Utiaʼal maʼ u xuʼulul u biskuba kaʼatúul amigoʼobeʼ, ku yilik u tsikbaloʼob tiʼ teléfono, tiʼ correo electrónico wa tiʼ carta. Utiaʼal k-bisikba xan yéetel Dioseʼ mantatsʼ unaj k-tsikbal tu yéetel. Baʼaleʼ ¿bix jeʼel k-beetkeʼ?

Yéetel le oracionoʼ. Baʼaleʼ k-tsikbal yéetel Dioseʼ maʼ jeʼex ken tsikbalnakoʼon yéetel k-éet wíinikileʼ. Kʼaʼabéet k-naʼatikeʼ ken orarnakoʼon tiʼ Dioseʼ táan k-tsikbal yéetel le Máax maas yaan u páajtaliloʼ, le oʼolal unaj k-beetik yéetel tsiikil. Tsʼoʼoleʼ utiaʼal u yuʼubikoʼoneʼ unaj k-orar jeʼex u kʼáateʼ. Koʼox ilik óoxpʼéel baʼax ku kʼáatik.

Yáaxeʼ, maʼ unaj k-orar tiʼ Jesusiʼ, mix tiʼ junpʼéel imagen mix tiʼ le «santoʼoboʼ», baʼaxeʼ chéen tiʼ Jéeoba Dios (Éxodo 20:4, 5). Le Bibliaoʼ ku yaʼalik: «Maʼ a sen chiʼichnaktaleʼex tu yoʼolal mix baʼal, baʼaxeʼ tiʼ tuláakal baʼaleʼ, ich oración bey xan ich kʼáat óolal junmúuchʼ yéetel a tsʼáaikeʼex graciaseʼ, aʼaleʼex tiʼ Dios» (Filiposiloʼob 4:6). U kaʼapʼéeleʼ, ken orarnakoʼoneʼ unaj k-beetik tu kʼaabaʼ Jesucristo, u Paal Dios. Jesuseʼ bey tu yaʼaliloʼ: «Mix máak ku náatsʼal tu yiknal le Taata wa maʼ tin woʼolaloʼ» (Juan 14:6). U yóoxpʼéeleʼ, ken k-kʼáat tiʼ Dios wa baʼaxeʼ unaj k-kʼáatik jeʼex uts tu tʼaaneʼ. Le Bibliaoʼ ku yaʼalik: «Jeʼel baʼalak ka k-kʼáattiʼ jeʼex uts tu tʼaaneʼ, letiʼeʼ yaan u yuʼubik» (1 Juan 5:14). *

Baʼaleʼ kaʼatúul amigoʼobeʼ jeʼel u xuʼulul u biskubaʼob wa chéen juntúul tiʼ letiʼob ku tʼaaneʼ. Le oʼolaleʼ tu kaʼatúulal unaj u kaxtikoʼob u súutukil u tʼaanoʼob yéetel u súutukil u yuʼubikoʼob baʼax ku yaʼalaʼaltiʼob. Toʼon xaneʼ unaj k-uʼuyik baʼax ku yaʼaliktoʼon Dios ken u tʼanoʼon. Baʼaleʼ ¿bix u tʼankoʼon?

Bejlaʼeʼ ku tʼankoʼon yéetel le Bibliaoʼ (2 Timoteo 3:16, 17). Utiaʼal k-naʼatik leloʼ, koʼox tuklikeʼ juntúul a amigoeʼ ku túuxtiktech junpʼéel carta. Ken a xokeʼ, ¿máasaʼ ka wuʼuyik bey jach a amigo ku tʼaaneʼ? Bey túun xanoʼ ken k-xok le Bibliaoʼ u jaajileʼ Dios tʼankoʼon. Gina, le máax tsʼoʼok k-yáax aʼalikoʼ, ku yaʼalik: «Wa in kʼáat ka u yilen Dios bey u amigaeʼ, unaj in xokik ‹u carta›, le Bibliaoʼ». Ku yaʼalik xan: «In xokik sáamsamal le Bibliaoʼ tsʼoʼok u maas natsʼken tiʼ Dios». Techeʼ ¿ka xokik wa sáamsamal le Bibliaoʼ? Wa beyoʼ yaan a wuʼuyik bey táan u tʼankech Dioseʼ yéetel yaan a maas natsʼkaba tiʼ letiʼ.