Desde tin chichnileʼ jach jatsʼuts in wilik le cheʼob yéetel le uláakʼ baʼaloʼob yaan way Luʼumeʼ. Suuk kaʼach k-xíimbal teʼ jatsʼuts kʼáaxoʼob yéetel lagunaʼob yaan naatsʼ tin wotoch, tu kaajil Jyväskylä, tu chúumukil Finlandiaoʼ. Uts tin wich kaʼach le baʼalcheʼoboʼ; ken in wil juntúul miis wa juntúul peekʼeʼ ku taaktal in méekʼik. Kʼajaʼanteneʼ táaj in pʼeek u beetaʼal u muʼyaj le baʼalcheʼoboʼ. Ka máan kʼiineʼ múul meyajnajen yéetel máakoʼob defendertik u derecho le baʼalcheʼoboʼ; bey tin kʼaj óoltil máakoʼob ku tuukuloʼob jeʼex teneʼ.

Mantatsʼ táan k-kanáantik kaʼach u derecho le baʼalcheʼoboʼ. K-tʼoxik juʼunoʼob yéetel k-muchʼikba utiaʼal k-jóokʼol k-aʼal maʼ u koʼonol u kʼéewelil baʼalcheʼob mix u beetaʼal experimentoʼob tu yéeteloʼob. Hasta t-beetaj uláakʼ organización utiaʼal k-defendertik le baʼalcheʼoboʼ. Yoʼolal le bix k-meyajoʼ mantatsʼ yaantoʼon talamil kaʼach yéetel le autoridadoʼoboʼ. Yaʼab u téenel bisaʼaben cárcel.

Maʼ chéen kin tuukul yoʼolal le baʼalcheʼoboʼ; kin chiʼichnaktal xan yoʼolal uláakʼ talamiloʼob yaan way yóokʼol kaabeʼ. Ka máan kʼiineʼ táakpajen tiʼ Amnistía Internacional, Greenpeace yéetel uláakʼ organizacionoʼob jeʼex leloʼobaʼ. Jach tin xupinba meyaj tu yéeteloʼob. Tin wáantaj le óotsiloʼoboʼ, le wiʼijoʼoboʼ yéetel tuláakal le máaxoʼob kʼaʼabéet áantaj tiʼoboʼ.

Jujunpʼíitil tin tsʼáaj cuentaeʼ maʼ tu páajtal in kʼexik le yóokʼol kaabaʼ. Le organizacionoʼobaʼ ku yutskíintikoʼob le mejen talamiloʼoboʼ, baʼaleʼ le talamiloʼob maas nuuktakoʼ chéen ku maas kʼastaloʼob. In tiaʼal teneʼ tuláakal baʼal tiaʼan tu kʼab le Kʼaasilbaʼaloʼ yéetel mix máak beetik u cuentail baʼax ku yúuchul. Kin wuʼuyik kaʼach mix baʼal ku páajtal in beetik.

Le ka tin wilaj beyoʼ káaj in tuukul tiʼ Dios yéetel tiʼ le Bibliaoʼ. Teneʼ yáax xooknajaʼanen yéetel u j-jaajkunajoʼob Jéeoba. Kex jatsʼuts in wilik  kaʼach bix u modosoʼob yéetel kex utsoʼob tin wéeteleʼ, kin wuʼuyik kaʼach maʼ tu páajtal in kʼexik in kuxtal. Baʼaleʼ beoraaʼ maʼ bey tin wuʼuyiliʼ.

Tin chʼaʼaj in Bibliaeʼ ka káaj in xokik. Tin wuʼuyaj bey tsʼaak in tiaʼaleʼ. Tin wileʼ teʼ Bibliaoʼ yaʼab tuʼux ku yeʼesik unaj k-kanáantik le baʼalcheʼoboʼ. Óoliʼ jeʼex Proverbios 12:10, ku yaʼalik: «Le utsul máakoʼ ku kanáantik u yalakʼ baʼalcheʼob». Tin tsʼáaj cuenta xaneʼ maʼ Dios beetik u yantal le talamiloʼob teʼ yóokʼol kaabaʼ. Baʼaxeʼ wíinik beetik u maas yantal talamil ikil maʼ tu yuʼubik u tʼaan Dios. Jach kiʼimakchaj in wóol ka tin kanaj bix u yaabilaj yéetel u chúukaʼan óolal Jéeoba (Salmo 103:8-14).

Teʼ kʼiinoʼoboʼ tin kaxtaj junpʼéel cuponeʼ ka tin kʼáataj le libro ¿Baʼax jach tu jaajil ku kaʼansik le Bibliaoʼ? Maʼ xáanchaj ka xíimbaltaʼaben tumen juntúul j-Jaajkunaj yéetel u yataniʼ, ka káaj u tsʼáaikoʼobten xook. Káaj xan in bin muchʼtáambal teʼ Najil Reinooʼ. Tuláakal lelaʼ tu beetaj in yaabiltik le baʼax kin kanik teʼ Bibliaoʼ.

Yoʼolal le Bibliaoʼ páajchaj in beetik yaʼab kʼeexoʼob ichil in kuxtal. Xuʼul in tsʼuʼutsʼik chamal yéetel in sen ukʼik alcohol. Tin kʼexaj bix in vestirkinba, bix in tʼaan, yéetel joʼopʼ xan in weʼesik tsiikil tiʼ le autoridadoʼoboʼ (Romanos 13:1). Kaʼacheʼ suuk in máan yéetel koʼoleloʼob yéetel in beetik uláakʼ baʼaloʼob kʼaastak, baʼaleʼ tin pʼataj xan.

Baʼax maas talamchajteneʼ letiʼe in kʼexik bix in wilik le organizacionoʼob tuʼux kin táakpajal kaʼachoʼ. Tu káajbaleʼ tin wuʼuyaj bey táan in traicionartik le organizacionoʼob wa ka in pʼatoʼoboʼ. Baʼaleʼ kʼuch in naʼateʼ chéen u Reino Dios ken u yutskíint u talamiloʼob le yóokʼol kaabaʼ. Le oʼolal tin chʼaʼtuklaj in beetik tuláakal le ku páajtal utiaʼal in kʼaʼaytik u Reino Dios yéetel in wáantik uláakʼ máakoʼob ka kaanbalnakoʼob tu yoʼolal (Mateo 6:33).

Kaʼach táan in wáantaj ichil jujunpʼéel organizacionoʼobeʼ, in tiaʼal teneʼ chéen kaʼa jaats máakoʼob yaniʼ —kʼasaʼanoʼob yéetel utsoʼob—, yéetel listoen utiaʼal in líikʼil tu contra le kʼasaʼanoʼoboʼ. Baʼaleʼ yéetel u yáantaj le Bibliaoʼ xuʼul in pʼektik máakoʼob, yéetel káaj in kanik in weʼes yaabilaj tiʼ tuláakal máak jeʼex tu kaʼansilak Cristooʼ (Mateo 5:44). Junpʼéel baʼax kin beetik utiaʼal in weʼesik le yaabilajaʼ letiʼe in kʼaʼaytik le maʼalob péektsiloʼ. Jach kiʼimak in wóol in wilkeʼ le jach maʼalob meyajaʼ ku taasik jeetsʼelil, kiʼimak óolal yéetel esperanza tiʼ le máakoʼoboʼ.

Bejlaʼeʼ jeetsʼel u yóol in puksiʼikʼal, tumen le baʼaxoʼob chiʼichnakkúuntiken kaʼachoʼ tsʼoʼok in pʼatik tu kʼab Jéeoba. In wojleʼ Dios, le Máax beetmil tuláakal baʼaloʼ, maʼ mantatsʼ ken u chaʼa u maltratartaʼal baʼalcheʼob yéetel wíinikoʼobiʼ mix ken u chaʼa u xuʼulsaʼal le jatsʼuts Luʼumaʼ. Baʼaxeʼ yéetel u Reinoeʼ maʼ kun xáantal ken u yutskíint tuláakal le baʼaxoʼob tsʼoʼok u kʼaskúuntaʼaloʼ (Isaías 11:1-9). Jach kiʼimak in wóol úuchik in kanik u jaajil, yéetel kiʼimak in wóol in wáantik le máakoʼob utiaʼal ka u kanoʼoboʼ. Xuʼul in tuklik kʼaʼabéet in kʼexik le yóokʼol kaabaʼ.