1 Kʼaʼabéet a confiar tiʼ le Bibliaoʼ

«Tuláakal Kiliʼich Tsʼíibeʼ Jajal Dios tsʼáa tiʼ tuukul utiaʼal ka tsʼíibtaʼak, maʼalob xan utiaʼal kaʼansaj, utiaʼal kʼeyaj, utiaʼal tojkinaj.» (2 Timoteo 3:16)

¿BAʼAXTEN KU TALAMTAL? Tumen yaʼab máakoʼobeʼ ku yaʼalikoʼobeʼ le Bibliaoʼ chéen máakoʼob tsʼíibte. Yaan máaxoʼob aʼalikeʼ le baʼaxoʼob ku yaʼalikoʼ maʼ uchaʼantakoʼobiʼ yéetel uláakʼoʼobeʼ ku yaʼalikoʼobeʼ bejlaʼeʼ tsʼoʼok u pʼáatal maʼatech u yáantik máak le baʼaxoʼob ku yaʼalikoʼ.

¿BIX JEʼEL A CONFIAR TIʼ LE BIBLIAOʼ? U jaajileʼ yaʼab tiʼ le máaxoʼob aʼalik maʼ jaaj le baʼax ku yaʼalik le Bibliaoʼ, maʼ u yiloʼob wa jach jaaj le baʼax ku yaʼalikoʼoboʼ chéen ku yaʼalikoʼob tumen bey u yuʼubikoʼob u yaʼalaʼal tumen u maasiloʼ. Baʼaleʼ le Bibliaoʼ ku yaʼalikeʼ «le j-maʼ tuukuloʼ ku éejemtik tuláakal baʼax ku yaʼalaʼaltiʼ; le máax uts u tuukuloʼ ku táan óoltik tuʼux ku tsʼik u yook» (Proverbios 14:15).

Toʼoneʼ maʼ unaj k-jáan creertik le baʼaxoʼob ku yaʼalaʼaltoʼonoʼ, baʼaxeʼ unaj k-beetik jeʼex tu beetil le bereailoʼoboʼ. Le máaxoʼob meyajtik Dios yanoʼob kaʼach Berea, yaan bejlaʼa tu xamanil Greciaoʼ, maʼ chéen ku jáan creerkoʼob le baʼax ku yaʼalaʼal tumen u maasiloʼoboʼ. Baʼaxeʼ «sáamsamal tiʼ le Kiliʼich Tsʼíiboʼoboʼ» ku jach ilkoʼob wa jaaj baʼax ku kanikoʼob (Beetaʼanoʼob [Hechos] 17:11). ¿Máasaʼ maʼalob ka k-beet xan beyoʼ? Koʼoneʼex ilik kaʼapʼéel baʼaxoʼob eʼesik le Bibliaoʼ tiʼ Dios u taal yéetel jeʼel u páajtal k-confiar tiʼeʼ.

Le Bibliaoʼ ku yaʼalik u jaajil ken tʼaanak tiʼ baʼaxoʼob uchaʼantak. Desde úuchileʼ anchaj máaxoʼob aʼalikeʼ maʼ jaaj wa kuxlaj le máakoʼob yéetel wa anchaj le kaajoʼob ku chʼaʼachiʼitaʼal teʼ Bibliaoʼ. Baʼaleʼ yaʼab baʼaxoʼob tsʼoʼok u yeʼesikeʼ maʼ jaaj le baʼaxoʼob ku yaʼalaʼaloʼ yéetel jeʼel u páajtal k-confiar tiʼe baʼaxoʼob ku yaʼalik le Bibliaoʼ.

Koʼox ilik yáax upʼéel baʼax eʼesik. Le eruditoʼob kaʼachoʼ maʼatech u creertikoʼob wa jach tu jaajil anchaj le rey asirio Sargón, ku chʼaʼachiʼitaʼal teʼ Isaías 20:1. Baʼaleʼ tu jaʼabiloʼob 1840, u jaats arqueologoʼobeʼ tu yiloʼob tuʼux yaan u palacio yéetel joʼopʼ u páankoʼob. Bejlaʼeʼ, Sargoneʼ utúul tiʼ u reyiloʼob Asiria maas kʼaj óolaʼanoʼoboʼ.

Yaʼab máakoʼob xaneʼ maʼatech u creertikoʼob wa jach tu jaajil anchaj Poncio Pilato, u gobernadori Roma, le máax túuxt kíimsbil Jesusoʼ (Mateo 27:1, 22-24). Baʼaleʼ tu jaʼabil 1961 tu úuchben kaajil Cesarea (Israel) kaxtaʼab upʼéel tuunich tuʼux ku chíikpajal u kʼaabaʼ yéetel ku yaʼalikeʼ gobernador xan kaʼachi.

Upʼéel revista jach kʼaj óolaʼan, ku tʼaan yoʼolal le baʼaxoʼob uchaʼantak ku yaʼalik le Bibliaoʼ, ku yaʼalik: «Le túumben baʼaxoʼob tsʼoʼok u kaxtik le arqueologoʼoboʼ tsʼoʼok u jach eʼeskoʼobeʼ le baʼaxoʼob uchaʼantak ku yaʼalik le Úuchben yéetel le Túumben Testamentooʼ jach jaaj. Lelaʼ tsʼoʼok u yeʼesikeʼ jach anchaj le patriarcaʼob úuchjeakiloʼ, jóoʼsaʼab le israelitaʼob tu luʼumil Egiptooʼ, yéetel le máaxoʼob reinarnajoʼob taaloʼob tiʼ u chʼiʼibal Davidoʼ, u kuxtal Jesús bey xan le máaxoʼob kuxlajoʼob tu kʼiiniloʼ»  (U.S.News & World Report del 25 de octubre de 1999). Maʼ chéen yoʼolal le baʼaxoʼob ku kaxtik le arqueologoʼob unaj k-tsʼáaik fe tiʼ le Bibliaoʼ. Baʼaleʼ wa tiʼ Dios u taal le Bibliaoʼ, ¿máasaʼ u kʼáat yaʼaleʼ tuláakal le baʼaxoʼob ku yaʼalikoʼ jach jaajtak?

Le baʼaxoʼob ku yaʼalik le Bibliaoʼ jeʼel u yáantik máak ichil u kuxtaleʼ. Táanil tiʼ u yilaʼal wa yaan microbios beetik u tsaʼayal kʼojaʼanil tiʼ máakeʼ, le Bibliaoʼ úuchiliʼ u yaʼal baʼax unaj u beetik máak utiaʼal u kanáantkubaeʼ, yéetel le tsolnuʼukoʼobaʼ tak bejlaʼa jeʼel u yáantajoʼobeʼ (Levítico 11:32-40; Deuteronomio 23:12, 13). Tsʼoʼoleʼ le tsolnuʼukoʼob ku tsʼáaik le Bibliaoʼ tsʼoʼok u yáantik yaʼab familiaʼob utiaʼal ka yanak kiʼimak óolal ichiloʼob (Efesoiloʼob 5:28–6:4). Le máaxoʼob ku tsʼáaik ichil u kuxtaloʼob le baʼax ku yaʼalik le Bibliaoʼ, ku tsʼáaik u yóol u beet u meyajoʼob wa ku beetkubaʼob utúul maʼalob patrón (Efesoiloʼob 4:28; 6:5-9). U beetik xan máak le baʼaxoʼob ku yaʼalik le Bibliaoʼ ku yáantaj utiaʼal u yuʼubkuba máak maʼalob (Proverbios 14:30; Efesoiloʼob 4:31, 32; Colosailoʼob 3:8-10). Jeʼex túun k-ilkoʼ, le baʼaxoʼob ku yaʼalik Dios ichil le Bibliaoʼ jach jeʼel u yáantik máak ichil u kuxtaleʼ.

¿BAʼAX UTSILOʼOB KU TAASIK? Le Bibliaoʼ «ku beetik u yantal naʼat tiʼ le máax óotsil u naʼateʼ» yéetel ku nuʼuktik u kuxtal (Salmo 19:7). Tsʼoʼoleʼ chéen le Biblia jeʼel u yáantkoʼon kʼaj óolt tubeel Dios utiaʼal ka muʼukʼaʼanchajak k-fejoʼ, lelaʼ letiʼe baʼax ken k-kan teʼ tuláakʼ xookoʼ.

Utiaʼal a wojéeltik u maasileʼ ilawil le kaʼapʼéel xookil tiʼ le libro ¿Baʼax jach tu jaajil ku kaʼansik le Bibliaoʼ?, * ku kʼaabaʼtik «Le Bibliaoʼ tiʼ Dios u taal».

[Tsolajiloʼob]