1, 2. ¿Bix u yáantkoʼon k-tuukul tiʼ bix u meyaj u kaajal Jéeoba?

JACH kiʼimak k-óol k-ojéeltik tiaʼanoʼon ichil u kaajal Jéeobaeʼ. Teʼ capítulo 1 tiʼ Ezequiel yéetel teʼ capítulo 7 tiʼ Danieloʼ ku yeʼesik Jéeobaeʼ táan u nuʼuktik baʼax ku yúuchul ichil u kaajal. Jesús nuʼuktik u kaajal Dios way Luʼumeʼ. Letiʼ nuʼuktik u kʼaʼaytaʼal le maʼalob péektsiloʼ, u líiʼsaʼal u yóol le máaxoʼob ku kʼaʼaytajoʼoboʼ yéetel u yáantaʼal uláakʼ máakoʼob utiaʼal u adorartikoʼob Jéeoba. Le oʼolal jeʼel u páajtal k-jach kʼubik k-óol tiʼ u kaajal Jéeobaeʼ (Mat. 24:45).

² Unaj k-tuklik, ¿in tsʼaamaj wa in wóol in meyajt Dios jeʼex u beetik u kaajaleʼ? ¿In tsʼaamaj wa in wóol in meyajt Dios jeʼex ka káaj in meyajtikeʼ, wa tsʼoʼok u wéej xuʼulul? K-tuukul tiʼ le kʼáatchiʼobaʼ jeʼel u yáantkoʼon k-il wa láayliʼ k-tsʼaamaj k-óol k-meyajt Dios jeʼex tu káajbaleʼ wa maʼ. Unaj k-tuukul tiʼ lelaʼ tumen jeʼel u yúuchul tiʼ tuláakloʼoneʼ. Teʼ yáax siglooʼ le apóstol Pablooʼ anchaj u yaʼalik tiʼ le sukuʼunoʼob ka u kʼaʼajsoʼob bix meyajtaʼabik Dios tumen Jesusoʼ. ¿Baʼaxten? Letiʼeʼ tu yaʼalajtiʼob: «Utiaʼal túun maʼ a kaʼanaleʼex yéetel maʼ u lúubul u yóol a puksiʼikʼaleʼex» (Heb. 12:3). Le xook t-ilaj teʼ semana máanik tu yeʼesaj baʼax táan u beetik u kaajal Jéeobaoʼ tu líiʼsaj k-óol utiaʼal u seguer k-tsʼáaik k-óol k-meyajt Dios.

3. ¿Baʼax unaj k-beetik utiaʼal maʼ k-kaʼanal, yéetel baʼax ken k-il teʼ xookaʼ?

³ Pablo xaneʼ tu yaʼaleʼ unaj k-tsʼáaik k-óol k-beet «baʼax jach maʼalob» utiaʼal maʼ k-kaʼanal (Gal. 6:9). Lelaʼ tuláakloʼon unaj k-beetik. Koʼoneʼex ilik cinco baʼaloʼob jeʼel u yáantkoʼon k-meyajt Dios jeʼex u beetik u kaajaloʼ. Lelaʼ yaan u yeʼesik wa yaan baʼaloʼob unaj k-utskíintik, toʼon, wa k-familia.

4. ¿Baʼaxoʼob eʼesik táakaʼan le muchʼtáambaloʼob ichil le adoración k-tsʼáaik tiʼ Jéeobaoʼ?

⁴ Le máaxoʼob meyajtik Jéeobaoʼ suuk u muchʼkubaʼob. Yaan kʼiineʼ ku yaʼalaʼal tiʼ le angeloʼob ka u muchʼubaʼob tu táan Diosoʼ (1 Rey. 22:19; Job 1:6; 2:1; Dan. 7:10). Úuchjeakileʼ u kaajil Israeleʼ unaj u muchʼkuba utiaʼal u yuʼubik baʼax ku kaʼansaʼal (Deu. 31:10-12). Le judíoʼob teʼ yáax siglooʼ suuk u muchʼkubaʼob teʼ sinagogaʼob utiaʼal u xokikoʼob le Kiliʼich Tsʼíiboʼoboʼ (Luc. 4:16; Bax. 15:21). Le máaxoʼob tsaypacht Jesús teʼ yáax siglooʼ tu yiloʼob jach kʼaʼanaʼan xan u muchʼkubaʼob. Bejlaʼa xaneʼ le muchʼtáambaloʼoboʼ táakaʼanoʼob ichil le adoración k-tsʼáaik tiʼ Jéeobaoʼ. Toʼoneʼ k-muchʼikba utiaʼal «k-paklan áantikbaʼex utiaʼal ka yanak yaabilaj t-baatsil bey xan utiaʼal k-beetik baʼaloʼob maʼalobtak». Unaj u seguer «k-paklan líiʼsik k-óol; lelaʼ maases unaj k-beetik le táan k-ilkeʼex u náatsʼal» u kʼiinil Jéeobaoʼ (Heb. 10:24, 25).

5. ¿Bix k-paklan líiʼsik k-óol teʼ muchʼtáambaloʼoboʼ?

⁵ Junpʼéel bix k-paklan líiʼsik k-óoleʼ letiʼe ken comentarnakoʼon teʼ muchʼtáambaloʼoboʼ. Maʼ xaaneʼ utiaʼal k-eʼesik k-fejeʼ k-núukik junpʼéel kʼáatchiʼ, k-aʼalik bix jeʼel k-tsʼáaik ichil k-kuxtal junpʼéel tekstoeʼ yéetel k-tsikbaltik junpʼéel chan experiencia utiaʼal k-eʼesik ku bintoʼon utsil ken k-beet baʼax ku yaʼalik le Bibliaoʼ (Sal. 22:22; 40:9). Kex jeʼel jaypʼéel jaʼab káajak k-bin muchʼtáambaleʼ, tuláakloʼon jach ku líikʼil k-óol ken k-uʼuy u comentar le táankelmoʼoboʼ bey xan le yaan u jaʼabiloʼoboʼ.

6. ¿Bix u yáantkoʼon le muchʼtáambaloʼob utiaʼal maʼ u xuʼulul k-meyajtik Diosoʼ?

⁶ Yaan uláakʼ baʼax oʼolal mantatsʼ ku yaʼalik Jéeoba unaj k-muchʼikba. ¿Baʼaxten? Tumen le muchʼtáambaloʼob yéetel le asambleaʼoboʼ ku yáantkoʼon utiaʼal maʼ k-sajaktal kʼaʼaytaj yéetel utiaʼal maʼ u lúubul k-óol wa maʼ tu kʼaʼamal le maʼalob péektsiloʼ (Bax. 4:23, 31). Tsʼoʼoleʼ ken xakʼaltaʼak jujunpʼéel kaʼansajoʼob tiʼ le Bibliaoʼ ku maas yantal k-fe (Bax. 15:32; Rom. 1:11, 12). Le kaʼansaj ku tsʼaʼabal teʼ muchʼtáambaloʼob yéetel le k-paklan líiʼsik k-óoloʼ ku yáantkoʼon utiaʼal u yantaltoʼon kiʼimak óolal yéetel utiaʼal maʼ ‹k-chiʼichnaktal ken kʼuchuk le kʼaakʼas kʼiinoʼoboʼ› (Sal. 94:12, 13). Le Comité tiʼ Enseñanza tiʼ le Cuerpo Gobernanteoʼ letiʼ nuʼuktik le jejeláas bix u kaʼansaʼal u kaajal Jéeoba tuláakal yóokʼol kaaboʼ. Jach k-tsʼáaik u nib óolalil le kaʼansaj ku tsʼaʼabaltoʼon cada semanaoʼ.

7, 8. 1) ¿Maases baʼaxten k-bin muchʼtáambal? 2) ¿Bix u yáantkech le muchʼtáambaloʼoboʼ?

⁷ Baʼaleʼ maases k-muchʼikba utiaʼal k-adorartik Jéeoba, maʼ chéen tumen k-jóoʼsik u yutsiliʼ (xok Salmo 95:6). Jach kiʼimak k-óol tumen yaantoʼon u páajtalil k-kiʼikiʼtʼantik Dios (Col. 3:16). Letiʼeʼ ku náajaltik k-adorartik mantatsʼ, le oʼolal unaj k-bin teʼ muchʼtáambaloʼoboʼ yéetel k-táakpajliʼ (Apo. 4:11). Jéeobaeʼ ku yaʼaliktoʼon «maʼ unaj u pʼáatal maʼ k-muchʼikbaʼex jeʼex suuk u beetik jujuntúul máakoʼobeʼ» (Heb. 10:25).

⁸ ¿K-naʼatik wa bix u yáantkoʼon le muchʼtáambaloʼob utiaʼal u chúukpajal k-óol k-meyajt Jéeoba tak ken u xuʼuls le kʼasaʼan yóokʼol kaabaʼ? Wa k-naʼatik bix u yáantkoʼoneʼ yaan k-ilik tiaʼanoʼob ichil «le baʼaloʼob maas kʼaʼanaʼantakoʼ» yéetel yaan k-bin teʼ muchʼtáambaloʼob kex yaʼab baʼax yaan k-beetoʼ (Fili. 1:10). Chéen junpʼéel nojoch talamil jeʼel u beetik maʼ k-muchʼikba yéetel k-sukuʼunoʼob utiaʼal k-adorartik Jéeobaeʼ.

9. ¿Baʼax eʼesik jach kʼaʼanaʼan le kʼaʼaytajoʼ?

⁹ Ken k-tsʼáa k-óol kʼaʼaytajeʼ ku béeytal xan k-meyajtik Dios jeʼex u beetik u kaajaloʼ. Jesús káajs u kʼaʼaytik le maʼalob péektsiloʼ (Mat. 28:19, 20). Desde teʼ kʼiin jeʼeloʼ u kaajal Jéeobaeʼ maases u tsʼaamaj u yóol u kʼaʼayt le Reinooʼ yéetel u yáantik uláakʼ máakoʼob u tsaypachtoʼob Jesús. Yaʼab baʼaxoʼob uchaʼan teʼ kʼiinoʼobaʼ ku yeʼesik táan u yáantkoʼon le angeloʼob utiaʼal k-kaxtik le «máaxoʼob jach tu jaajil u kʼáatoʼob ka yanak kuxtal minaʼan u xuul tiʼoboʼ» (Bax. 13:48; Apo. 14:6, 7). Jach tu jaajil yaan u kaajal Jéeoba way Luʼumeʼ yéetel u tsʼaamaj u yóol u beet le meyajaʼ. ¿Letiʼe wa baʼax maas a tsʼaamaj a wóol xan a beetoʼ?

10. 1) Tsikbalt junpʼéel baʼax uchaʼan ku yeʼesik baʼax jeʼel u yáantkoʼon utiaʼal maʼ u xuʼulul u kiʼimaktal k-óol tu yoʼolal u jaajileʼ. 2) ¿Bix u yáantkech a jóokʼol kʼaʼaytaj utiaʼal maʼ u xuʼulul a meyajtik Dios?

¹⁰ Ken k-tsʼáa k-óol kʼaʼaytajeʼ mantatsʼ ku kiʼimaktal k-óol tu yoʼolal u jaajil. Mitchel, juntúul anciano úuch joʼopʼok u beetik u precursor regularileʼ, ku yaʼalik: «Uts tin tʼaan in tsikbaltik u jaajil tiʼ u maasil. Ken tuukulnaken tiʼ junpʼéel túumben baʼax ku taasik U Pʼíich Tulumil Kanan wa ¡Despertad! ku jaʼakʼal in wóol ken in wil bix u tsolik, tumen ku yeʼesik naʼatil [...]. Ku taaktal in jóokʼol kʼaʼaytaj utiaʼal in wilik bix kun kʼambil yéetel bix jeʼel in  beetik u taaktal u xoʼokleʼ. Le kʼaʼaytajoʼ ku yáantken in beet baʼax maas kʼaʼabéet. Wa yaan uláakʼ baʼax kʼaʼabéet in beetkeʼ, kin beetik táanil tiʼ in jóokʼol kʼaʼaytaj wa ken tsʼoʼokok». Jeʼex k-ilkoʼ wa k-chʼíikil k-beet le meyaj u tsʼaamajtoʼon Diosoʼ yaan u chúukpajal k-óol teʼ tu tsʼook kʼiinoʼobaʼ (xok 1 Corintoiloʼob 15:58).

11. ¿Baʼaxten unaj k-jóoʼsik u yutsil le jóoʼsaʼaniloʼob ku tsʼáaiktoʼon Jéeobaoʼ?

¹¹ Utiaʼal u muʼukʼaʼankúuntik k-fejeʼ, Jéeobaeʼ ku tsʼáaiktoʼon yaʼab jóoʼsaʼaniloʼob ku keʼetel yéetel janal. Maʼ xaaneʼ kʼajaʼantoʼoneʼ le ka t-xokaj junpʼéel jóoʼsaʼanileʼ, t-aʼalaj: «¡Jach letiʼe baʼax kʼaʼabéettenoʼ! ¡Bey Jéeoba beet u tsʼíibtaʼal teneʼ!». Lelaʼ ku yúuchul tumen Jéeobaeʼ ku kaʼanskoʼon yéetel ku nuʼuktikoʼon yéetel le jóoʼsaʼaniloʼoboʼ. Letiʼeʼ u yaʼalmaj: «Bíin in tsʼáatech tsolxikinoʼob; bíin in weʼestech le bej unaj a biskoʼ» (Sal. 32:8). ¿K-jóoʼsik wa u yutsil le jóoʼsaʼaniloʼob ku tsʼaʼabaltoʼonoʼ? ¿K-tuukul wa tiʼ le baʼax ku yaʼalikoʼoboʼ? Wa k-beetkeʼ yaan u chúukpajal k-óol k-meyajt Dios yéetel yaan u muʼukʼaʼantal k-fe teʼ tu tsʼook kʼiinoʼobaʼ (xok Salmo 1:1-3; 35:28 yéetel 119:97).

12. ¿Baʼax ken u yáantoʼon k-jóoʼs u yutsil le jóoʼsaʼaniloʼoboʼ?

¹² Maʼalob ka k-tukult bukaʼaj meyaj ku beetaʼal utiaʼal maʼ u xuʼulul u yantal le jóoʼsaʼaniloʼoboʼ. Le Comité tiʼ Redacción tiʼ le Cuerpo Gobernanteoʼ letiʼ ilik ka xakʼaltaʼak, ka tsʼíibtaʼak, ka maas maʼalobkíintaʼak baʼax tsʼíibtaʼan, ka tsʼaʼabak u fotoil yéetel ka suʼutuk ichil uláakʼ tʼaan tuláakal le jóoʼsaʼaniloʼob ku imprimirtaʼal yéetel ku jóokʼol tiʼ Internetoʼ. U najiloʼob Betel tuʼux ku imprimirtaʼal le jóoʼsaʼaniloʼoboʼ letiʼob túuxtik tiʼ tuláakal le múuchʼuliloʼoboʼ. ¿Baʼaxten ku beetaʼal le nojoch meyajaʼ? Ku beetaʼal utiaʼal u nuʼuktaʼal le máaxoʼob meyajtik Diosoʼ utiaʼal u chúukpajal u yóol u meyajtoʼob Jéeoba (Isa. 65:13). Le oʼolal unaj k-jóoʼsik u yutsil le jóoʼsaʼaniloʼob ku tsʼáaiktoʼon u kaajal Diosoʼ (Sal. 119:27).

13, 14. Teʼ kaʼanoʼ, ¿máaxoʼob ku múul meyajoʼob yéetel u kaajal Jéeoba, yéetel bix jeʼel k-beetik beyoʼ?

¹³ Tiʼ junpʼéel náayeʼ apóstol Juaneʼ tu yilaj Jesús u natʼmaj juntúul sak tsíimin utiaʼal u xuʼulsik le máaxoʼob ku tsʼáaikubaʼob tu contra Jéeobaoʼ (Apo. 19:11-15). Jach ku muʼukʼaʼankúuntik k-fe k-ojéeltikeʼ tu paach Jesuseʼ tiaʼan le angeloʼob chúukaʼan u yóol u meyajtoʼob Diosoʼ bey xan le sukuʼunoʼob yéeyaʼanoʼob tsʼoʼok u kʼamkoʼob le kuxtal teʼ kaʼanoʼ (Apo. 2:26, 27). Letiʼobeʼ ku yeʼeskoʼobtoʼon bix unaj k-chaʼik u nuʼuktikoʼon Jéeoba.

¹⁴ Le yaʼabkach máakoʼob xanoʼ tu jaajil u yóoloʼob ku yáantkoʼob u sukuʼunoʼob Cristo pʼaatloʼob way Luʼum táan u nuʼuktikoʼob u kaajal Diosoʼ (xok Zacarías 8:23). ¿Bix jeʼel k-múul meyaj yéetel u kaajal Jéeobaeʼ? Junpʼéel bixeʼ letiʼe k-beetik baʼax ku yaʼalik le máaxoʼob nuʼuktikoʼonoʼ (Heb. 13:7, 17). Teʼ múuchʼulil tuʼux k-bin unaj u káajal k-beetik beyoʼ. ¿K-eʼesik wa tiʼ u maasil unaj u yeʼeskoʼob tsiikil tiʼ le ancianoʼob yéetel tiʼ le meyaj ku beetkoʼoboʼ? ¿K-aʼalik wa tiʼ k-paalal ka u yeʼesoʼob tsiikil tiʼ le ancianoʼob yéetel ka u kʼáatoʼob áantaj tiʼ letiʼob ken kʼaʼabéetchajak? Maʼ unaj xan u tuʼubultoʼon k-tsikbaltik t-otoch baʼax jeʼel u páajtal k-beetik utiaʼal tsʼáaik k-donación utiaʼal u seguer u kʼaʼaytaʼal le maʼalob péektsiloʼ (Pro. 3:9; 1 Cor. 16:2; 2 Cor. 8:12.) ¿Kʼaʼanaʼan wa k-ilik u pʼáatal mantatsʼ maʼalob u Najil Reino? U kiliʼich muukʼ Jéeobaeʼ ku yantal  tuʼux ku yeʼesaʼal tsiikil yéetel tuʼux ku yúuchul múul meyaj. Le kiliʼich muukʼoʼ mantatsʼ ku yáantkoʼon utiaʼal maʼ k-kaʼanal teʼ tu tsʼook kʼiinoʼobaʼ (Isa. 40:29-31).

15. ¿Baʼaxten sáamsamal unaj k-beetik baʼax uts tu tʼaan Jéeoba?

¹⁵ Utiaʼal u chúukpajal k-óol k-meyajt Dios jeʼex u beetik u kaajaleʼ, unaj k-tsʼáaik ichil k-kuxtal le baʼaxoʼob k-kaʼansikoʼ. Le oʼolal unaj k-ilik baʼax «kʼambeʼen tu táan Yuumtsil» (Efe. 5:10, 11). Tumen j-kʼebanoʼon yéetel táan u yilik u táabsikoʼon Satanás bey xan le kʼasaʼan yóokʼol kaabaʼ, mantatsʼ unaj k-kanáantik baʼax k-beetik. Sukuʼuneʼex, k-ojel yaan jujuntúul tiʼ teʼexeʼ mantatsʼ ku kanáantik baʼax ku beetik utiaʼal maʼ u xuʼulul u biskuba yéetel Jéeoba, le oʼolal letiʼeʼ jach u yaabiltmeʼex. ¡Maʼ u xuʼulul a beetkeʼex baʼax maʼalob! Ken k-beet baʼax uts tu tʼaan Jéeobaeʼ, k-uʼuyik yaan u biilal k-kuxtal yéetel k-ojel maʼ chéen kunel k-adorartikiʼ (1 Cor. 9:24-27).

16, 17. 1) ¿Baʼax unaj k-beetik wa k-lúubul tiʼ junpʼéel nojoch kʼeban? 2) ¿Baʼax k-kanik tiʼ Ana?

¹⁶ Baʼaleʼ ¿baʼax unaj k-beetik wa k-lúubul tiʼ junpʼéel nojoch kʼeban? Tu séebaʼanil unaj k-kʼáatik áantaj. Wa k-muklik baʼax t-beeteʼ maʼ kun bintoʼon utsil. David, juntúul máax tu muklaj baʼax tu beeteʼ, tu yaʼalaj: «Kaʼalikil maʼ in [waʼal] kaʼach in kʼebaneʼ in wíinklileʼ táan kaʼach u bin u lúubul u muukʼ tu yoʼolal in áakam okʼol bul kʼiin» (Sal. 32:3). Máax ku muklik u kʼebaneʼ jach maʼ maʼalob u yuʼubikubaiʼ yéetel jeʼel u xuʼulul u biskuba yéetel Dioseʼ, baʼaleʼ «máax ku [yaʼalik] yéetel ku pʼatkeʼ bíin saʼatsaʼak u siʼipil» (Pro. 28:13).

¹⁷ Tuukulnen tiʼ baʼax úuch tiʼ Ana, * letiʼeʼ tu x-lóoʼbayanileʼ precursora regular kaʼachi. Tumen tu beetaj baʼax maʼ maʼalobeʼ, tu jochaj baʼax tu pakʼaj. Letiʼeʼ ku yaʼalik: «Jach tu chiʼichnakkúunten in conciencia. Mantatsʼ lubaʼan in wóol kaʼachi». ¿Baʼax áant utiaʼal u xuʼulul u yuʼubikuba beyoʼ? Tiʼ junpʼéel muchʼtáambaleʼ tu yuʼubaj u tsoʼolol Santiago 5:14 yéetel 15, ka tu naʼataj kʼaʼabéet áantaj tiʼ, le oʼolal tʼaanaj yéetel le ancianoʼoboʼ. Letiʼeʼ ku yaʼalik: «Le baʼax ku yaʼalik le tekstooʼ bey junpʼéel tsʼaak u tsʼaamaj Jéeoba utiaʼal u tsʼakikoʼoneʼ. Kex maʼ kiʼ u yuʼukʼuleʼ, ku tsʼakik máak. Tin beetaj le baʼax ku yaʼalik le tekstooʼ ka bin utsil ten». Bejlaʼeʼ Anaeʼ u tsʼaamaj u yóol u meyajt Jéeoba yéetel maʼ chiʼichnak u concienciaiʼ.

18. ¿Baʼax unaj k-chʼaʼtuklik k-beetik?

¹⁸ Jach kiʼimak k-óol kuxlikoʼon tu tsʼook kʼiinoʼob yéetel k-antal tu kaajal Jéeoba. Unaj k-múul bin yéetel k-familia tiʼ tuláakal le muchʼtáambaloʼoboʼ, k-múul kʼaʼaytaj utiaʼal k-kaxtik le máaxoʼob uts u puksiʼikʼaloʼoboʼ yéetel k-jóoʼsik u yutsil le jóoʼsaʼaniloʼoboʼ. Tsʼoʼoleʼ unaj k-beetik baʼax ku yaʼalik le máaxoʼob nuʼuktikoʼonoʼ yéetel unaj k-tsʼáaik ichil k-kuxtal le baʼaxoʼob k-kaʼansikoʼ. Beyoʼ yaan k-múul meyaj yéetel u kaajal Jéeoba yéetel maʼ kun xuʼulul k-beetik baʼax maʼalob.