Le kʼaabaʼ Betel ich hebreooʼ, u kʼáat u yaʼal ‹u yotoch Dios› (Génesis 28:17, 19). Lelaʼ junpʼéel jach maʼalob kʼaabaʼ ku tsʼaʼabal tiʼ le edificioʼob yaan tiʼ u j-jaajkunajoʼob Jéeoba tiʼ tuláakal yóokʼol kaaboʼ, yéetel tiʼ u taal le nuʼuktaj bey xan le baʼaxoʼob kʼaʼabéet utiaʼal le kʼaʼaytajoʼ. Le Cuerpo Gobernante yaan tu estadoil Nueva Yorkoʼ (Estados Unidos), letiʼ nuʼuktik le meyaj ku beetaʼal tu jejeláasil najiloʼob Betel yaan way Luʼumoʼ. Le sukuʼunoʼob yéetel le kiikoʼob ku meyajoʼoboʼ kʼaj óolaʼanoʼob bey familia Betel. Beyoʼob jach junpʼéel familiaeʼ, tiʼ kajaʼanoʼobiʼ, tiʼ ku múul meyajoʼobiʼ, tiʼ ku jaanloʼobiʼ bey xan tiʼ ku múul xokikoʼob le Bibliaoʼ (Salmo 133:1).

Junpʼéel tuʼux jach maʼalob utiaʼal u meyajtaʼal Dios. Tiʼ cada Beteleʼ yaan sukuʼunoʼob yéetel kiikoʼob jach u tsʼaamaj u yóol u beetoʼob baʼax ku yaʼalik Dios yéetel ku yáantajoʼob utiaʼal u maas kʼaʼaytaʼal le Reinooʼ (Mateo 6:33). Mix juntúul tiʼ letiʼob ku boʼotaʼaliʼ, baʼaleʼ tiʼ tuláakal ku tsʼaʼabal tuʼux u kajtal, u janal yéetel ku tsʼaʼabaltiʼob junpʼéel chan áantaj utiaʼal le baʼaxoʼob kun kʼaʼabéetchajaltiʼoboʼ. Cada juntúuleʼ tsʼaʼan junpʼéel meyaj u beete: yanoʼobeʼ tiʼ oficinaʼob ku meyajoʼob, uláakʼoʼobeʼ ku beetkoʼob janal; yanoʼobeʼ ku meyajoʼob imprenta wa teʼ tuʼuxoʼob ku beetaʼal le libroʼoboʼ; uláakʼoʼob xaneʼ ku pʼatkoʼob limpioil le cuartoʼoboʼ, ku pʼoʼ nookʼoʼob, ku yutskíintikoʼob le baʼax ku kʼastaloʼ, wa uláakʼ baʼaloʼob beyaʼ.

Junpʼéel tuʼux yaʼab u yúuchul meyaj utiaʼal u maas kʼaʼaytaʼal le Reinooʼ. Le meyaj ku beetaʼal tiʼ cada junpʼéel u najil Beteloʼ jach yaan baʼax u yil yéetel u maas kʼaʼaytaʼal le baʼax ku yaʼalik le Biblia tiʼ le bukaʼaj máakoʼob ku páajtaloʼ. Le folletoaʼ beetaʼab utiaʼal leloʼ. Tsʼíibtaʼab yéetel u nuʼuktaj le Cuerpo Gobernanteoʼ, tsʼoʼoleʼ túuxtaʼab tiʼ computadora tiʼ u cientosil sukuʼunoʼob yanoʼob tuláakal yóokʼol kaab utiaʼal ka u sutoʼob ichil uláakʼ idiomaʼob, yéetel imprimirtaʼab tu najiloʼob Betel tiʼ le prensaʼob jach séeb u meyajoʼoboʼ, ka tsʼoʼok túuneʼ túuxtaʼab tiʼ le maas tiʼ ciento diez mil múuchʼuliloʼoboʼ. Tuláakal le meyaj ku beetik le betelitaʼoboʼ ku yáantaj utiaʼal u maas kʼaʼaytaʼal le maʼalob péektsiloʼ, le meyaj maas unaj u séeb beetaʼaloʼ (Marcos 13:10).

• ¿Máaxoʼob ku meyajoʼob Betel, yéetel baʼaxoʼob ku tsʼaʼabaltiʼob?

• ¿Baʼax meyajil ku séeb beetaʼal yéetel u yáantaj le sukuʼunoʼob ku meyajoʼob tiʼ cada junpʼéel u najiloʼob Beteloʼ?