Lelaʼ letiʼe bix u yuʼubikuba yaʼab tiʼ le máaxoʼob yaantiʼob junpʼéel kʼojaʼanil jeʼex le ansiedadoʼ, le depresiónoʼ wa le trastorno bipolaroʼ.

Wa bey u yúuchultechoʼ, maʼ chéen tiʼ teech ku yúuchliʼ, u jaajileʼ teʼ kʼiinoʼobaʼ tiʼ yaʼab máak yaan le kʼojaʼaniloʼobaʼ.

Le Bibliaoʼ ku yaʼalikeʼ kuxaʼanoʼon tiʼ «yaayaj kʼiinoʼob yéetel istikyaj ken u máansil u kuxtal máak» (2 Timoteo 3:1). Bejlaʼeʼ tsʼoʼok u yilaʼaleʼ juntúul tiʼ cada ocho máakoʼobeʼ yaan junpʼéel kʼojaʼanil tiʼ jeʼex le depresión wa le ansiedadoʼ. Tsʼoʼoleʼ teʼ año 2020, tu yoʼolal le COVID-19, maas yaʼabchaj le máaxoʼob yaantiʼob le clase kʼojaʼaniloʼobaʼ.

Chéen baʼaleʼ kex maʼalob ka k-ojéelt jaytúul máakoʼob ku kʼojaʼantaloʼobeʼ, maas maʼalob ka k-il baʼax jeʼel u yáantkoʼon wa yaantoʼon junpʼéel tiʼ le kʼojaʼaniloʼobaʼ.

Juntúul máak beyaʼ kex yaan problemas tiʼeʼ u yojel u controlartuba, maʼatech u píit máan u preocuparkuba, ku páajtal u meyaj yéetel ku yuʼubik kiʼimak u yóol.

• Le kʼojaʼaniloʼobaʼ MAʼ TU tsaʼayal tiʼ máak tumen yaan baʼax kʼaas u beetmiʼ.

• Le máax yaan junpʼéel tiʼ le kʼojaʼaniloʼob tiʼaʼ ku léekel u nervios, jach ku píitmáan u preocupar, maʼ tu kaxtik baʼax ku yúuchultiʼ, maʼ kiʼimak u yóoliʼ yéetel maʼ tu páajtal u controlarkuba.

• Yaan horaeʼ ku difíciltal tiʼ u biskuba yéetel u maasil yéetel istikyaj u beetik jujunpʼéel baʼaloʼob jeʼex por ejemplo u meyajeʼ.

•   Le kʼojaʼaniloʼobaʼ jeʼel u tsaʼayal tiʼ jeʼel máaxakeʼ kex jeʼel bukaʼaj u edadeʼ, kex jeʼel tuʼuxak u taaleʼ, kex jeʼel baʼaxak religiónil yaantiʼeʼ, kex wa kaʼanchajaʼan u xook bey xan kex wa óotsil wa ayikʼal.

Wa teech, wa juntúul máax a kʼaj óol ku pʼáatal maʼ tu páajtal u wenel, ku káajal u kʼexpajal u modos, maʼ tu janal, maʼ tu xuʼulul u sen tuukul, ku léekel u nervios yéetel mantatsʼ yaachajaʼan u yóoleʼ, maʼ xaaneʼ kʼaʼabéet u yáantaʼal utiaʼal u yilik baʼax beetik u yuʼubikuba beyoʼ. ¿Tuʼux jeʼel u kaxtik áantaj juntúul máax ku yuʼubikuba beyaʼ?

Jesús, le máak maas yanchajaʼan u naʼatoʼ, tu yaʼalaj: «Le máaxoʼob toj u yóoloʼoboʼ maʼ kʼaʼabéettiʼob juntúul doctoriʼ, chéen baʼaleʼ le máaxoʼob kʼojaʼanoʼoboʼ kʼaʼabéettiʼob» (Mateo 9:12). Le máaxoʼob ku yuʼubikubaʼob jeʼex tsʼoʼok k-aʼalikoʼ maʼalob ka séeb xiʼikoʼob yiknal juntúul doctor tumen beyoʼ jeʼel u tsʼaʼabal tsʼaak tiʼobeʼ, jeʼel u yuʼubikubaʼob maas maʼalobileʼ yéetel jeʼel u kaʼa kiʼimaktal u yóoloʼobeʼ. a

Kex le Biblia maʼ junpʼéel libro ku tʼaan tiʼ bix unaj u tsʼaʼakal máakeʼ, jeʼel u yáantkoʼon wa yaantoʼon junpʼéel tiʼ le kʼojaʼaniloʼobaʼ. Le uláakʼ xookoʼob ku taasik le revistaaʼ ku yeʼesik máakalmáak le consejoʼob ku tsʼáaikoʼ.