¿Baʼaxten casi maʼ tu yeʼesaʼal respeto tiʼ u maasil?
BAʼAXTEN IMPORTANTE KA K-RESPETART U MAASIL
U yeʼesaʼal respeto tiʼ u maasileʼ ku yáantaj utiaʼal maʼ u maas nojochtal junpʼéel problema.
-
Le Bibliaoʼ ku yaʼalik: «Utsul tʼaaneʼ ku beetik u xuʼulul kʼuuxil, pero tʼaan yaj u yuʼubaʼaleʼ ku beetik u maas pʼuʼujul máak» (Proverbios 15:1). Wa maʼ ta weʼesik respeto kéen tʼaanakech wa kéen a beet wa baʼaxeʼ mix junpʼéel utsil ku taasik, baʼaxeʼ chéen ku beetik u maas nojochtal le problemaoʼ.
-
Jesúseʼ tu yaʼalaj: «Le baʼax ku jóokʼol tu chiʼ máakoʼ ku yeʼesik baʼax yaan tu puksiʼikʼal» (Mateo 12:34). Wa maʼ k-eʼesik respeto tiʼ le máaxoʼob jelaʼan u kuxtaloʼob, yaanal u razaʼob, baʼaxoʼob suukaʼan u beetkoʼob wa yaanal luʼumil u taaloʼobeʼ u kʼáat u yaʼaleʼ yaan baʼax kʼaas k-uʼuyik tu yoʼolaloʼob. Wa bey u yúuchloʼ kʼaʼabéet k-séeb kʼexik bix k-tuukul.
Junpʼéel encuesta beetaʼab tiʼ maas tiʼ 32,000 máakoʼob ku taaloʼob tiʼ 28 paísoʼobeʼ, u 65% tu yaʼaloʼobeʼ tsʼoʼok u pʼáatal maʼ tu yeʼesaʼal respeto.
BAʼAX JEʼEL U PÁAJTAL A BEETKEʼ
Kéen tsikbalnakech yéetel wa máaxeʼ eʼes respeto kex maʼ igual a tuukul tu yéeteliʼ. Ilawil tiʼ baʼax igual a tuukul yéetel u maasil tumen beyoʼ maʼ ken a criticartoʼob mix a juzgartoʼob.
Tratart u maasil jeʼex a kʼáat ka tratartaʼakecheʼ. Wa ka weʼesik jatsʼuts modoseʼ maʼ xaaneʼ bey xan ken u tratartilech u maasiloʼ.
Perdonart u maasil. Wa ku yaʼalaʼal bey xan wa ku beetaʼal junpʼéel baʼax kʼaas ta contraeʼ maʼ a tuklik wa u yóoliliʼ úuchik u beetkeʼ, baʼaxeʼ perdonarte.
BAʼAX TÁAN U BEETIK U TESTIGOʼOB JÉEOBA
U testigoʼob Jéeobaeʼ kex jeʼel tuʼuxak kajaʼanoʼob wa ku meyajoʼobeʼ ku yeʼeskoʼob respeto tiʼ tuláakal máak.
K-kaʼansik gratis tiʼ tuláakal máak le baʼax ku yaʼalik le Bibliaoʼ. Pero maʼatech k-obligartik mix máak utiaʼal ka tuukulnak jeʼex toʼoneʼ wa ka u creert le baʼaxoʼob k-creertikoʼ. Chéen baʼaleʼ kéen k-tsikbalt tiʼ u maasil baʼax ku yaʼalik le Bibliaoʼ k-beetik yéetel «jeetsʼelil bey xan yéetel respeto» (1 Pedro 3:15; 2 Timoteo 2:24).
K-respetartik tuláakal máak. Teʼ reuniónoʼob k-beetkoʼ k-kʼamik tuláakal máak taak u kaanbal yoʼolal le Bibliaoʼ, kex jeʼel baʼaxak ku creertikeʼ wa kex jeʼel tuʼuxak u taaleʼ. K-ilik k-kʼamkoʼob yéetel utsil yéetel k-respetartik «tuláakal u jejeláasil máakoʼob» (1 Pedro 2:17).
K-respetartik u ley le gobiernoʼoboʼ. Teʼ tuʼux kajaʼanoʼonoʼ k-ilik k-beetik baʼax ku yaʼalik le gobiernoʼoboʼ, k-boʼotik impuesto yéetel k-ilik k-kanáantik u maasil (Romanos 13:1). Tsʼoʼoleʼ k-respetartik le decisión ku chʼaʼik u maasil yaan yil yéetel políticaoʼ.
