Dioseʼ ku bendecirtik le máaxoʼob ku yuʼubikoʼob tʼaanoʼ
Profeta Moiséseʼ tu yaʼaleʼ wa k-uʼuyik u tʼaan Dioseʼ yaan u bendecirkoʼon (Deuteronomio 10:13; 11:27). Toʼoneʼ k-uʼuyik u tʼaan Dios maʼ tumen saajkoʼon ka u castigartoʼoniʼ. Letiʼeʼ jatsʼuts u modos, le oʼolal k-yaabiltmaj. Tsʼoʼoleʼ k-beetik baʼax ku yaʼalik tumen k-kʼáat k-kiʼimakkúunt u yóol. U Yáax Tsʼíib Juan 5:3, ku yaʼalik: «Le máax u yaabiltmaj Dioseʼ ku beetik le baʼaxoʼob ku yaʼalik Diosoʼ».
¿Baʼax utsiloʼob ken k-kʼam wa k-uʼuyik u tʼaan Dios? Koʼox ilik.
1. KU YÁANTKOʼON K-CHʼAʼTUKULT BAʼAX MAʼALOB
«Teneʼ Jéeobaen, teen a Dios, teen le máax kaʼansikech utiaʼal u bintech utsiloʼ, teen le máax nuʼuktikech teʼ bej tuʼux unaj a binoʼ» (ISAÍAS 48:17).
Jéeoba Dios, le Máax Beetmiloʼonoʼ, u kʼaj óoloʼon tubeel yéetel u yojel baʼax jeʼel u yáantkoʼoneʼ. Utiaʼal k-beetik baʼax maʼalobeʼ unaj k-ilik baʼax ku yaʼalik u Tʼaan yéetel k-tsʼáaik ichil k-kuxtal.
2. KU BEETIK U KIʼIMAKTAL K-ÓOL
«¡Kiʼimak u yóol le máaxoʼob ku chʼenxikintikoʼob yéetel ku beetkoʼob baʼax ku yaʼalik Diosoʼ!» (LUCAS 11:28).
Teʼ kʼiinoʼobaʼ u millonesil máakoʼobeʼ kiʼimak u yóoloʼob tumen ku yuʼubikoʼob u tʼaan Dios. Juntúul máak kajaʼan Españaeʼ jach séeb u tsʼíikil kaʼachi, tsʼoʼoleʼ maʼ maʼalob u tratartik u yatan mix u maasil máakoʼobiʼ. Juntéenjeakeʼ tu xokaj le baʼax tu tsʼíibtaj Moisés yoʼolal u jatsʼuts modos José, u hijo Jacoboʼ. Joséeʼ koʼon utiaʼal u meyaj bey esclavoeʼ yéetel kʼaʼal cárcel kex mix baʼal kʼaas u beetmaj. Kex beyoʼ maʼ tsʼíikilnajiʼ, tu yeʼesaj u yutsil yéetel tu chʼaʼaj óotsilil tiʼ u maasil (Génesis capítulo 37 tak 45). Le máak kajaʼan Españaoʼ tu yaʼalaj: «Le jatsʼuts modos tu yeʼesaj Joséoʼ tu yáanten utiaʼal in weʼesik utsil, in chʼaʼik óotsilil yéetel in controlarkinba. Bejlaʼeʼ maas yaan kiʼimak óolal ichil in familia».
U Tʼaan Dioseʼ ku yaʼalik bix unaj k-tratartik u maasil. Teʼ tuláakʼ xookoʼ yaan u tsoʼolol u maasil yoʼolal lelaʼ.
