik u beetkoʼob.

• KU XUʼULUL U CONFIAROʼOB. Ken tsʼoʼokok u núupchitaloʼobeʼ ku joʼopʼol u tuklikoʼob máax wal yéetel uláakʼ tsʼoʼok u yantal baʼax u yil u novio wa u novia.

• KU PʼATKUBAʼOB. Yaʼab koʼoleloʼobeʼ maas ku tsʼíiboltkoʼob ka kanáantaʼakoʼob, maʼ ka u aprovechartuba máak tiʼobiʼ. Tsʼoʼoleʼ yaʼab xiʼipaloʼobeʼ ku xuʼulul u biskubaʼob yéetel le x-chʼúupaloʼob séeb u yóotkoʼob núupchital tu yéeteloʼoboʼ.

• Baʼax ku kaʼansiktech: Wa ka núupchital yéetel wa máax táanil tiʼ u tsʼoʼokol a beeleʼ, ka kʼaskúuntik a kuxtal (Romailoʼob 1:24). Kanáant a wíinklil, le baʼax maas koʼoj yaantechoʼ.

Chʼaʼtukult maʼ a núupchital yéetel mix máak táanil tiʼ u tsʼoʼokol a beel (1 Tesalonicailoʼob 4:3). Beyoʼ le ken tsʼoʼokok a beeleʼ, maʼ kun yaatal a wóol, yaan a confiar tiʼ a núup yéetel maʼ kun taaktal a pʼatik jeʼex u beetik le máaxoʼob ku núupchitaloʼob táanil tiʼ u tsʼoʼokol u beeloʼoboʼ (Proverbios 7:22, 23; 1 Corintoiloʼob 7:3).

• Wa u yaabiltmech wa máaxeʼ, ¿máasaʼ maʼ ken u beettech loob mix u yaatal a wóol?

• Wa jach tu jaajil u yaabiltmech wa máaxeʼ, ¿máasaʼ maʼ ken u túulchʼintech a beet baʼax maʼ uts tu tʼaan Diosiʼ? (Hebreoʼob 13:4).