1. ¿Bix a imaginartik Jéeoba?

 KÉEN orarnakech tiʼ Jéeobaeʼ, ¿tsʼoʼok wa a máansik ta tuukul bix letiʼ? Kex maʼ tu páajtal u yilaʼaleʼ yaan kʼiineʼ le Bibliaoʼ ku yaʼalikeʼ letiʼeʼ «bey jeʼex le Kʼiinoʼ yéetel bey junpʼéel escudoeʼ» wa «bey junpʼéel kʼáakʼ ku tóokik tuláakal baʼaleʼ» (Sal. 84:11; Heb. 12:29). Tiʼ junpʼéel baʼal tsʼaʼab u yil profeta Ezequieleʼ tu yaʼaleʼ Jéeobaeʼ bey u jatsʼuts tuunichil zafiroeʼ, bey junpʼéel metal ku léetsʼbaleʼ yéetel bey jeʼex le arco irisoʼ (Eze. 1:​26-28). Le kéen tuukulnakoʼon tiʼ le baʼax tu yilaj le profetaaʼ maʼ xaaneʼ ku beetik u jaʼakʼal k-óol wa hasta k-sajaktal.

2. ¿Baʼaxten yaan máakoʼobeʼ ku tuklikoʼobeʼ maʼ yaabiltaʼanoʼob tumen Diosiʼ?

² Maʼ xaaneʼ k-tuklikeʼ maʼ u yaabiltmoʼon Jéeobaiʼ tumen maʼ t-ilik yéetel tumen yaan baʼaxoʼob uchaʼantoʼon ichil k-kuxtal. Por ejemploeʼ maʼ xaaneʼ úuchjeakileʼ k-taataʼobeʼ maʼ tu yeʼesoʼobtoʼon yaabilajiʼ. Le beetkeʼ maʼ xaaneʼ jeʼel k-tuklikeʼ Dioseʼ mix bikʼin ken u yaabiltoʼon. U maʼalobileʼ es ke Jéeobaeʼ ku naʼatkoʼon yéetel u yojel baʼaxten bey k-uʼuyikbaoʼ. Utiaʼal túun u yáantkoʼon k-naʼat u yaabiltmoʼoneʼ letiʼeʼ ku tsoliktoʼon teʼ Biblia bix le jatsʼuts modos yaantiʼoʼ.

3. ¿Baʼaxten teʼ xookaʼ yaan k-maas kaanbal yoʼolal Jéeoba bey xan yoʼolal le yaabilaj ku yeʼesikoʼ?

³ Le Bibliaoʼ ku yaʼalikeʼ Jéeobaeʼ yaabilaj (1 Juan 4:8). Bey u yaʼalaʼaltiʼoʼ tumen tuláakal baʼax ku beetkeʼ ku beetik yoʼolal yaabilaj. U yaabilajeʼ táaj nojoch, hasta ku yaabiltik tak le máaxoʼob kʼasaʼanoʼoboʼ (Mat. 5:​44, 45). Teʼ xookaʼ yaan k-maas kʼaj óoltikeʼex bix Jéeoba yéetel bix le yaabilaj ku yeʼesikoʼ. Mientras k-kʼaj óoltik Jéeobaeʼ maas yaan k-yaabiltik.

JÉEOBAEʼ JACH U YAABILTMOʼON

4. ¿Bix a wuʼuyikaba le kéen a kʼaʼajs u yaabiltmech Jéeoba? (Ilawil xan le fotooʼ).

⁴ «Jéeobaeʼ jach nojoch u yaabilaj» (Sant. 5:11). Teʼ Bibliaoʼ  Jéeobaeʼ ku keʼetel yéetel juntúul maamatsil jach u yaabiltmaj u chaambal (Isa. 66:​12, 13). Chéen máans ta tuukul bix u kanáantik u chaambal le maamatsiloʼ. Yéetel yaabilajeʼ ku kukíintik tu yook, ku báaxal tu yéetel tsʼoʼoleʼ ku kiʼikiʼtʼantik. Le kéen u yuʼub táan u yokʼol le chaambaloʼ tu séebaʼanil ku bin yáalkab u méekʼeʼ. Jéeobaeʼ bey xan u beetik t-éeteloʼ: le kéen u yil táan k-muʼyajeʼ tu séebaʼanil xan ku yáantkoʼon. Le salmistaoʼ tu yaʼalaj: «Le ka jach chiʼichnakchajeneʼ ta líiʼsaj in wóol, ta tranquilizarten» (Sal. 94:19).

5. ¿Bix u yeʼesik Jéeoba jach nojoch u yaabilaj?

⁵ Jéeobaeʼ nojoch u yaabilaj (Sal. 103:8). Kex yaan kʼiin k-beetik baʼaloʼob maʼ maʼalobtakeʼ letiʼeʼ maʼ tu xuʼulul u yaabiltikoʼon. Úuchjeakileʼ le israelitaʼoboʼ yaʼab u téenel tu beetoʼob baʼaloʼob maʼ maʼalobtak tu táan Diosiʼ, pero le kéen arrepentirnakoʼobeʼ Jéeobaeʼ ku yeʼesiktiʼob jach u yaabiltmoʼob. Juntéenjeakeʼ tu yaʼalaj tiʼ u kaajal: «Techeʼ jach lúubech utsil tiʼ teen, tin wilaj minaʼan uláakʼ jeʼex techeʼ yéetel jach in yaabiltmech» (Isa. 43:​4, 5). Jéeobaeʼ maʼ kʼexpajkiʼ. Le oʼolaleʼ k-ojleʼ jach u yaabiltmoʼon xan. Wa k-lúubul tiʼ junpʼéel nojoch kʼebaneʼ Jéeobaeʼ maʼ tu xúumpʼatkoʼon, baʼaxeʼ wa k-arrepentir yéetel k-kʼáatiktiʼ ka u perdonartoʼoneʼ letiʼeʼ maʼ tu xuʼulul u yaabiltikoʼon. Maʼ u tuʼubultoʼoneʼ «letiʼeʼ jach tu jaajil ku perdonartik máak» (Isa. 55:7). Le Bibliaoʼ ku yaʼalikeʼ le kéen u perdonartoʼon Jéeobaeʼ ku ‹yantaltoʼon jeetsʼelil› (Hech. 3:19).

6. Zacarías 2:​8, ¿baʼax ku kʼaʼajsiktoʼon yoʼolal Jéeoba?

⁶ (Xok Zacarías 2:8). Jéeobaeʼ ku yaʼalikeʼ toʼoneʼ beyoʼon u neekʼ u yicheʼ. U yich máakeʼ junpʼéel baʼal jach kʼaʼanaʼan yéetel sensible. Le oʼolaleʼ bey ka u yaʼaltoʼon Jéeobaeʼ: «Le máax beetikteʼex loobeʼ, táan u beetik loob tiʼ junpʼéel baʼal jach koʼoj u tojol tin táan». Como Jéeoba jach u yaabiltmoʼoneʼ ku naʼatik bix k-uʼuyikba yéetel u kʼáat u kanáantoʼon. Le kéen muʼyajnakoʼoneʼ, letiʼeʼ ku muʼyaj xan. Le oʼolal kéen orarnakoʼoneʼ jeʼel u páajtal k-aʼalik tiʼ Jéeobaeʼ: «Kanáanten jeʼex a kanáantik u neekʼ a wicheʼ» (Sal. 17:8).

7. ¿Baʼaxten unaj k-creertik u yaabiltmoʼob Dios?

⁷ ¿Baʼax u kʼáat Jéeoba? U kʼáat ka k-creerte jach tu jaajil u yaabiltmoʼon. Letiʼeʼ ku naʼatikeʼ maʼ xaaneʼ yoʼolal le baʼaxoʼob uchaʼan ichil a kuxtal wa yoʼolal le problemas táan a aktáantik beoraaʼ maʼ ta creertik wa jach tu jaajil u yaabiltmech. ¿Baʼax túun jeʼel u yáantkech a creert  jach u yaabiltmecheʼ? Letiʼe a xakʼaltik bix u yeʼesik Jéeoba u yaabiltmaj Jesús, le yéeyaʼanoʼoboʼ yéetel bix u yaabiltmiloʼon xan.

JÉEOBAEʼ KU YAʼALIK U YAABILTMAJ MÁAK

8. ¿Baʼaxten Jesúseʼ jach u yojel yaabiltaʼan tumen Jéeoba?

⁸ Jéeoba yéetel Jesúseʼ yaʼab tiempo tu múul máansoʼob teʼ kaʼanoʼ, le oʼolal jach u yaabiltmubaʼob. Letiʼe máaxoʼob maas yaʼab tiempo joʼopʼok u biskubaʼoboʼ. Teʼ Mateo 17:​5, Jéeobaeʼ tu yaʼalaj utiaʼal ka uʼuyaʼak tumen tuláakal máak de ke u yaabiltmaj Jesús. Teʼ kʼiin jeʼeloʼ maʼ chéen tu yaʼalaj de ke Jesúseʼ jach ku beetik u kiʼimaktal u yóol, baʼaxeʼ tu yaʼaleʼ jach u yaabiltmaj yéetel maʼalob baʼax ku beetik. Letiʼeʼ tu yaʼalaj: «Lelaʼ in Hijo, jach in yaabiltmaj» (Efe. 1:7). Le oʼolal k-aʼalikeʼ Jesúseʼ jach seguro yaabiltaʼan tumen Jéeoba. Lelaʼ u yojel tumen Jéeobaeʼ yaʼab u téenel tu yaʼalajtiʼ (Juan 3:35; 10:17; 17:24).

9. Jeʼex u yeʼesik Romanos 5:​5, ¿bukaʼaj u yaabiltmil Jéeoba le yéeyaʼanoʼoboʼ?

⁹ Jéeobaeʼ ku yaʼalik xan tiʼ le yéeyaʼanoʼob jach u yaabiltmoʼoboʼ (xok Romanos 5:5). Jeʼex k-ilkoʼ teʼ tekstooʼ Jéeobaeʼ ku yaʼalikeʼ «tsʼoʼok u chupik» u puksiʼikʼaloʼob yéetel u yaabilaj. Junpʼéel diccionario ku tsolik u tʼaaniloʼob le Bibliaoʼ ku ketik u yaabilaj Dios yéetel u jaʼiloʼob junpʼéel río. Le tekstooʼ maʼalob u yeʼesik bukaʼaj u yaabiltmil Jéeoba le yéeyaʼanoʼoboʼ. Letiʼob xaneʼ jach u yojloʼob «yaabiltaʼanoʼob tumen Dios» (Jud. 1). Le oʼolal ku yuʼubikubaʼob jeʼex apóstol Juaneʼ, letiʼeʼ tu yaʼalaj: «¡Ilawileʼex bukaʼaj nojchil le yaabilaj tsʼoʼok u yeʼesiktoʼon le Taataoʼ! Letiʼeʼ tu tsʼáajtoʼon u páajtalil u yaʼalaʼal u paalaloʼon» (1 Juan 3:1). ¿Chéen wa le yéeyaʼanoʼob yaabiltaʼanoʼon tumen Jéeobaoʼ? Maʼatech, Jéeobaeʼ tsʼoʼok u yeʼesik u yaabiltmaj tuláakal le máaxoʼob meyajtikoʼ.

10. ¿Baʼax eʼesik jach tu jaajil u yaabiltmoʼon Jéeoba?

¹⁰ ¿Baʼax eʼesik jach tu jaajil u yaabiltmoʼon Jéeoba? Letiʼe úuchik u túuxtik kíimil u Hijo t-oʼolaloʼ. Le baʼax tu beetoʼ ku yeʼesikeʼ mix máak maas u yaabiltmoʼon jeʼex letiʼeʼ (Juan 3:16; Rom. 5:8). Jéeobaeʼ tu tsʼáaj u kuxtal u Hijo utiaʼal ka u salvartoʼon tiʼ le kʼebanoʼ yéetel utiaʼal ka páajchajak k-bisikba tu yéetel (1 Juan 4:10). Le kéen tuukulnakoʼon tiʼ le baʼax tu beetaj Jéeoba yéetel Jesúsoʼ k-kʼuchul k-naʼat bukaʼaj u yaabiltmiloʼon (Gál. 2:20). Jéeobaeʼ maʼ tu túuxtaj u Hijo chéen utiaʼal ka u béeykunt baʼax ku yaʼalik junpʼéel leyiʼ, baʼaxeʼ tu beetaj tumen u yaabiltmoʼon. Tu tsʼáaj le baʼax maas koʼoj yaantiʼoʼ: u kuxtal u Hijo. Jéeobaeʼ tu chaʼaj u sufrir yéetel u kíimil Jesús t-oʼolal tumen jach nojoch le yaabilaj ku yuʼubik t-oʼolaloʼ.

11. ¿Baʼax k-kanik tiʼ baʼax ku yaʼalik Jeremías 31:3?

¹¹ Jeʼex tsʼoʼok k-ilkoʼ Jéeobaeʼ maʼ chéen ku yuʼubik u yaabiltmoʼoniʼ, baʼaxeʼ ku yeʼesik yéetel ku yaʼalik (xok Jeremías 31:3). Letiʼeʼ tu natsʼoʼon tu yiknal tumen u yaabiltmoʼon (ket yéetel Deuteronomio 7:​7, 8). Mix máak yéetel mix baʼal jeʼel u náachkuntkoʼon tiʼ u yaabilaj Dioseʼ (Rom. 8:​38, 39). ¿Bix a wuʼuyikaba le kéen a máans ta tuukul jach u yaabiltmech Jéeoba? Beoraaʼ yaan k-xokik Salmo 23. Le táan k-xokikoʼ ilawil bix úuchik u yáantaʼal David tumen u yaabilaj Jéeoba yéetel ilawil xan bix jeʼel u yáantkecheʼ.

¿BIX A WUʼUYIKABA IKIL A WOJÉELTIK JACH U YAABILTMECH JÉEOBA?

12. ¿Bix jeʼel a tsolik baʼax ku yaʼalik Salmo 23?

¹² (Xok Salmo 23:​1-6). Teʼ salmo 23, Davideʼ tu yaʼaleʼ u yojel yaabiltaʼan yéetel ku kanáantaʼal tumen Jéeoba. Teʼ salmooʼ letiʼeʼ tu tsikbaltaj bix u biskuba yéetel Jéeoba, yéetel tu yaʼalaj xaneʼ Jéeobaeʼ u kanan taman. Davideʼ u yojel xan yaabiltaʼan tumen Jéeoba tumen  ku nuʼuktaʼal, u yojel yaan u yaabiltaʼal tuláakal u kʼiiniloʼob u kuxtal. Koʼoneʼex ilik baʼaxten Davideʼ tu yaʼalaj jach tu jaajil yaabiltaʼan tumen Jéeoba.

13. ¿Baʼaxten Davideʼ u yojel kaʼach táan u kanáantaʼal tumen Jéeoba?

¹³ «Mix baʼal ken u binelten». Davideʼ u yojel táan kaʼach u kanáantaʼal tumen Jéeoba yéetel yaan u tsʼaʼabaltiʼ le baʼax kʼaʼabéettiʼoʼ. U yojel xaneʼ Jéeobaeʼ u amigo. Le oʼolal kex jeʼel baʼaxak ka úuchkeʼ u yojel yaan u kanáantaʼal tumen Jéeoba, yéetel mix baʼal ken u binelttiʼ. Davideʼ u yojel xaneʼ u yaabilaj Jéeobaeʼ jach táaj nojoch, maas yaʼab ke le chiʼichnakiloʼob yaantiʼoʼ. Le oʼolal tranquilo u yuʼubikuba tumen u yojel mantatsʼ táan u kanáantaʼal (Sal. 16:11).

14. ¿Bix u yeʼesik Jéeoba táan u kanáantkoʼon yéetel yaabilaj?

¹⁴ Jéeobaeʼ ku kanáantkoʼon yéetel yaabilaj, maases teʼ kʼiinoʼob táan k-muʼyajoʼ. Koʼoneʼex ilik baʼax úuch tiʼ Claire, a juntúul kiik tsʼoʼok maas tiʼ 20 años joʼopʼok u meyaj Betel. Letiʼeʼ ku yaʼalikeʼ jach tu yuʼubaj maʼ tu páajtal u beetik mix baʼal utiaʼal u yáantik u familia le ka sen muʼyajnajoʼ. U papáeʼ tu tsʼáaj infarto cerebral tiʼ, expulsartaʼab juntúul tiʼ u yíitsʼinoʼob, quebrarnaj le negocio yaantiʼob kaʼachoʼ yéetel tu perdertaj u yotochoʼob. ¿Bix úuchik u kanáantaʼaloʼob tumen Jéeoba? Claireeʼ ku yaʼalik: «Jéeobaeʼ tu tsʼáaj tuláakal baʼax kʼaʼabéet tiʼ in familia, hasta tu tsʼáaj u maasil tiʼob. Jach maʼ máan tin tuukul wa bey ken u beetiloʼ. Mantatsʼ kin kʼaʼajsik tuláakal le súutukiloʼob tsʼoʼok u yeʼesikten u yaabiltmen Jéeobaoʼ. Leloʼ ku yáantken utiaʼal u seguer in tsʼáaik in wóol in meyajt Jéeoba teʼ súutukiloʼob maʼ chéen chʼaʼabil baʼax ku yúuchultoʼonoʼ».

15. ¿Baʼax beet u kaʼa antal u muukʼ David? (Ilawil xan le dibujooʼ).

 ¹⁵ «Ku beetik u kaʼa antal in muukʼ». Davideʼ jach táan kaʼach u chʼaʼpachtaʼal le oʼolal yaan horaeʼ tu yuʼubaj jach táaj chiʼichnak (Sal. 18:​4-6). Pero le kéen kʼaʼajaktiʼ yaabiltaʼan tumen Jéeobaeʼ ku kaʼa antal u muukʼ. Tu yuʼubaj bey ku bisaʼal «tuʼux yaan yaʼab suʼuk» yéetel «tuʼux yaan yaʼab jaʼ[eʼ]». Bey úuchik u kaʼa antal u muukʼ yéetel u meyajtik Jéeobaoʼ (Sal. 18:​28-32).

16. ¿Bix tsʼoʼok u yáantkech u nojoch yaabilaj Jéeoba?

¹⁶ Le kéen muʼyajnakoʼoneʼ jeʼel u páajtal k-aʼalikeʼ: «Tumen jach nojoch u yaabilaj Jéeobaeʼ maʼ xuʼuluktoʼoniʼ» (Lam. 3:22; Col. 1:11). Koʼoneʼex ilik baʼax úuch tiʼ Rachel. Letiʼeʼ jach yaachaj u yóol le ka pʼaʼat tumen u yíicham le táan le COVID-19, tsʼoʼoleʼ le máakoʼ xuʼul u meyajtik Jéeoba. ¿Bix áantaʼabik tumen Jéeoba? Racheleʼ ku yaʼalik: «Jéeobaeʼ tu beetaj in wuʼuyik yaabiltaʼanen. Tu tsʼáajten yaʼab amigoʼob ku máanskoʼob tiempo tin wéetel, ku taasikoʼobten janal yéetel ku túuxkoʼobten mensajeʼob jach jatsʼutstak. Ku túuxtikoʼobten tekstoʼob ku líiʼskoʼob in wóol, ku cheʼejoʼob tin wéetel yéetel mantatsʼ ku kʼaʼajsikoʼobten táan in kanáantaʼal tumen Jéeoba. Maʼ tu xuʼulul in tsʼáaik u graciasil tiʼ Jéeoba ikil u chaʼik in wantal ichil junpʼéel nojoch familia jach u yojel u yeʼes yaabilaj».

17. ¿Baʼaxten Davideʼ tu yaʼaleʼ «maʼ saajken u yúuchulten loobiʼ»?

¹⁷ «Maʼ saajken u yúuchulten loobiʼ tumen tiaʼanech tin wiknaleʼ». Davideʼ yanchaj kʼasaʼan enemigoʼob tiʼ yéetel yaʼab u téenel yanchaj tu chiʼ kíimil. Pero kex beyoʼ letiʼeʼ ku yuʼubikuba kaʼach tranquilo tumen u yojel yaabiltaʼan tumen Jéeoba. U yojel Jéeobaeʼ tiaʼan kaʼach mantatsʼ tu yéeteleʼ, le oʼolal tu kʼayaj: «[Jéeobaeʼ] tu salvarten tiʼ tuláakal baʼax beetik in sajaktal» (Sal. 34:4). U jaajileʼ maʼ chéen chʼaʼabil le baʼax ku aktáantik kaʼach Davidoʼ, pero u yaabilaj Jéeobaeʼ maas nojoch u páajtalil tiʼ le problemas ku aktáantikoʼ.

18. Le kéen k-aktáant baʼaloʼob jeʼel u beetik k-sajaktaleʼ, ¿bix u yáantkoʼon k-ojéeltik u yaabiltmoʼon Jéeoba?

¹⁸ Le kéen k-aktáant baʼaloʼob jeʼel u beetik k-sajaktaleʼ, ¿bix u yáantkoʼon k-ojéeltik u yaabiltmoʼon Jéeoba? Susi, juntúul kiik táan u beetik u precursoraileʼ, ku tsikbaltik bix tu yuʼubiluba yéetel u yíicham le ka tu kíimsuba u hijoʼoboʼ, ku yaʼalik: «Jach táaj yaj le baʼax úuchtenoʼ, jach tin wuʼuyaj tu afectarten tumen kex taak in beetik wa baʼaxeʼ maʼ tu páajtal. Pero le yaabilaj tu yeʼesajten Jéeobaoʼ tu beetaj in wuʼuyik táan u kanáantken». Rachel, le kiik t-chʼaʼchiʼitaj teʼ párrafo 16, ku yaʼalik: «Junpʼéel  áakʼab jach lubaʼan in wóol yéetel jach saajkeneʼ, tin wuʼuyaj tsʼokaʼanten beyoʼ. Ka orarnen tiʼ Jéeobaeʼ táan in wokʼol, tsʼoʼoleʼ como jach yaj baʼax táan in muʼyajtikeʼ táan in wáakam. Tu séebaʼanil ka tin wuʼuyaj bix u méekʼiken Jéeoba utiaʼal u tranquilizarken, bey jeʼex juntúul maamatsil ku méekʼik u chaambal utiaʼal u náaysik u yóoleʼ. Bey úuchik u páajtal in weenloʼ. Mix bikʼin ken in tuʼubs le baʼax úuchoʼ». Juntúul anciano ku kʼaabaʼtik Tasoseʼ, kʼaʼal cuatro años cárcel tumen maʼ tu yóotaj u beet u soldadoiliʼ. Letiʼeʼ ku yaʼalik bix úuchik u kanáantaʼal tumen Jéeoba teʼ tiempo jeʼeloʼ, ku yaʼalik: «Jéeobaeʼ tu tsʼáajten u maas yaʼabil tiʼ le baʼaloʼob kʼaʼabéettenoʼ. Leloʼ tu beetaj in maas confiar tiʼ letiʼ. Tsʼoʼoleʼ tu tsʼáajten xan u espíritu santo utiaʼal in wuʼuyik kiʼimak in wóol kex táaj kʼaas le lugar tuʼux yanenoʼ. Leloʼ tu beetaj in tsʼáaik cuentaeʼ wa kin maas confiar tiʼ Jéeobaeʼ, maas yaan in wuʼuyik u yaabiltmen. Le oʼolal kex kʼalaʼaneneʼ tin chʼaʼtuklaj in beetik in precursor regularil».

NATSʼABA TU YIKNAL LE DIOS JACH KU YEʼESIK YAABILAJOʼ

19. 1) ¿Bix ken orarnakoʼon tiʼ Jéeoba ikil k-ojéeltik u yaabiltmoʼon? 2) ¿Máakalmáak tiʼ le tekstoʼob ku tʼaanoʼob yoʼolal u yaabilaj Jéeoba maas uts ta wichoʼ? (Ilawil le cuadro « Tekstoʼob eʼesiktoʼon jach tu jaajil u yaabiltmoʼon Jéeoba»).

¹⁹ Le experienciaʼob tsʼoʼok k-ilkoʼ ku yeʼesikeʼ Jéeobaeʼ «u Diosil yaabilaj» (2 Cor. 13:11). Letiʼeʼ jach tu jaajil taak u yáantik cada juntúul tiʼ toʼon. Le kéen muʼyajnakoʼoneʼ ku méekʼikoʼon, ku «baʼpachtikoʼon yéetel u nojoch yaabilaj» (Sal. 32:10). Wa k-jóoʼsik tiempo utiaʼal k-tuklik bix u yeʼesiktoʼon u yaabiltmoʼoneʼ yaan k-maas confiar tiʼ letiʼ yéetel yaan k-maas natsʼikba tu yiknal. Bey túunoʼ le kéen orarnakoʼoneʼ yaan u páajtal k-aʼaliktiʼ de ke jach uts t-tʼaan u yaabiltikoʼon yéetel yaan u páajtal k-tsikbaltiktiʼ le baʼax yaan ichil k-puksiʼikʼaloʼ. Ku páajtal xan k-aʼaliktiʼ baʼax chiʼichnakkúuntikoʼon. Jach seguroʼon de ke Jéeobaeʼ ku naʼatik bix k-uʼuyikba yéetel taak u yáantkoʼon (Sal. 145:​18, 19).

20. ¿Baʼaxten ku taaktal k-náatsʼal tu yiknal Jéeoba?

²⁰ Wa jach táaj keʼeleʼ k-náatsʼal tuʼux yaan kʼáakʼ tumen kiʼ k-uʼuyik u chokoil le kʼáakʼoʼ. Toʼon xaneʼ uts t-tʼaan k-uʼuyik bix u yeʼesiktoʼon yaabilaj Jéeoba, le oʼolal ku taaktal k-náatsʼal tu yiknal, tumen kex jach táaj yaan u podereʼ uts tu tʼaan u yeʼesik u yaabiltmoʼon. Jeʼex le salmistaoʼ toʼoneʼ k-aʼalik xan: «Teneʼ in yaabiltmaj Jéeoba» (Sal. 116:1).