Ilawil a natsʼkaba tiʼ Dios

¿Jeʼel wa k-beetik u kiʼimaktal wa u lúubul u yóol Jéeobaeʼ?

¿JEʼEL wa k-beetik u kiʼimaktal u yóol wa u lúubul u yóol Jéeobaeʼ? Jujuntúul filosofoʼob kuxlajoʼob úuchjeakileʼ ku yaʼalikoʼobeʼ Dioseʼ maʼ tu yaatal u yóol mix tu kiʼimaktal u yóol yoʼolal baʼaxoʼob k-beetik. Baʼaleʼ le Bibliaoʼ ku kaʼanskeʼ Jéeobaeʼ jeʼel u lúubul wa u kiʼimaktal u yóol yoʼolal baʼaxoʼob k-beetkeʼ. Koʼox xakʼaltik le baʼax ku yaʼalik le versículo 40 yéetel 41 tiʼ le Salmo 78.

Le salmoaʼ ku yeʼesik bix tu yuʼubiluba Jéeoba yoʼolal le baʼaxoʼob tu beetaj le israelitaʼob úuchjeakiloʼ. Ka tsʼoʼok u jóokʼloʼob tu luʼumil Egiptoeʼ, Jéeobaeʼ tu yaʼalajtiʼob wa u kʼáat u beetoʼob junpʼéel pacto tu yéetel, lelaʼ yaan u beetik u maas biskubaʼob xan kaʼach tu yéetel. Wa ku tsʼoʼokbeskoʼobeʼ yaan kaʼach u kʼuchul u beetubaʼob junpʼéel «yéeybil kaajal ichil tuláakal kaajoʼob» yéetel yaan u táakpajloʼob utiaʼal u béeychajal baʼax u tukultmaj Dios u beetik. Letiʼobeʼ tu yaʼaloʼob jeʼel u beetkoʼobeʼ, baʼaleʼ ¿tu tsʼoʼokbesoʼob wa? (Éxodo 19:3-8.)

Le salmistaoʼ ku yaʼalik: «¡Bukaʼaj u téenel maʼ tu [yuʼubaj tʼantoʼob] [...] teʼ [desiertooʼ]!» (versículo 40). Tu yaʼalaj xaneʼ: «Tu túuntajoʼob u yóol tu kaʼatéen» (versículo 41). Le baʼax tsʼíibtaʼabaʼ ku yeʼesikeʼ mantatsʼ maʼ tu yuʼuboʼob u tʼaan Diosiʼ. Xuʼul u yeʼeskoʼob tsiikil tiʼ Dios le maʼ úuch jóoʼsaʼakoʼob tu luʼumil Egiptooʼ. Tiʼ káaj u tsʼáaikubaʼob tu contra Diosiʼ, yéetel le baʼax tu beetoʼobaʼ tu tsʼáajoʼob naʼatbileʼ Dioseʼ maʼ tu páajtal yéetel maʼ u kʼáat u kanáantoʼobiʼ (Números 14:1-4). Junpʼéel libro ku meyaj tiʼ máaxoʼob ku sutkoʼob le Biblia ichil uláakʼ tʼaanoʼoboʼ, ku yaʼalikeʼ le tʼaanoʼob «maʼ tu [yuʼubaj tʼantoʼoboʼ]», jeʼel u páajtal xan u suʼutul bey «tu chichkúuntaj u puksiʼikʼaloʼob tu contra Dios» wa «tu yaʼaloʼob maʼ tiʼ Dios». Kex beyoʼ tu yoʼolal u chʼaʼ óotsilileʼ, Jéeobaeʼ ken u yil tsʼoʼok u arrepentiroʼobeʼ ku perdonartikoʼob kaʼach. Baʼaleʼ ken máanak kʼiineʼ ku kaʼa tsʼáaikubaʼob tu contra. Mantatsʼ tu beetoʼob tiʼ Dios beyaʼ (Salmo 78:10-19, 38).

¿Bix u yuʼubikuba kaʼach Jéeoba ken u yil u beetik u kaajal beyaʼ? Le versículo 40 ku yaʼalikeʼ «tu beetajoʼob u muʼyaj». Uláakʼ Bibliaeʼ ku yaʼalikeʼ letiʼobeʼ «tu beetoʼob u okʼomtal u yóol» Dios. Junpʼéel libro ku tʼaan tiʼ baʼaxoʼob ku yaʼalik le Bibliaoʼ ku yaʼalikeʼ: «Teʼelaʼ u kʼáat u yaʼaleʼ u modos le hebreoʼoboʼ ku taaskoʼob muʼyajil jeʼex le ku yuʼubik le taatatsiloʼob ken pʼáatak maʼatech u yuʼubik tʼaan u paaleʼ». Jeʼex u muʼyaj juntúul taatatsil ken pʼáatak maʼatech u yuʼubaʼal u tʼaaneʼ le israelitaʼob maʼ tu yuʼuboʼob tʼaanoʼ «¡ku okʼomkíintikoʼob u yóol u kiliʼichil Israel!» kaʼach (versículo 41).

¿Baʼax ku kaʼansiktoʼon le salmoaʼ? Yáaxeʼ ku kaʼansik toʼoneʼ Jéeobaeʼ jach u yaabiltmaj le máaxoʼob meyajtikoʼ yéetel maʼatech u jáan tuklik wa maʼ tun suutoʼob ichil u kaajal wa ku náachtaloʼob tiʼ. K-ojéeltik lelaʼ jach ku líiʼsik k-óol. Tsʼoʼoleʼ t-ilaj xaneʼ le baʼaxoʼob k-beetkoʼ jeʼel u kiʼimakkúuntik wa u lúuʼsik u yóol Jéeobaeʼ. K-ojéeltik lelaʼ ¿máasaʼ ku beetik u taaktal k-beetik baʼax maʼalob?

Le oʼolaleʼ utiaʼal maʼ k-beetik u yaatal u yóol Dioseʼ, unaj k-beetik baʼax maʼalob yéetel k-kiʼimakkúuntik u yóol. Lelaʼ, letiʼe baʼax u kʼáat letiʼ ka k-beetoʼ. Proverbios 27:11 ku yaʼalik toʼon: «In xibil paal, yanak a wojéelajil utiaʼal a beetik u kiʼimaktal in wóol». Le siibal maas nojoch jeʼel u tsʼaʼabal tiʼ Jéeoba tumen le máaxoʼob meyajtikoʼ letiʼe u yuʼubaʼal u tʼaan utiaʼal u kiʼimakkúuntaʼal u yóoloʼ.

[Uláakʼ baʼax ku tsoʼolol teʼ táan juʼun 27]

Le siibal maas nojoch jeʼel u tsʼaʼabal tiʼ Jéeoba tumen le máaxoʼob meyajtikoʼ letiʼe u yuʼubaʼal u tʼaan utiaʼal u kiʼimakkúuntaʼal u yóoloʼ