Jesuseʼ láayliʼ tiaʼan teʼ cuarto yaan kaʼanal, le tuʼux tu kʼiinbesoʼob le Pascua yéetel u apostoloʼoboʼ, letiʼeʼ tu yaʼalajtiʼob: «Maʼ u péek u yóol a puksiʼikʼaleʼex. Tsʼáa a fejeʼex tiʼ Dios yéetel tsʼáa a fejeʼex xan tiʼ teen» (Juan 13:36; 14:1).

Jesuseʼ tu yaʼalaj tiʼ u apostoloʼob maʼ u chiʼichnaktaloʼob ken xiʼik, tu yaʼalajtiʼob: «Tu yotoch in Taataeʼ yaʼab kúuchiloʼob yaan utiaʼal u pʼáatal máakiʼ. [...] Wa xan kin chʼaʼjoʼoltik in bin yéetel in preparartikteʼex junpʼéel kúuchileʼ, yaan in suut, yéetel teen ken in kʼameʼex teʼ najoʼ, beyoʼ le tuʼux kin antaloʼ tiʼ xan kan antaleʼexiʼ». Baʼaleʼ le apostoloʼoboʼ maʼ tu naʼatkoʼob wa táan u tʼaan tiʼ u bin teʼ kaʼanoʼ. Le oʼolal Tomaseʼ tu yaʼalaj: «Yuumtsil, maʼ k-ojel tuʼux ka biniʼ. ¿Bix túun a waʼalik k-kʼaj óol u bejil?» (Juan 14:2-5).

Jesuseʼ tu núukaj: «Teen le bejoʼ, teen le jaajoʼ yéetel teen le kuxtaloʼ». Chéen wa ku kʼamik máak Jesús bey xan u kaʼansajoʼob yéetel u kuxtal jeʼex kuxlajikoʼ jeʼel u páajtal u yokol tu yotoch u Taataeʼ. Jesuseʼ ku yaʼalik: «Mix máak ku náatsʼal tu yiknal le Taata wa maʼ tin woʼolaloʼ» (Juan 14:6).

Felipe xaneʼ tu yaʼalaj: «Yuumtsil, eʼestoʼon le Taataoʼ, yéetel leloʼ yaan». Maʼ xaaneʼ Felipeeʼ u kʼáat ka eʼesaʼaktiʼob Dios, jeʼex úuchik u yilkoʼob Moisés, Elías yéetel Isaíaseʼ. Baʼaleʼ le apostoloʼoboʼ maas nojoch máax yaan tu yiknaloʼob ke le profetaʼobaʼ. Jesuseʼ tu yaʼalajtiʼob: «Felipe, tsʼoʼok u xáantal yanaken ta wéeteleʼex, ¿kex beyoʼ maʼ kʼuchkech a kʼaj óolteniʼ? Le máax tsʼoʼok u yilkeneʼ tsʼoʼok xan u yilik le Taataoʼ». Jesuseʼ jach maʼalob bix u yeʼesik u modos u Taata, le oʼolal le máaxoʼob il baʼaxoʼob tu beetoʼ bey jeʼex ka u yiloʼob le Taataoʼ. Baʼaleʼ le Taataoʼ maas nojoch tiʼ le Hijooʼ, lelaʼ bey úuchik u yaʼalik Jesús: «Le baʼaxoʼob kin waʼalikteʼexoʼ maʼ chéen tu juunal in wóol kin waʼalikiʼ» (Juan 14:8-10). Le apostoloʼoboʼ tu tsʼáajoʼob cuentaeʼ Jesuseʼ tu tsʼáaj u nojbeʼenil tiʼ u Taata yoʼolal le baʼaxoʼob tu kaʼansoʼ.

Le apostoloʼoboʼ tsʼoʼok u yilkoʼob u beetik Jesús nukuch milagroʼob yéetel tsʼoʼok u yuʼubikoʼob u kʼaʼaytik u maʼalob péektsilil u Reino Dios. Beoraaʼ Jesuseʼ tu yaʼalajtiʼob: «Le máax ku tsʼáaik u fe tiʼ teneʼ, yaan xan u beetik le meyajoʼob kin beetkoʼ;  yéetel yaan u beetik maas nukuch meyajoʼob ke le jeʼeloʼobaʼ» (Juan 14:12). Jesuseʼ maʼ táan u yaʼalik wa yaan u beetkoʼob maas nukuch milagroʼob tiʼ le tu beetaj letiʼoʼ. Baʼaxeʼ letiʼobeʼ yaan u maas xáantal táan u kʼaʼaytajoʼob, yaan u beetkoʼob tiʼ maas yaʼab kaajoʼob yéetel tiʼ maas yaʼab máakoʼob.

Kex xiʼik Jesuseʼ maʼ ken u pʼatoʼob, letiʼeʼ tu yaʼalajtiʼob: «Wa ka kʼáatkeʼex wa baʼax tin kʼaabaʼeʼ, teneʼ yaan in beetik». Tsʼoʼoleʼ tu yaʼalajtiʼob: «Teneʼ yaan in kʼáatik tiʼ le Taataoʼ, letiʼ túuneʼ yaan u túuxtikteʼex uláakʼ áantaj utiaʼal ka pʼáatak mantatsʼ ta wéeteleʼex; lelaʼ letiʼe kiliʼich muukʼ ku kaʼansik u jaajiloʼ» (Juan 14:14, 16, 17). Letiʼeʼ tu yaʼalajtiʼobeʼ yaan u túuxtik le kiliʼich muukʼ utiaʼal áantkoʼoboʼ. Lelaʼ bey úuchik tu kʼiinil le Pentecostesoʼ.

Jesuseʼ tu yaʼalaj: «Ichil junpʼíit kʼiin maaseʼ, le yóokʼol kaaboʼ maʼ ken u yilen tu kaʼatéen. Baʼaleʼ teʼexeʼ yaan a wilkeneʼex tumen teneʼ kuxaʼanen, yéetel teʼexeʼ yaan a kuxtaleʼex» (Juan 14:19). Maʼ chéen ken u yiloʼob Jesús ken u chíikbesuba tiʼ letiʼob le ken kaʼa kuxlakoʼoʼ, baʼaxeʼ letiʼobeʼ yaan u kaʼa kuxkíintaʼaloʼob utiaʼal u yantaloʼob tu yéetel teʼ kaʼan, jeʼex le angeloʼoboʼ.

Beoraaʼ Jesuseʼ tu yaʼalaj junpʼéel baʼax jaaj: «Le máax ku kʼamik yéetel ku beetik le baʼaxoʼob kin waʼalikoʼ letiʼe máax u yaabiltmenoʼ. Le máax u yaabiltmen xanoʼ yaan u yaabiltaʼal tumen in Taata, teen xaneʼ yaan in yaabiltik yéetel yaan in chaʼik u kʼaj óoltiken tubeel». Le apóstol ku kʼaabaʼtik Judas Tadeooʼ, tu kʼáataj: «Yuumtsil, ¿baʼaxten ka waʼalik yaan a chaʼik k-kʼaj óoltikech tubeel, baʼaleʼ maʼ ken a chaʼa u kʼaj óoltikech le yóokʼol kaaboʼ?». Jesuseʼ tu núukajtiʼ: «Wa yaan máax u yaabiltmeneʼ yaan u beetik baʼax kin waʼalik, yéetel yaan u yaabiltaʼal tumen in Taata. Toʼon túuneʼ yaan k-taal tu yiknal yéetel yaan k-pʼáatal kajtal tu yéetel. Le máax maʼ u yaabiltmeneʼ maʼ tu beetik le baʼax kin waʼalikoʼ» (Juan 14:21-24). Le yóokʼol kaaboʼ maʼ u yojel wa Jesuseʼ letiʼ le bej, le jaaj yéetel le kuxtal, jeʼex kʼaj óolaʼanil tumen le disipuloʼoboʼ.

Jesuseʼ táan u bin, le oʼolaleʼ ¿bix kun kʼaʼajsbil le baʼaxoʼob tu kaʼansaj tumen u disipuloʼoboʼ? Jesuseʼ ku yaʼalik: «Le kiliʼich muukʼ ken u túuxt le Taata tin kʼaabaʼoʼ, letiʼ kun kaʼansikteʼex tuláakal baʼal yéetel letiʼ kun beetik u kʼaʼajalteʼex tuláakal le baʼaxoʼob tsʼoʼok in waʼalikteʼexoʼ». Le apostoloʼoboʼ tsʼoʼok u yilkoʼob le nukuch meyajoʼob ku beetik le kiliʼich muukʼoʼ, le oʼolal líikʼ u yóoloʼob ka tu yuʼuboʼob. Jesuseʼ tu yaʼalaj xan tiʼob: «Kin pʼatikteʼex le jeetsʼeliloʼ, kin tsʼáaikteʼex in jeetsʼelil. [...] Maʼ a chaʼikeʼex u péek u yóol a puksiʼikʼaleʼex mix u chʼaʼik saajkil» (Juan 14:26, 27). Le disipuloʼoboʼ maʼ unaj u sajaktaloʼobiʼ, tumen yaan u nuʼuktaʼaloʼob yéetel u kanáantaʼaloʼob tumen u Taata Jesús.

Maʼ kun xáantaleʼ yaan u yilkoʼob bix kun kanáantbiloʼob tumen Dios. Jesuseʼ tu yaʼalajtiʼob: «Táan u taal u gobernanteil le yóokʼol kaaboʼ. Letiʼeʼ maʼ tu páajtal u tsʼáaiken yáanal u páajtalil» (Juan 14:30). Le Kʼaasilbaʼaloʼ páajchaj u yokol tiʼ Judas. Baʼaleʼ tiʼ Jesuseʼ minaʼan mix junpʼéel kʼaas utiaʼal u meyaj tiʼ Satanás utiaʼal ka u beet u tsʼáaikuba tu contra Dios. Mix tu páajtal u beetik u pʼáatal kimen Jesús utiaʼal mantatsʼ. ¿Baʼaxten? Jesuseʼ ku yaʼalik: «Jeʼex úuchik u yaʼalikten le Taata ka in beetoʼ bey xan in beetkoʼ». Letiʼeʼ u yojel yaan u kaʼa kuxkíintaʼal tumen u Taata (Juan 14:31).