ILAWIL A NATSʼKABA TIʼ DIOS
«Maʼ u xuʼulul a kʼáatkeʼex [...] yaan u tsʼaʼabalteʼex»
«Yuumtsil, kaʼansoʼon orar.» (Lucas 11:1.) Le tʼaanoʼobaʼ tiʼ Jesús aʼalaʼab tumen juntúul u disipulo. Utiaʼal u núukikeʼ Jesuseʼ tu tsikbaltaj kaʼapʼéel kettʼaanoʼob ku yeʼesiktoʼon bix unaj k-orar utiaʼal ka uʼuyaʼakoʼon. Wa yaan kʼiin ka wuʼuyik bey maʼ tu yuʼubaʼal a oración tumen Dioseʼ, jatsʼuts ken a wil le baʼax tu yaʼalaj Jesusaʼ. (Xok Lucas 11:5-13.)
Le yáax kettʼaanoʼ ku tʼaan tiʼ le máax ku oraroʼ (Lucas 11:5-8). Ku yaʼalikeʼ juntúul máakeʼ tsʼoʼok u jach áakʼabtal ka kʼuch u yuʼulab yéetel minaʼan mix baʼal u tsʼáa u jaante. Le máakaʼ jach kʼaʼanaʼan u yilik u tsʼáaik baʼax kʼaʼabéet tiʼ u yuʼulab. Kex tsʼoʼok u yáakʼabtaleʼ bin u páay waaj tiʼ u amigo. Tu káajbaleʼ u amigoeʼ maʼ tu líikʼil tumen maʼ u kʼáat u yajs u paalaliʼ. Baʼaleʼ le máakoʼ maʼ xuʼul u tʼaaniʼ, tak ka jóokʼ u amigo u tsʼáaiktiʼ le baʼax ku kʼáatkoʼ. *
¿Baʼax k-kanik yoʼolal le oracionoʼ? K-kanikeʼ maʼ unaj u xuʼulul k-kaaxaniʼ, k-kʼáatik wa baʼax yéetel k-kʼopik joonaj (Lucas 11:9, 10). ¿Baʼaxten? ¿Tu yóotaj wa u yaʼal Jesús le ken orarnakoʼoneʼ bey táan k-kʼoʼokʼopik u joonaj juntúul Dios maʼ u kʼáat u yuʼuboʼoneʼ? Maʼ. Jesuseʼ táan u yaʼalikeʼ Dioseʼ maʼ jeʼex le amigo maʼ tu yóotik áantaj kaʼachoʼ, baʼaxeʼ Dioseʼ jach taak u yáantik le máaxoʼob ku oraroʼob tu jaajil u yóoloʼoboʼ. Ken orarnakoʼon yaʼab u téeneleʼ k-eʼesik yaan k-fe. Wa mantatsʼ táan k-kʼáat óoltik tiʼ wa baʼaxeʼ —wa maʼ tu bin tu contra baʼax u kʼáateʼ— k-eʼesik jach tu jaajil kʼaʼabéettoʼon yéetel jach tu jaajil k-creertik jeʼel u tsʼáaiktoʼoneʼ (Marcos 11:24; 1 Juan 5:14).
Le u kaʼapʼéel kettʼaanoʼ ku tʼaan yoʼolal Jéeoba le Máax uʼuyik payalchiʼoʼ (Salmo 65:2). Jesuseʼ tu yaʼalaj: «¿Máax taatatsilil ichileʼex ku tsʼáaik juntúul kaan tiʼ u hijo ken u kʼáat juntúul kay? ¿Wa ku kʼáatik xan junpʼéel jeʼeʼ, jeʼel wa u tsʼáaik juntúul síinaʼan tiʼeʼ?». Mix juntúul taatatsil jeʼel u tsʼáaik tiʼ u paalal junpʼéel baʼal jeʼel u beetik loob tiʼeʼ. Tsʼoʼoleʼ Jesuseʼ tu tsolaj le kettʼaan beyaʼ: wa le taatatsiloʼob kex kʼebanoʼob ku tsʼáaikoʼob «maʼalob baʼaloʼob» tiʼ u paalaleʼ, «¿kux túun le Taata yaan teʼ kaʼanoʼ?, ¿maʼ wa maas jeʼel u tsʼáaik kiliʼich muukʼ [le maas maʼalob siibal] tiʼ le máaxoʼob kʼáatiktiʼoʼ?» (Lucas 11:11-13; Mateo 7:11). *
Dioseʼ u kʼáat u tsʼáa baʼax ku kʼáatik le máaxoʼob yaan u fejoʼoboʼ
Yéetel le kettʼaanaʼ Jesuseʼ ku kaʼansiktoʼoneʼ Jéeoba, le Máax uʼuyik le payalchiʼoboʼ, bey juntúul taatatsil u kʼáat u tsʼáa baʼax kʼaʼabéet tiʼ u paalaleʼ. Le beetkeʼ jeʼel u páajtal k-náatsʼal yiknal Jéeoba utiaʼal ka u yáantoʼoneʼ. Tsʼoʼoleʼ tumen k-ojel u kʼáat ka xiʼiktoʼon utsileʼ jeʼel baʼaxak ka u yaʼaltoʼoneʼ k-kʼamik yéetel kiʼimak óolal kex wa maʼ jach letiʼeʼ baʼax táan k-páaʼtik kaʼachoʼ. *
U XOOKIL LE BIBLIA UTIAʼAL ABRILOʼ:
^ xóot’ol 2 Le kettʼaan tu yaʼalaj Jesusoʼ ku yeʼesik bix u kuxtal le judíoʼob teʼ kʼiinoʼoboʼ. Letiʼobeʼ jach kʼaʼanaʼan u yilik u kʼamik u yuʼulaboʼob. Baʼaleʼ le familiaʼoboʼ ku beetkoʼob waaj chéen utiaʼal junpʼéel kʼiin, le oʼolaleʼ yaan kʼiineʼ ku kʼaʼabéettal u páayikoʼob. Wa óotsiloʼobeʼ tuláakloʼob ku chitaloʼob wenel yóoʼ piso ichil junpʼéeliliʼ naj.
^ xóot’ol 4 Utiaʼal u yeʼesik baʼax maas maʼalobeʼ Jesuseʼ yaʼab u téenel tu yaʼalaj beyaʼ: «¿Maʼ wa maas jeʼel...?». Juntúul máak xoknajaʼaneʼ bey tu yaʼalilaʼ: «Wa jaaj le A, maas jaaj túun le B».
^ xóot’ol 5 Utiaʼal a wojéeltik u maasil yoʼolal bix jeʼel u yuʼubaʼal a oración tumen Dioseʼ, ilawil u 17 xookil le libro ¿Baʼax jach tu jaajil ku kaʼansik le Bibliaoʼ?, beetaʼan tumen u j-jaajkunajoʼob Jéeoba.
