Síijen Paddington (Londres, Inglaterra), junpʼéel kaaj jach yaʼab u kajnáaliloʼob. Tiʼ kajaʼanen kaʼach yiknal in maama yéetel óoxtúul in kiikoʼobeʼ. In papaeʼ yaʼab u káaltal, le oʼolal yaan kʼiin ken xiʼikeʼ maʼ tu séeb suut.

Tin paalileʼ in maamaeʼ tu kaʼansen orar táanil tiʼ in chital wenel. Yaanten kaʼach junpʼéel chan Biblia chéen u libroil Salmos ku taasik. Teneʼ kin inventartik kaʼach u paaxil utiaʼal in kʼayik. Maʼ tu tuʼubulten baʼax tin xokaj tiʼ junpʼéel libro juntéenjeak: «Bíin kʼuchuk u kʼiinileʼ maʼ tun sáastal». Bin in wenel yoʼolal le baʼax tin xokaʼ, chéen táan in tuklik kaʼach baʼax kun úuchul. Kin tuklik kaʼachi: «Maʼ in creertik wa chéen bey le kuxtalaʼ. In kʼáat in wojéelt baʼax oʼolal kuxaʼanen». ¡Maʼ in kʼáat kíimiliʼ!

Káaj in wokskinba tiʼ espiritismo. Kin wilik in tʼaan yéetel le kimenoʼoboʼ, kin bin cementerio yéetel in wéet xookoʼob yéetel k-muchʼikba k-chaʼant peliculaʼob jach kʼaastak de jaʼasaj óol. Kex ku sajakkúuntkoʼoneʼ jatsʼuts k-ilik.

Chéen 10 años yaanten pero tsʼokaʼan u káajal u kʼastal in kuxtal. Káaj in tsʼuʼutsʼik chamal yéetel suunajten vicioil. Ka tsʼoʼokeʼ káaj tak in tsʼuʼutsʼik marihuana. Once años yaanten ka tin yáax ukʼaj, kex maʼ kiʼ in wuʼuyikeʼ uts tin tʼaan in wuʼuyik kalaʼanen. Uts tin tʼaan in wuʼuyik paax yéetel in wóokʼot, cada ken béeyakeʼ kin bin tiʼ fiestaʼob wa tiʼ discotecas. Taʼakumbail in jóokʼol de áakʼab tin wotoch yéetel taʼakumbail in kaʼa okol táan u taal u sáastal. Ken in beet lelaʼ maʼatech in bin xook tumen jach kaʼanaʼanen. Tsʼoʼoleʼ ken xiʼiken escuelaeʼ mientras táan le xookoʼ táan in wukʼik.

U tsʼook año binen escuelaeʼ jach maʼ patal jóokʼik in calificacioniʼ. Como maʼ u yojel in maama kaʼach le baʼaxoʼob kʼaastak kin beetkoʼ, jach lúub u yóol yéetel tsʼíikilnaji. Baʼateltʼaanajoʼon yéetel lukʼen tin wotoch. Ka binen kajtal tsʼeʼetsʼek tiempo tu yiknal in novio Tony. Letiʼeʼ ku yookol kaʼachi, ku konik droga yéetel kʼaj óolaʼan tumen jach kʼasaʼan. Maʼ sen úuch tiʼ leloʼ embarazarnajen, chéen 16 años yaanten ka anchaj in yáax paal.

Tin kʼaj óoltaj le j-Jaajkunajoʼob tiʼ junpʼéel naj tuʼux ku kʼubéentkuba le maamatsiloʼob minaʼan u yíichamoʼoboʼ. Teʼeloʼ tsʼaʼabten junpʼéel cuarto utiaʼal in wantal yéetel in chaambal. Kaʼatúul koʼoleloʼob j-Jaajkunajoʼobeʼ suuk a taal u xíimbaltoʼob jujuntúul maamatsiloʼob x-lóoʼbayanoʼob. Junpʼéel kʼiineʼ tin woksinba ichil le tsikbal ku beetkoʼoboʼ, chéen utiaʼal in waʼaliktiʼob maʼ jaaj baʼax ku kaʼanskoʼobiʼ. Baʼaleʼ le j-Jaajkunajoʼoboʼ yéetel yaabilaj tu núukoʼobten yéetel le Biblia tuláakal le baʼax tin kʼáatoʼ. Jach utschaj tin tʼaan úuchik u yeʼeskoʼobten jatsʼuts modos. Ka túun káaj in xokik le Biblia tu yéeteloʼoboʼ.

Maʼ xáanchaj ka tin kanaj teʼ Biblia junpʼéel baʼal tu kʼexaj in kuxtaloʼ. Tin paalileʼ saajken kíimil. Pero tin kaneʼ Jesuseʼ yaan u kaʼa kuxkíintik le kimenoʼoboʼ (Juan 5:28, 29). Tin kanaj xaneʼ u yaabiltmen Dios (1 Pedro 5:7). Le baʼax ku yaʼalik Jeremías 29:11, jach kʼuch tin puksiʼikʼal. Ku yaʼalik: «Jéeobaeʼ ku yaʼalik: ‹Teneʼ in wojel baʼax ken in beet ta woʼolaleʼex, maʼ ken in taas kʼaas ta wóokʼoleʼex, baʼaxeʼ yaan in beetik u yantalteʼex jeetsʼelil, utiaʼal ka xiʼikteʼex maʼalobil yéetel utiaʼal ka béeychajak le baʼax ka páaʼtkeʼexoʼ›». Joʼopʼ in creertikeʼ yaan in kuxtal mantatsʼ tiʼ junpʼéel Paraíso way Luʼumeʼ (Salmo 37:29).

U j-jaajkunajoʼob Jéeobaeʼ jach tu yeʼesoʼobten yaabilaj. Le ka tin yáax muchʼinba tu yéeteloʼobeʼ tin wilaj jach maʼalob u biskubaʼob yéetel jatsʼuts u modosoʼob (Juan 13:34, 35). Maʼ beyoʼob jeʼex le máaxoʼob yaan teʼ Iglesia tuʼux kin bin kaʼachoʼ. Kex maʼ maʼalob bix in kuxtal kaʼacheʼ u j-jaajkunajoʼob Jéeobaeʼ maʼalob úuchik u kʼamkenoʼob. Tu jóoʼsoʼob tiempo utiaʼal u yantaloʼob tin wéetel, tu yeʼesoʼobten yaabilaj yéetel tu yáantenoʼob. Tin wuʼuyaj bey tiaʼanen ichil junpʼéel nojoch familiaeʼ.

Úuchik in xokik le Bibliaoʼ tin tsʼáaj cuenta unaj in kʼexik in kuxtal utiaʼal ka in beet baʼax uts tu tʼaan Dios. Talamchaj in pʼatik in tsʼuʼutsʼ chamal. Tin tsʼáaj cuenta xaneʼ le paax kin wuʼuyikoʼ ku taakkúunsik in tsʼuʼutsʼik marihuana, le oʼolal káaj in wuʼuyik yaanal paaxoʼob. Xuʼul in bin tiʼ fiestaʼob yéetel discotecas, tumen in wojel teʼeloʼ jeʼel u taaktal in káaltaleʼ. Tsʼoʼoleʼ joʼopʼ in biskinba yéetel máaxoʼob jeʼel u yáantkenoʼob in beet baʼax maʼalobeʼ (Proverbios 13:20).

Teʼ kʼiinoʼob xanoʼ, Tonyeʼ táan kaʼach u xokik le Biblia yéetel le j-Jaajkunajoʼoboʼ. Ka núukaʼabtiʼ yéetel le Biblia le baʼaxoʼob taak u yojéeltikoʼ, tu tsʼáaj cuenta jaaj le baʼax ku kanikoʼ. Tu beetaj kʼeexoʼob ichil u kuxtal: xuʼul u biskuba yéetel u amigoʼob jach kʼasaʼanoʼoboʼ, u yookol yéetel u tsʼuʼutsʼik marihuana. T-tsʼáaj cuenta xaneʼ utiaʼal k-meyajtik Jéeoba jeʼex u kʼáatoʼ kʼaʼabéet u tsʼoʼokol k-beel registro, yéetel k-tsʼáaik baʼax kʼaʼabéet tiʼ k-hijo. Le beetkeʼ tsʼoʼok k-beel tu añoil 1982.

Kʼajaʼanteneʼ utiaʼal in kʼexik in kuxtaleʼ kin kaxtik tiʼ U Pʼíich Tulumil Kanan yéetel ¡Despertad! * u tsikbalil u kuxtal máaxoʼob tsʼoʼok u kʼexik u kuxtaloʼob. Ken in xokeʼ jach ku líiʼsik in wóol utiaʼal u seguer in beetik baʼax maʼalob. Mantatsʼ kin kʼáatik tiʼ Jéeoba ka chúukpajak u yóol tiʼ teen. Teen yéetel Tonyeʼ okjaʼanajoʼon julio tiʼ 1982.

Wa maʼ úuchik in kʼaj óoltik Jéeobaeʼ bejlaʼa wal maʼ kuxaʼaneneʼ. Teen yéetel Tonyeʼ jach tsʼoʼok k-ilik bix u yáantkoʼon Jéeoba ken k-aktáant baʼaloʼob jach talamtak. Le baʼaxoʼob tsʼoʼok k-aktáantikoʼ ku yáantkoʼon maas confiar tiʼ Jéeoba yéetel tsʼoʼok k-ilkeʼ jach ku kanáantkoʼon (Salmo 55:22).

Jach kiʼimak k-óol úuchik k-áantik k-hijo yéetel k-hija u bisubaʼob yéetel Jéeoba. Bejlaʼeʼ kiʼimak xan in wóol tumen in wáabiloʼobeʼ táan xan u kʼaj óoltikoʼob Jéeoba.

Bejlaʼeʼ maʼatech u bin in wenel ikil in tuklik baʼax ku taal u kʼiin u yúuchul, wa yaan in kíimil. Teen yéetel in wíichameʼ jach k-tsʼaamaj k-óol k-meyajt Jéeoba. Cada semanaeʼ k-xíimbaltik tuʼux ku muchʼkuba u j-jaajkunajoʼob Jéeoba utiaʼal k-líiʼsik u yóoloʼob. K-múul jóokʼol tu yéeteloʼob utiaʼal k-tsikbalt tiʼ le máakoʼoboʼ wa ku tsʼáaik u fejoʼob tiʼ Jesuseʼ jeʼel xan u kuxtaloʼob utiaʼal mantatsʼeʼ.