Le ka chʼuykíintaʼab Jesús yéetel le kaʼatúul kʼasaʼan máakoʼob utiaʼal u kíimsaʼaloʼoboʼ, teʼ Evangelioʼoboʼ ku yaʼalaʼal baʼax úuchi: «Le judíoʼoboʼ tu kʼáatoʼob tiʼ Pilato ka kaʼachak u yook le máakoʼob tsʼaʼanoʼob teʼ cheʼoʼ yéetel ka éemsaʼak u wíinkliloʼob» (Juan 19:31).

U ley le judíoʼoboʼ ku yaʼalikeʼ u wíinklil juntúul kʼasaʼan máak ku kíimsaʼal teʼ cheʼoʼ «maʼ u najmal u pʼáatal bul áakʼab[iʼ]» (Deuteronomio 21:22, 23). Le judíoʼoboʼ bey wal u beetkoʼob xan ken kíimsaʼak wa máax tiʼ cheʼ tumen le romanoʼoboʼ. Wa ku kaʼachal u yookoʼobeʼ ku séebtal u kíimloʼob utiaʼal ka muʼukukoʼob táanil tiʼ u káajal sábado, le ken tʼúubuk le Kʼiinoʼ.

U suukileʼ utiaʼal u chʼuykíintaʼal máak tiʼ cheʼeʼ ku baʼajal clavos tu kʼaboʼob yéetel tu yookoʼob. Ken waʼakúuntaʼak le cheʼoʼ ku chʼuytal u wíinklil teʼ clavosoʼ. ¡Bukaʼaj yajil waleʼ! Utiaʼal u chʼaʼik u yiikʼeʼ ku jetsʼik u muukʼ tiʼ le clavos bajaʼan tu yookoʼoboʼ. Baʼaleʼ ken kaʼachak u yookoʼobeʼ maʼ tu páajtal u beetik leloʼ. Wa maʼ tu kíimil yoʼolal u yajileʼ ku kíimil tumen ku kuʼupul u yiikʼ.

Le yúuntunoʼ letiʼe nuʼukul meyajnaj tiʼ David utiaʼal u kíimsik nuxiʼ Goliatoʼ. Maʼ xaaneʼ Davideʼ tu kanaj chʼiin yéetel yúuntun le táan u kanáantik tamanoʼob tu paaliloʼ (1 Samuel 17:40-50).

Teʼ kʼiinoʼob xanoʼ le yúuntunoʼ suuk u meyaj tiʼ le egipcioʼob yéetel tiʼ le asirioʼoboʼ; bey u chíikpajal teʼ dibujoʼob tu beetoʼob yóoʼ tuunichoʼ. Le yúuntunoʼ ku beetaʼal kaʼach yéetel junxéetʼ kʼéewel wa nookʼ kʼaxaʼan u tséelikoʼob yéetel junxéetʼ suum. Ichil le chan xéetʼ nookʼ wa kʼéeweloʼ tiʼ ku tsʼaʼabal junpʼéel chan tuunich wóolis yéetel tsʼitsʼitkil kex 5 wa 7.5 centímetros u nojchil, yéetel kex 250 gramos u aalil. Ku maʼachal u suumileʼ ku pirinsuttaʼal kaʼanal, tsʼoʼoleʼ ku jáalkʼabtaʼal junpʼéel tiʼ le suumoʼoboʼ, beyoʼ le tuunichoʼ chich u chʼiin teʼ tuʼux u kʼáat máakoʼ.

Teʼ luʼumoʼob yaan Lakʼinoʼ tsʼoʼok u kaxtaʼal yaʼab u tuunichiloʼob yúuntun meyajnaj úuchjeakil teʼ baʼateltáambaloʼoboʼ. U chʼiin le soldadoʼob jach noʼojaʼanoʼoboʼ jeʼel u chukik 160 wa tak 240 kilómetros por horaeʼ. Le investigadoroʼoboʼ maʼ jach u yojloʼob wa le yúuntunoʼ yaan u páajtalil jeʼex le arcooʼ, baʼaleʼ u jaajileʼ le yúuntunoʼ láayliʼ jeʼel u kíimsaj xaneʼ (Jueces 20:16).