Teʼ xook máanikoʼ t-ilaj jujunpʼéel baʼaloʼob tu yaʼalaj Jesús kun úuchul. Lelaʼ ku yeʼesikeʼ u Reino Dioseʼ tsʼoʼok u káajal u gobernar teʼ kaʼanoʼ yéetel Jesús u Reyil.

Le Bibliaoʼ ku yaʼalikeʼ le yáax baʼax tu beetaj Jesús ka káaj u gobernaroʼ letiʼe u jóoʼsik Satanás yéetel u demonioʼob teʼ kaʼanoʼ. Letiʼobeʼ tiaʼanoʼob way Luʼumeʼ, le oʼolal desde tu añoil 1914, tsʼoʼok u maas kʼastal tuláakal baʼal (Apocalipsis 12:7, 9).

Kex táan u bin u maas kʼastal le yóokʼol kaabaʼ, Jesús, u Reyil u Reino Dioseʼ yaʼab baʼaloʼob maʼalobtak tsʼoʼok u beetik utiaʼal u yáantik máak. Jeʼex u yaʼalmiliʼeʼ, bejlaʼeʼ letiʼeʼ táan u yilik u kaʼansaʼal u millonesil máakoʼob yéetel le Bibliaoʼ utiaʼal ka u kʼex u kuxtaloʼob (Isaías 2:2-4). Le máakoʼobaʼ tsʼoʼok u kankoʼobeʼ maʼ unaj u chʼíikiloʼob chéen meyajiʼ, unaj u yantal yaabilaj ichil u familiaʼob yéetel unaj u kiʼimaktal u yóoloʼob yéetel baʼaxoʼob yaantiʼob. Le Bibliaoʼ tsʼoʼok u yáantkoʼob utiaʼal ka xiʼik utsil tiʼob bey xan utiaʼal ka kuxlakoʼob jeʼex u páaʼtaʼal tiʼ le máaxoʼob u kʼáatoʼob antal yáanal u Reino Diosoʼ.

Jesúseʼ táan u gobernar teʼ kaʼanoʼ, chéen baʼaleʼ le Luʼumaʼ táan u gobernartaʼal tumen wíinikoʼob. Kex beyoʼ Dioseʼ tu yaʼalaj tiʼ Jesús ka gobernarnak chúumuk tiʼ u enemigoʼob (Salmo 110:2). Maʼ tun xáantaleʼ Jesúseʼ yaan u xuʼulsik tiʼ u enemigoʼob yéetel yaan u luʼsik le baʼaxoʼob beetik u muʼyaj le máaxoʼob uʼuyik u tʼaan Diosoʼ.

Maʼ tun xáantaleʼ u Reino Dioseʼ yaan u beetik le baʼaloʼobaʼ:

• Yaan u xuʼulsik le religiónoʼob maʼatech u kaʼanskoʼob u jaajiloʼ. Le Bibliaoʼ ku yaʼalikeʼ le religiónoʼob beyaʼ bey juntúul koʼolel chéen bey u máanoʼ yéetel maʼ tun xáantal kéen xuʼulsaʼak. Letiʼobeʼ tsʼoʼok u beetkoʼob u muʼyaj máak yéetel ku kaʼanskoʼob baʼaloʼob maʼ jaajtak tu yoʼolal Diosiʼ. Yaʼab máak kun jaʼakʼal u yóol kéen xuʼulsaʼaktiʼ (Apocalipsis 17:15, 16).

• Yaan u xuʼulsik u gobierno wíinik. U Reino Dioseʼ yaan u xuʼulsik tuláakal le gobiernoʼoboʼ (Apocalipsis 19:15, 17, 18).

• Yaan u xuʼulsik le máakoʼob kʼasaʼanoʼoboʼ. Le Bibliaoʼ ku yaʼalikeʼ le máaxoʼob ku beetkoʼob baʼaloʼob kʼaastak yéetel maʼ tu yuʼubikoʼob u tʼaan Diosoʼ yaan u xuʼulsaʼaloʼob (Proverbios 2:22).

• Yaan u xuʼulsik Satanás yéetel u demonioʼob. Satanás yéetel u demonioʼobeʼ maʼ tun páajtal u seguer u tuskoʼob «u kajnáaliloʼob luʼum» (Apocalipsis 20:3, 10).

¿Bix le kuxtal kun antal tiʼ le máaxoʼob kun kajtaloʼob yáanal u Reino Diosoʼ?

Jesúseʼ yaan u gobernar desde teʼ kaʼanoʼ yéetel yaʼab baʼax ken u beet yoʼolal wíinik. Tsʼoʼoleʼ yaan u yáantaʼal tumen 144.000 máakoʼob yéeyaʼanoʼob tiʼ le Luʼumaʼ (Apocalipsis 5:9, 10; 14:1, 3). Yaan u yilik ka beetaʼak baʼax uts tu tʼaan Dios way Luʼumeʼ. ¿Baʼax túun ken u beet u Reino Dios yoʼolal wíinik?

• Yaan u xuʼulsik le kʼojaʼanil yéetel le kíimiloʼ. Le Bibliaoʼ ku yaʼalik: «Mix juntúul u kajnáalil le luʼum ken u yaʼal: ‹Kʼojaʼanen›». Ku yaʼalik xan: «Maʼ tun yantal kíimil» (Isaías 33:24; Apocalipsis 21:4).

• Yaan u yantal jeetsʼelil yéetel mix máak kun sajaktal. Le Bibliaoʼ ku yaʼalik: «A paalaleʼ jach yaan u yantal jeetsʼelil tiʼob». Ku yaʼalik xan: «Cada juntúuleʼ yaan u kutal yáanal u boʼoy u pakʼal uva yéetel yáanal u boʼoy u pakʼal higo, mix máak kun beetik u sajaktaloʼob» (Isaías 54:13; Miqueas 4:4).

• Yaan u tsʼáaik meyaj tiʼ máak. Le Bibliaoʼ ku yaʼalik: «Le máaxoʼob in yéeymoʼ jach yaan u kiʼimaktal u yóoloʼob yéetel u yich u meyajoʼob. Letiʼobeʼ maʼ chéen kunel ken u tsʼáa u yóoloʼob meyajiʼ» (Isaías 65:22, 23).

• Yaan u beetik u jatsʼutstal le Luʼumaʼ. Le Bibliaoʼ ku yaʼalik: «Le desierto yéetel le luʼum jach tikinoʼ yaan u jach kiʼimaktal u yóoloʼob, le táax luʼum tuʼux mix baʼal yanoʼ yaan xan u kiʼimaktal u yóol yéetel yaan u loolankil jeʼex u loolankil le azafránoʼ» (Isaías 35:1).

• Yaan u kaʼansaʼal tiʼ le máakoʼob baʼax unaj u beetkoʼob utiaʼal u kuxtaloʼob mantatsʼoʼ. Le Bibliaoʼ ku yaʼalik: «Letiʼe baʼax kun tsʼáaik kuxtal minaʼan u xuul tiʼ le máakoʼoboʼ: ka kʼuchuk u kʼaj óoltechoʼob, teech le u juntúuliliʼ jaajil Diosoʼ, bey xan ka u kʼaj óoltoʼob Jesucristo, le máax ta túuxtoʼ» (Juan 17:3).

Dioseʼ u kʼáat ka a wil le jatsʼuts baʼaloʼob ken u beetoʼ (Isaías 48:18). Teʼ tuláakʼ xookoʼ yaan a wilik baʼax unaj a beetik utiaʼal a wilik le baʼaxoʼob ken u beet Dios maʼ tun xáantaloʼ.