Jesuseʼ tsʼoʼok u chan máan kʼiin yanak «tuláakʼ u tséel le Jordanoʼ» (Juan 10:40). Beoraaʼ letiʼeʼ bin tu kaajil Jerusalén.

Baʼaleʼ maʼ chéen tu juunal biniʼ. Bin xan u disipuloʼob yéetel uláakʼ «yaʼabkach máakoʼob», tak le máaxoʼob ku cobrartikoʼob impuestoʼob yéetel le j-kʼeban máakoʼoboʼ (Lucas 14:25; 15:1). Le fariseoʼob yéetel le escribaʼob aʼalik maʼ maʼalob baʼax ku beetik Jesusoʼ tiaʼanoʼob xaniʼ. Jach yaʼab baʼax yaan u tukloʼob yoʼolal u kettʼaanil le taman saʼatoʼ, le paal tu xuʼuxupaj u herenciaoʼ bey xan tiʼ le ayikʼal máak yéetel Lázarooʼ (Lucas 15:2; 16:14).

Maʼ xaaneʼ yoʼolal le bix úuchik u pʼaʼastaʼal Jesús tumen le máakoʼoboʼ tu kaʼa aʼalaj tiʼ u disipuloʼob jujunpʼéel baʼaxoʼob tsʼoʼok u yáax kaʼansik tu luʼumil Galilea.

Tu yaʼalaj: «Maʼ tu páajtal u beetaʼal mix baʼal utiaʼal maʼ u beetaʼal u tʼóochpajal mix máak. Baʼaleʼ, ¡óotsil le máax ku beetik u tʼóochpajal máakoʼ! [...] Jach ilawileʼex baʼax ka beetkeʼex. Wa a sukuʼun ku kʼebantal ta contraeʼ, beet u yilik maʼ maʼalob le baʼax tu beetoʼ; wa ku kʼexik u tuukuleʼ, perdonarte» (Lucas 17:1-4). Lelaʼ maʼ xaaneʼ tu beetaj u kʼaʼajal tiʼ Pedro le ka tu kʼáataj wa chéen siete u téenel unaj u perdonar máakoʼ (Mateo 18:21).

¿Jeʼel wa u páajtal u beetik le disipuloʼob lelaʼ? Le ka tu yaʼaloʼob tiʼ Jesús «beet u maas nojochtal k-fe», letiʼeʼ tu yaʼalajtiʼob: «Wa a fejeʼex bukaʼaj jeʼex junpʼéel u chan neekʼ mostazaeʼ jeʼel u páajtal a waʼalikeʼex tiʼ le nuxiʼ cheʼaʼ: ‹Jokaba ka a pakʼaba teʼ kʼáaʼnáaboʼ›, letiʼ túuneʼ yaan u beetik» (Lucas 17:5, 6). Jach beyoʼ, kex chichan u fe máakeʼ jeʼel u páajtal u beetik baʼaloʼob nuuktakeʼ.

Jesuseʼ seguernaj u kaʼansik u kʼaʼabéetil u yeʼesik máak kabal óolal, maʼ u tuklik wa maas maʼalob yanil tiʼ u maasiliʼ. Tu yaʼalaj tiʼ u apostoloʼob: «¿Máax tiʼ teʼex yaan juntúul u palitsil táan u meyaj ich kʼáax wa táan u kanan taman, ku yaʼaliktiʼ ken suunak tu meyaj: ‹Koʼoten way tu séebaʼanileʼ ka kulakech janal›? Baʼaxeʼ ¿máasaʼ ku yaʼaliktiʼ: ‹Beet wa baʼax utiaʼal in cenarte, yéetel tsʼáa a mandil ka a jáal in woʼoch; tsʼoʼoleʼ páaʼt u tsʼoʼokol in janal, ken tsʼoʼokkeʼ techeʼ jeʼel u páajtal a jaanleʼ›? ¿Máasaʼ maʼ ken u tsʼáa u diosboʼotikil tiʼ u palitsil úuchik u beetik tuláakal le baʼaxoʼob aʼalaʼan ka u beetoʼ? Teʼex xaneʼ ken tsʼoʼokok a beetkeʼex tuláakal le baʼax aʼalaʼanteʼexoʼ, aʼaleʼex: ‹Toʼoneʼ palitsiloʼon mix baʼal k-biilal. Le baʼax tsʼoʼok k-beetkoʼ letiʼe baʼax unaj k-beetik kaʼachoʼ›» (Lucas 17:7-10).

Tuláakal máax meyajtik Dioseʼ unaj u naʼatik u kʼaʼabéetil u tsʼáaik táanil u meyajtik. Tsʼoʼoleʼ tuláakal unaj u tuukul tiʼ le jatsʼuts páajtalil yaantiʼ utiaʼal u adorartik Dios ichil u kaajaloʼ.

Maʼ sáam tiʼ leloʼ, kʼuch juntúul máak túuxtaʼan tumen María, u kiik Lázaro, yéetel Marta, u yíitsʼin. Letiʼobeʼ tiʼ kajaʼanoʼob Betania tiʼ u luʼumil Judeaeʼ. Le máakoʼ tu yaʼalaj: «Yuumtsil, ¡ile!, le máax jach a yaabiltmeʼ kʼojaʼan» (Juan 11:1-3).

Ka tu yojéeltaj Jesús kʼojaʼan Lázaro, u amigoeʼ, maʼ yaachaj u yóoliʼ. Baʼaxeʼ tu yaʼalaj: «Le kʼojaʼanilaʼ maʼ utiaʼal ka u kíimsiʼ, baʼaxeʼ utiaʼal ka tsʼaʼabak nojbeʼenil tiʼ Dios, utiaʼal beyoʼ ka nojbeʼenkúuntaʼak u Paal Dios tu yoʼolal lelaʼ». Letiʼeʼ pʼáat yéetel u disipuloʼob uláakʼ kaʼapʼéel kʼiin teʼeloʼ, ka tsʼoʼokeʼ tu yaʼalajtiʼob: «Koʼoneʼex Judea tu kaʼatéen». Le disipuloʼoboʼ tu yaʼaloʼobtiʼ: «J-Kaʼansaj, maʼ sen úucheʼ óolak muruxtuntaʼakech tumen u kajnáaliloʼob Judea, ¿yaan wa túun a kaʼa biniʼ?» (Juan 11:4, 7, 8).

Jesuseʼ tu núukajtiʼob: «Doce horas ku sáasilkunaj le kʼiinoʼ, ¿máasaʼ? Wa yaan máax ku máan tu sáasilil le kʼiinoʼ maʼ tu tʼóochpajal tiʼ mix baʼal, tumen ku yilik le sáasil yaan teʼ yóokʼol kaabaʼ. Wa yaan máax ku máan de áakʼabeʼ, ku tʼóochpajal tumen minaʼan mix baʼal utiaʼal sáasilkuntik u beel» (Juan 11:9, 10). Maʼ xaaneʼ Jesuseʼ tu yóotaj  u yaʼaleʼ le tiempo tsʼaʼantiʼ tumen Dios utiaʼal u beetik u meyajoʼ maʼ tsʼoʼokkiʼ. Le oʼolal unaj u tsʼáaik u yóol u beet le bukaʼaj ku páajtal ichil junpʼíit tiempo pʼaatloʼ.

Jesuseʼ tu yaʼalajtiʼob: «K-amigo Lázaroeʼ táan u wenel, baʼaleʼ teneʼ táan in bin teʼeloʼ utiaʼal ka in wajse». Maʼ xaaneʼ tu tukloʼobeʼ Lázaroeʼ jach táan u wenel yéetel táan u jeʼelel, le oʼolal tu yaʼaloʼobtiʼ: «Yuumtsil, wa táan u weenleʼ jeʼel u yutstaleʼ». Jesús túuneʼ tu yaʼalajtiʼob u jaajil: «Lázaroeʼ tsʼoʼok u kíimil. [...] Koʼoneʼex teʼ tuʼux yanoʼ» (Juan 11:11-15).

Kex u yojel Tomás jeʼel u kíimsaʼaloʼob xan Judeaeʼ tu yaʼalaj tiʼ u maasil disipuloʼoboʼ: «Koʼoneʼex túun xaniʼ, utiaʼal ka kíimkoʼon tu yéetel» (Juan 11:16).