Tsʼáaba tu lugar u maasil
Baʼax ku yúuchul
Yaan máaxoʼobeʼ jelaʼan le baʼaxoʼob suuk u beetkoʼoboʼ, chéen baʼaleʼ wa k-chʼíikil k-il le baʼaloʼobaʼ jeʼel u káajal k-tuklik maʼ maʼalob baʼax ku beetkoʼobeʼ. Jeʼel u káajal k-tuklikeʼ maas maʼaloboʼon tiʼ letiʼob. Wa k-tuukul beyaʼ jeʼel u talamtal k-tsʼáaikba tu lugar u maasileʼ. Bey u káajal u yilaʼal táan k-pʼektik u maasiloʼ.
Baʼax ku yaʼalik le Bibliaoʼ
«Kiʼimakchajak a wóoleʼex yéetel le máaxoʼob kiʼimak u yóoloʼoboʼ; okʼolneneʼex yéetel le máaxoʼob ku yokʼoloʼoboʼ» (ROMANOS 12:15).
¿Baʼax u kʼáat u yaʼale? U kʼáat u yaʼaleʼ unaj k-tsʼáaikba tu lugar u maasil. Utiaʼal lelaʼ unaj k-naʼatik bix u yuʼubikubaʼob.
Bix u yáantaj u tsʼáaikuba máak tu lugar u maasil
Kéen k-beet lelaʼ k-tsʼáaik cuentaeʼ beyoʼob jeʼex toʼoneʼ. Yaan k-ilik ku yuʼubikubaʼob yéetel ku tuukuloʼob jeʼex toʼoneʼ. K-tsʼáaikba tu lugar uláakʼeʼ ku yáantkoʼon k-il maʼ jelaʼanoʼon tiʼ u maasiliʼ. Wa k-ilik le baʼaloʼob maʼalobtak ku beetik u maasileʼ yaan k-tratarkoʼob maʼalob.
K-tsʼáaikba xan tu lugar u maasileʼ ku yáantkoʼon xan k-respetartoʼob. Anne-Marie, juntúul koʼolel kajaʼan Senegaleʼ, káaj u pʼektik junjaats máakoʼob tumen ku tuklik maas maʼalob tiʼ letiʼob. U tsʼáaikuba tu lugar u maasileʼ tu yáantaj u kʼex u tuukul. Letiʼeʼ ku yaʼalik: «Ka tin wilaj bix u muʼyaj le máakoʼoboʼ, joʼopʼ in tuklik bix jeʼel in wuʼuyikinba wa ka in aktáant le baʼax ku yúuchultiʼoboʼ. Tin tsʼáaj cuentaeʼ maʼ maas maʼaloben tiʼ letiʼobiʼ yéetel igualen tiʼ u maasil». Bey túunoʼ, wa k-tsʼáaikba tu lugar u maasileʼ, yaan k-naʼatkoʼob yéetel maʼ ken k-aʼal baʼal tiʼob.
Baʼax jeʼel a beetkeʼ
Maʼ a wilik le baʼaxoʼob jelaʼantak suuk u beetik le máaxoʼob maʼ tu lúubultech utsiloʼ, baʼaxeʼ tukult láayliʼ ku yuʼubikubaʼob jeʼex techeʼ. Máans ta tuukul bix u yuʼubikuba le máakoʼob kéen u beetoʼob le baʼaloʼobaʼ:
K-tsʼáaikba tu lugar uláakʼeʼ ku yáantkoʼon k-il maʼ jelaʼanoʼon tiʼ u maasiliʼ
Kéen múul jaankoʼob yéetel u láakʼtsiloʼob
Kéen tsʼoʼokok u meyajoʼob bul kʼiin
Kéen yanakoʼob yéetel u amigoʼob
Kéen u yuʼuboʼob paax
Beoraaʼ tsʼáaba tu lugaroʼob yéetel tukulte:
¿Baʼax jeʼel in beetik wa yaan máax ku beetik in tuklik mix baʼal in biilaleʼ?
¿Bix jeʼel in wuʼuyikinba wa yaan máax ku yaʼalikten baʼal kex maʼ u kʼaj óoleniʼ?
Wa tiaʼanen ichil u jaats máakoʼob pʼektaʼanoʼobeʼ, ¿bix uts tin tʼaan ka tratartaʼaken?
Maʼ xaaneʼ jeʼel u yutstal xan ta wicheʼ
LE MÁAX KU KANANOʼ
¿Ku naʼatik wa Dios baʼax ka muʼyajtik?
Le Bibliaoʼ ku yaʼalikeʼ Dioseʼ ku yilik baʼax ku yúuchultoʼon yéetel jach ku naʼatkoʼon.
¡AAJKECH!
Maʼalobkíint a toj óolal: Bisaba maʼalob yéetel u maasil
Utiaʼal k-bisikba maʼalob yéetel u maasileʼ maʼ unaj k-tuukul chéen t-oʼolaliʼ.
