¡JACH jaaj! Le kuxtalaʼ yaʼab «yaj óolal yéetel meyaj» ku taasik. Maʼ xaaneʼ ka tuklik: «¿Jach wa tu jaajil jeʼel u yantalten kiʼimak óolaleʼ?».

Koʼox tʼaan tiʼ Maria. Kaʼach tu x-lóoʼbayanileʼ yaʼab baʼax ku beetik, baʼaleʼ beora yaan 84 jaʼaboʼob tiʼaʼ chéen kʼaalal tu yotoch. Loʼobaleʼ yaʼab baʼaxoʼob taak u beetik, baʼaleʼ minaʼan u muukʼil tiʼ. ¿Jeʼel wa u yaʼalik kiʼimak u yóoleʼ?

¿Kux túun teech? ¿Ka wuʼuyik wa minaʼan kiʼimak óolal ichil a kuxtal? Maʼ xaaneʼ talam yéetel nak óol le meyaj ka beetkoʼ. Kex ka kíimskaba meyajeʼ ka wuʼuyik bey mix máak chʼaʼik en cuentaeʼ. Tsʼoʼoleʼ kex chan maʼalob u bintech bejlaʼeʼ saajkech tiʼ baʼax kun úuchul sáamal. Yaan kʼiineʼ ku lúubul a wóol yéetel ka wuʼuyik bey mix máak áantkecheʼ. Maʼ xaaneʼ tak ta wotoch ku yantal kʼuuxilil yéetel baʼatelil. Maʼ xaan xaneʼ yaan máax tsʼoʼok u kíimil tech. Bey úuchik tiʼ André, juntúul máak jach maʼalob u biskuba kaʼach yéetel u taata. Le ka téek kʼojaʼanchaj yéetel ka kíim u taataeʼ jach yaachaj tu yóol. Tu tukleʼ mix bikʼin kun kaʼa kiʼimaktal u yóol.

Kex jeʼel baʼalak talamil táan k-muʼyajtikeʼ tuláakloʼon kʼaʼabéet k-ojéeltik wa jeʼel u páajtal u yantaltoʼon kiʼimak óolaleʼ. Wa k-kʼaʼajsik bix kuxlajik Jesucristo kex walajki 2,000 jaʼaboʼobeʼ yaan k-ilik jeʼel u páajtaleʼ. Jesuseʼ kex yaʼab talamil anchajtiʼeʼ tu yuʼubaj kiʼimak óolal. Wa k-beetik jeʼex letiʼeʼ jeʼel k-kuxtal xan ich kiʼimak óolaleʼ.