U millonesil máakoʼobeʼ tsʼoʼok u beetkoʼob le baʼax ku yaʼalik le tekstoʼob tsʼoʼok k-ilkoʼ, leloʼ le áantoʼob utiaʼal u xuʼulul u pʼektikoʼob u maasil. Chéen baʼaleʼ toʼoneʼ maʼ tu páajtal k-beetik u xuʼulul u pʼektikuba le máakoʼob tiʼ tuláakal yóokʼol kaaboʼ. ¿Yaan wa baʼax jeʼel u beetik u xuʼulul u pʼektikuba tuláakal máakeʼ?

Tsʼoʼok u yilaʼaleʼ le gobiernoʼoboʼ maʼ béeychajak u beetkoʼob u xuʼulul u pʼektikuba máakiʼ. ¿U kʼáat wa túun u yaʼal mix junpʼéel gobierno jeʼel u beetik lelaʼ?

Le gobierno u kʼáat u xuʼuls u pʼektikuba máakoʼ unaj u beetik lelaʼ:

1. 1. u yáantik máak utiaʼal u kʼexik baʼax ku tuklik yéetel baʼax ku yuʼubik

2. 2. u luʼsik t-puksiʼikʼal le baʼax beetik k-pʼektik u maasiloʼ

3. 3. u beetik u tratartaʼal maʼalob tuláakal máak tumen le gobernanteʼoboʼ

4. 4. u beetik u biskuba maʼalob tuláakal máak

Le Bibliaoʼ ku yaʼalikeʼ Dioseʼ tsʼoʼok u tsʼáaik junpʼéel gobierno kun beetik tuláakal lelaʼ. U kʼaabaʼ le gobiernoaʼ, «u Reino Dios» (Lucas 4:43).

Ilawil baʼaxoʼob ken u beet le gobiernoaʼ.

U kajnáaliloʼob le Luʼumaʼ yaan u «kankoʼob baʼax le justiciaoʼ» (ISAÍAS 26:9).

Tumen yaan u beetaʼal «justicia teʼ lugaroʼobaʼ yaan u yantal jeetsʼeliliʼ, tumen ku beetaʼal baʼax tojeʼ mix baʼal kun beetik u sen tuukul yéetel u sajaktal máak» (ISAÍAS 32:17).

¿Baʼax u kʼáat u yaʼale? U Reino Dioseʼ yaan u kaʼansik tiʼ le máakoʼob baʼaloʼob maʼalobtakoʼ. Kéen k-kan k-il baʼax uts yéetel baʼax kʼaaseʼ yaan u kʼexpajal bix k-ilik u maasil. Tuláakal máak kun ilik maas maʼalob ka k-yaabilt u jejeláasil máak.

Dioseʼ «yaan u choʼik tuláakal u jaʼil u yichoʼob, maʼ tun yantal kíimil, mix okʼol, mix kʼiʼinamil yéetel mix máak kun muʼyaj. Le baʼaloʼob suuk u yúuchul kaʼachoʼ tsʼoʼok u máanoʼob» (APOCALIPSIS 21:4).

¿Baʼax u kʼáat u yaʼale? U Reino Dioseʼ yaan u xuʼulsik tuláakal le baʼaxoʼob beetik u muʼyaj máakoʼ. Tuláakal máak ken u beet baʼax uts, le oʼolaleʼ mix máak ken u pʼektuba.

«Maʼ ken u juzgart máak chéen tu yoʼolal baʼax ku jáan ilik, mix ken u castigart máak chéen tu yoʼolal baʼax ku yuʼubik u yaʼalaʼal. Letiʼeʼ yaan u beetik justicia tiʼ le óotsiloʼoboʼ, yéetel tumen ku beetik baʼax tojeʼ yaan u yeʼesik le baʼax maʼ maʼalob ku beetaʼaloʼ, lelaʼ yaan u beetik utiaʼal u yutsil le utsul máakoʼob yaan way luʼumeʼ» (ISAÍAS 11:3, 4).

¿Baʼax u kʼáat u yaʼale? Jesucristo, u Reyil u Reino Dioseʼ, yaan u gobernartik le Luʼum desde teʼ kaʼanoʼ. Letiʼeʼ yaan u beetik baʼax toj yéetel yaan u tratartik maʼalob tuláakal máak. Jesúseʼ igual u yilik tuláakal máak yéetel yaan u yilik u beetaʼal baʼax maʼalob tuláakal tuʼux.

U Reino Dioseʼ yaan u beetik u yantal tiʼ máak «junpʼéeliliʼ tuukul, junpʼéeliliʼ yaabilaj». Tsʼoʼoleʼ yaan u yantaloʼob «junmúuchʼ bey junpʼéeliliʼ wíinklileʼ» (FILIPENSES 2:2).

¿Baʼax u kʼáat u yaʼale? Le máaxoʼob kun antaloʼob yáanal u Reino Dioseʼ yaan u biskubaʼob maʼalob. Yaan u yantaloʼob junmúuchʼ tumen yaan u yaabiltikubaʼob.