Le tsikbalaʼ ku káajal yéetel Thomas Williams. (1)  * Letiʼeʼ síij 20 tiʼ enero tiʼ 1815 tu kaajil Horncastle (Inglaterra). Dos años yaantiʼ ka kíim u maama. John u taataeʼ anchaj u kanáantik paʼteʼ yéetel uláakʼ óoxtúul paalal. Thomaseʼ kaʼansaʼab u beet u carpinteroil tumen u taata, baʼaleʼ letiʼeʼ yaanal baʼax u kʼáat kaʼachi.

Teʼ kʼiinoʼoboʼ yaʼab baʼax kʼexpaj ichil le religionoʼob yaan Inglaterraoʼ. John Wesley, juntúul predicador tu pʼataj le Iglesia anglicanaoʼ, tu beetaj le Sociedad de Metodistasoʼ, junmúuchʼ máakoʼob aʼalik kʼaʼabéet u xoʼokol le Biblia yéetel u kaʼansaʼal baʼax ku yaʼalikoʼ. U kaʼansaj Wesleyeʼ séeb kʼiʼitpajik tuláakal tuʼux. Le familia Williamsoʼ tu creertaj le kaʼansajaʼ. Thomaseʼ káaj u kaʼansik tiʼ uláakʼ máakoʼob le baʼax tu kanoʼ ka bin bey misionero tu noojolil le Pacíficooʼ. Tu mesil julio tiʼ 1840 le maʼ úuch tsʼoʼokok u beeloʼ, bin yéetel Mary (2) u yatan tu islail Lakeba, * junpʼéel u islail Fiyi tuʼux kajaʼan canibaloʼob.

Thomas yéetel Maryeʼ talam tu yililoʼob le yáax jaʼaboʼob kajlajoʼob Fiyioʼ. Kex táaj ooxoleʼ bul kʼiin táan u meyajoʼob ich óotsilil. Tsʼoʼoleʼ tu yiloʼob uláakʼ baʼaloʼob jach kʼaastak: baʼateloʼob tuʼux ku paklan kíimskuba máak, u jiʼichʼil u kaal le viudaʼoboʼ, u kíimsaʼal mejen paalal yéetel u jaantaʼal máak tumen le canibaloʼoboʼ. U tsʼookeʼ óoliʼ mix máak u kʼáat u yuʼub u tsikbaloʼob. Mary yéetel John u yáax hijoeʼ jach kʼojaʼanchajoʼob, hasta óolak kíimkoʼobeʼ. Tu jaʼabil 1843, Thomaseʼ tu tsʼíibtaj: «Jach táaj lúub in wóol. [...] Maʼ tin kaxtik kaʼach baʼax in beete». Kex beyoʼ Thomas yéetel Maryeʼ chúukpaj u yóoloʼob tiʼ Jéeoba u Diosoʼob.

Thomaseʼ como carpinteroeʼ tu káajsaj junpʼéel naj jeʼex le ku beetaʼal Europaoʼ. Le najaʼ jach síis óol tumen beetaʼan yóokʼol junpʼéel kaʼancheʼ. Le máakoʼoboʼ jaʼakʼ u yóoloʼob ka tu yiloʼob, tumen teʼ Fiyioʼ yáax u beetaʼal junpʼéel naj beyoʼ. Antes u tsʼoʼokol le najoʼ Maryeʼ anchaj uláakʼ juntúul u hijo: Thomas Whitton Williams, (3) u abuelo in kaʼa abuelo.

Tu jaʼabil 1843, Thomas le taatatsiloʼ áantajnaj utiaʼal u suʼutul u Evangelioil Juan ich Fiyiano, kex maʼ chéen chʼaʼabil utiaʼaliʼ. * Maas maʼalob u beetik u antropologoil, tumen uts tu tʼaan u yilik bix kuxlik le máakoʼoboʼ. Hasta tu tsʼíibtaj le libro Fiji and the Fijians (1858), tuʼux ku tsolik bix u kuxtal kaʼach u kajnáaliloʼob Fiyi teʼ siglo 19.

 Ka máan trece años táan u sen meyaj Thomas teʼ Fiyioʼ, kʼojaʼanchajeʼ ka suunaj Australia yéetel u familia. Teʼeloʼ seguernaj u kaʼansik baʼax ku yaʼalik le Bibliaoʼ ka kʼuch kʼaj óoltbil bey juntúul utsul máakeʼ. Kíim tu jaʼabil 1891 tu kaajil Ballarat, Victoria.

Tu jaʼabil 1883, Thomas Whitton Williams yéetel Phoebe (4) u yatan paʼteʼ yéetel u paalaloʼobeʼ binoʼob kajtal Perth, Australia Occidental. Arthur Bakewell Williams, (5) le u kaʼatúul hijotsiloʼ, letiʼ u taata in kaʼa abuelooʼ. Teʼ kʼiinoʼoboʼ 9 años yaantiʼ.

Le ka tu cumplirtaj 22 años Arthureʼ bin meyaj Kalgoorlie, junpʼéel kaaj 600 kilómetros yanil tu lakʼinil Perth. Maʼalob u bin tiʼ le kaajaʼ, tumen teʼeloʼ yaan minaʼob tuʼux ku jóoʼsaʼal oroiʼ. Teʼ tu xokaj le juʼunoʼob ku tʼoʼoxol tumen le j-Xoknáaloʼob tiʼ le Bibliaoʼ, jeʼex kʼaj óolaʼanil kaʼach u j-jaajkunajoʼob Jéeobaoʼ, ka tu kʼáataj ka túuxtaʼaktiʼ le revista Zionʼs Watch Tower (bejlaʼeʼ U Pʼíich Tulumil Kanan). Ka tu yilaj jatsʼuts le baʼax tu kanoʼ káaj u tsikbaltik tiʼ u maasil yéetel káaj u beetik muchʼtáambaloʼob. Bey káajik u meyaj u j-jaajkunajoʼob Jéeoba tu luʼumil Australia Occidentaloʼ.

Arthureʼ tu tsikbaltaj tiʼ u láakʼtsiloʼob le baʼax ku kanikoʼ. U taataeʼ maʼalob tu yilil úuchik u yokol ichil le j-Xoknáaloʼob tiʼ le Bibliaoʼ, baʼaleʼ maʼ xáanchaj ka kíimiʼ. Phoebe u maama Arthureʼ kʼuch u beetuba xan j-Xoknáal tiʼ le Bibliaoʼ, bey xan Violet yéetel Mary u yíitsʼinoʼob. Violeteʼ tu beetuba precursorail, u kʼáat u yaʼaleʼ tu máansaj yaʼab tiempo táan u kaʼansik baʼax ku yaʼalik le Bibliaoʼ. Arthureʼ tu yaʼaleʼ «teʼ Australia Occidentaloʼ maʼ yanak uláakʼ precursor ka u jach tsʼáa u yóol meyaj jeʼex tu beetil Violetoʼ». Maʼ xaaneʼ maʼ jach jeʼex tu yaʼaliloʼ, baʼaleʼ le uláakʼ generación Williamsoʼ tu kanoʼob tiʼ Violet u tsʼáaik u yóoloʼob teʼ kʼaʼaytajoʼ.

Ka máan kʼiineʼ Arthureʼ tsʼoʼok u beel, ka bin kajtal Donnybrook tu noojol-chikʼinil Australia Occidental tuʼux yaan yaʼab parcelaʼobiʼ. U vecinoʼobeʼ ku yaʼalikoʼob kaʼacheʼ U locoil 1914, tumen mantatsʼ táan u tʼaan tiʼ u profecíailoʼob le Biblia yoʼolal 1914. * Le ka káaj le Yáax Nojoch Baʼateltáambaloʼ xuʼul u yaʼalal baʼal tiʼ. Arthureʼ suuk u tsʼáaik folletoʼob yéetel uláakʼ jóoʼsaʼaniloʼob tu tienda utiaʼal ka ilaʼak tumen le máakoʼoboʼ yéetel ku tsikbaltiktiʼob baʼax ku yaʼalik le Bibliaoʼ. Como maʼ tu creertik le Trinidadoʼ, tu tsʼáaj junpʼéel letrero tuʼux ku yaʼalik yaan u tsʼáaik 100 libras tiʼ le máax kun eʼesik jaaj u kaʼansajil le Trinidadoʼ. Mix máak ganart le premiooʼ.

Tu yotoch le familia Williams yaan Donnybrookoʼ tiʼ ku beetaʼal kaʼach le muchʼtáambaloʼoboʼ yéetel tiʼ ku bin le máakoʼob utiaʼal u tsʼaʼabal xook tiʼoboʼ. Ka máan kʼiineʼ Arthureʼ tu líiʼsaj junpʼéel tiʼ le yáax Najiloʼob Reino beetaʼab teʼ Australia Occidentaloʼ. Kex taʼaytak 80 años tiʼeʼ ku tsʼáaik u flus yéetel u corbata,  ku natʼik Doll, u chʼijaʼan tsiimin, tsʼoʼoleʼ ku bin kʼaʼaytaj tiʼ tuláakal u distritoil Donnybrook.

Arthureʼ juntúul utsul máak jach tranquilo, baʼaleʼ jach tu tsʼáaj u yóol u meyajt Dios. U paalaleʼ bey jóokʼikoʼob xanoʼ. Florence (6) u hijaeʼ tu beetaj u misionerail tu luʼumil India. Arthur Lindsay (7) yéetel Thomas u hijoʼobeʼ, jeʼex u taataʼobeʼ, yaʼab tiempo tu beetaj u ancianoiloʼob teʼ múuchʼuliloʼ.

Arthur Lindsay Williams in kaʼa abueloeʼ jach táaj uts u modos kaʼachi. Mantatsʼ ku jóoʼsik tiempo utiaʼal u yáantik u maasil, yéetel maʼalob u tratartikoʼob. Tsʼoʼoleʼ jach maʼalob u chʼaak yéetel u báat. Ichil doce añoseʼ 18 u téenel tu ganartaj u campeonatoil regional tiʼ chʼak cheʼ.

Baʼaleʼ maʼ jatsʼuts tu yilil baʼax tu beetaj u chan hijo de 2 añosiʼ —in abuelo Ronald—. (8) Tu machaj le báatoʼ ka tu chʼaʼachʼakaj le junkúul manzana pakʼaʼan tu tséel le najoʼ. U maama Ronaldeʼ tu báaʼkʼaxtaj u chuun le paakʼal utiaʼal maʼ u kíimiloʼ. Ka máan kʼiineʼ jach táaj chʼujuk le ich tu tsʼáajoʼ, ka kʼuch kʼaj óoltbil Lady Williams le clase manzana jeʼeloʼ. Tiʼ u taal le manzana tʼúuntʼun yaʼax kʼaj óolaʼan bey Cripps Pink tuláakal tuʼuxoʼ.

Ka nojochchaj in abuelo Ronaldeʼ maʼ seguernaj u kʼaskúuntik baʼaloʼobiʼ. Letiʼ yéetel in abuelaeʼ yaʼab años áantajnajoʼob utiaʼal u beetaʼal najoʼob Australia yéetel islas Salomón tumen le j-Jaajkunajoʼoboʼ. Bejlaʼeʼ óoliʼ 80 años yaan tiʼ in abuelo, baʼaleʼ láayliʼ ku meyaj bey anciano tiʼ junpʼéel múuchʼulileʼ yéetel ku yáantaj utiaʼal u beetaʼal wa u yutskíintaʼal Najiloʼob Reino teʼ Australia Occidentaloʼ.

Jeʼex tu beetil u úuchben láakʼtsiloʼobeʼ in taata Geoffrey (9) yéetel in maama Janice (10) Williamseʼ tu tsʼáaj u yóol u kaʼansoʼon teen (12) yéetel in wíitsʼin Katharine (11) k-kuxtal jeʼex u yaʼalik le Bibliaoʼ. Ka tin cumplirtaj 13 añoseʼ tin chʼaʼtuklaj in kuxtal jeʼex tu kaʼansilenoʼoboʼ. Tiʼ junpʼéel asambleaeʼ tin wuʼuyaj John E. Barr, máax tiaʼan ichil le Cuerpo Gobernante tiʼ u j-jaajkunajoʼob Jéeoba, u yaʼalik tiʼ le táankelmoʼoboʼ: «Beora ku páajtalaʼ kʼaj óolteʼex yéetel yaabilteʼex Jéeoba. Letiʼe baʼax maas maʼalob jeʼel u páajtal a beetkeʼexoʼ». Teʼ áakʼab tin kʼubaj in kuxtal tiʼ Jéeobaoʼ. Ka máan dos añoseʼ tin beetinba precursoril.

Bejlaʼeʼ teen yéetel in watan Chloeeʼ k-máansik yaʼab tiempo táan k-tsikbaltik u Tʼaan Dios tu kaajil Tom Price, junpʼéel chan kaaj tuʼux yaan minaʼob tu xaman-chikʼinil Australia Occidental. K-meyaj chéen jujunpʼéel kʼiin utiaʼal k-manik baʼax kʼaʼabéettoʼon. In taataʼob, in wíitsʼin Katharine yéetel Andrew in cuñadoeʼ láaj precursoroʼob tu kaajil Port Hedland; le kaajaʼ tiaʼan 420 kilómetros teʼ xamanoʼ. Teen yéetel in taataeʼ ancianoʼon xan tiʼ múuchʼulil.

Tsʼoʼok u máan siete generacionoʼob desde ka chʼaʼtuklaʼab u meyajtaʼal Jéeoba Dios tumen Thomas Williams, u abuelo u kaʼa abuelo in taata. ¡U meyajtaʼal Jéeobaeʼ letiʼe herencia maas koʼoj tsʼoʼok u pʼaʼataltenoʼ!