¿Jeʼel wa u yantal kuxtal way Luʼum wa minaʼan Kʼiineʼ? Maʼ, tumen chéen yoʼolal le Kʼiinoʼ le cheʼoboʼ ku páajtal u yantal u leʼob, u looloʼob, u yichoʼob yéetel u semillaʼob. Tsʼoʼoleʼ ku beetik u tsʼuʼutsʼik jaʼ u moots le cheʼoboʼ, ku beetik u kʼuchul tu leʼob yéetel tu tsʼookeʼ ku beetik u saʼapʼaliʼ.

Le jaʼoʼ junpʼéel tiʼ le baʼaloʼob jatsʼutstak ku síiktoʼon Diosoʼ. Yoʼolal le jaʼoʼ ku yantal u yich le baʼaloʼob k-pakʼikoʼ. Dios beetik u kʼáaxal jaʼ, u yichankil le cheʼoboʼ, u yantal baʼal k-jaante yéetel letiʼ beetik u kiʼimaktal u yóol k-puksiʼikʼal.

Yaʼab taatatsiloʼobeʼ jach ku yilik u tsʼáaikoʼob le janal yéetel le nookʼ kʼaʼabéet tiʼ u paalaloʼoboʼ. Le Bibliaoʼ ku yaʼalik: «Jach ilawileʼex le chʼíichʼoʼob ku xikʼnaloʼob teʼ kaʼanoʼ; letiʼobeʼ maʼ tu paakʼaloʼob, maʼ tu joochoʼob mix tu líiʼskoʼob u yich u paakʼaloʼob tiʼ chʼiiloʼob. Kex beyoʼ ku tséentaʼaloʼob tumen Dios, le u Taataʼob yaan teʼ kaʼanoʼ. ¿Maʼ wa maas koʼoj a tojoleʼex tiʼ letiʼobiʼ?» (Mateo 6:25, 26).

«Kaanbalneneʼex tiʼ bix u nuuktal le looloʼob yanoʼob teʼ kʼáaxoʼ [...], kin waʼalikteʼexeʼ tak [le rey] Salomón kex jach táaj ayikʼal kaʼacheʼ maʼ tu vestirtuba jeʼex junkúul tiʼ le looloʼobaʼ. [...] Wa Dios bey u vestirtik u cheʼiloʼob yéetel u xíiwiloʼob kʼáax[eʼ] [...], ¿maʼ wa maas jeʼel u vestirkeʼexeʼ?» (Mateo 6:28-30).

Wa Dios ku tsʼáaiktoʼon nookʼ yéetel janaleʼ, jeʼel u páajtal xan u tsʼáaiktoʼon le uláakʼ baʼaxoʼob kʼaʼabéettoʼonoʼ. Letiʼeʼ yaan u tsʼáaiktoʼon le janal kʼaʼabéet wa k-beetik baʼax ku yaʼalikoʼ. Tsʼoʼoleʼ jeʼel xan u yáantkoʼon k-kaxt junpʼéel meyaj utiaʼal k-manik le baʼaxoʼob kʼaʼabéettoʼonoʼ (Mateo 6:32, 33).

¿Máasaʼ Dioseʼ jach ku náajmatik ka k-yaabilte? Letiʼeʼ yaʼab baʼaloʼob ku tsʼáaiktoʼon jeʼex le Kʼiinoʼ, le cháakoʼ, le mejen chʼíichʼoʼoboʼ yéetel le looloʼoboʼ. Teʼ tuláakʼ xookoʼ yaan k-ilik bix tsʼoʼok u tsʼáaik Dios u yojéelt le máakoʼob le baʼax ku tuklikoʼ.