Teʼ Bibliaoʼ suuk u yaʼalaʼal tiʼ Jesús ‹u Paal Dios› (Juan 1:49). Le tʼaan ‹u Paal Diosoʼ› ku tsʼáaik naʼatbileʼ Dios beet tuláakal baʼal yéetel letiʼ u sayabil le kuxtaloʼ, leloʼ u kʼáat u yaʼaleʼ letiʼ beet Jesús (Salmo 36:9; Apocalipsis 4:11). Le Bibliaoʼ maʼ tu yaʼalik wa Dioseʼ anchaj u paalal jeʼex u yantal u paalal wíinikoʼ.

 Le Bibliaoʼ ku yaʼalikeʼ le ángeloʼoboʼ «u paalal Dios» (Job 1:6, nota). Tsʼoʼoleʼ ku yaʼalik xaneʼ «Adáneʼ u hijo Dios» (Lucas 3:38). Pero le Bibliaoʼ ku yaʼalikeʼ Jesúseʼ u yáax hijo Dios tumen letiʼ yáax beetaʼabi yéetel mix máak áant Dios utiaʼal u beetik.

•  ¿Tiaʼan wa kaʼach Jesús teʼ kaʼan antes tiʼ u taal way Luʼumeʼ?

•  ¿Baʼax ku beetik kaʼach Jesús teʼ kaʼan antes u taal way Luʼumeʼ?

 Antes tiʼ u taal way Luʼumeʼ Jesúseʼ tiaʼan teʼ kaʼan bey juntúul espíritueʼ. Letiʼeʼ tu yaʼalaj: «Tsʼoʼok in wéemel teʼ kaʼan[oʼ]» (Juan 6:38; 8:23).

 Jesús yáax beetaʼab tumen Dios. Le Bibliaoʼ ku yaʼalik:

•   «Tiʼ tuláakal le baʼaloʼob beetaʼanoʼoboʼ letiʼ yáax beetaʼabi» (Colosenses 1:15).

•   Letiʼeʼ «u káajbal le baʼaxoʼob u beetmaj Diosoʼ» (Apocalipsis 3:14).

 Jesúseʼ tu béeykuntaj le profecía ku yaʼalik «úuch yanak» yéetel «tsʼoʼok u sen máan kʼiinoʼob yanak» (Miqueas 5:2; Mateo 2:4-6).

 Tsʼaʼan kaʼach junpʼéel nojoch meyaj tiʼ. Juntéenjeakeʼ tu yaʼalaj tiʼ Dios: «In Yuum, tsʼáaten le páajtalil yaanten kaʼach ta tséeloʼ, le yaanten kaʼach táanil tiʼ u yantal yóokʼol kaaboʼ» (Juan 17:5).

 Tu yáantaj u papá u beet u maasil baʼaloʼob. Jesúseʼ tu yáantaj u papá u beet u maasil baʼaloʼob. Meyajnaj tu yéetel bey «juntúul máak jach u yojel meyajeʼ» (Proverbios 8:30). Le Bibliaoʼ ku yaʼalikeʼ: «Tu yoʼolal letiʼeʼ beetaʼab tuláakal le uláakʼ baʼaloʼob yanoʼob teʼ kaʼanoʼ bey xan le yanoʼob way luʼumeʼ» (Colosenses 1:16).

 Jesúseʼ tu yáantaj Dios utiaʼal u beetik tuláakal baʼal, le ángeloʼoboʼ yéetel tuláakal le u maasil baʼaloʼob yanoʼ. (Apocalipsis 5:11). Le meyaj tu beetaj Dios yéetel Jesúsoʼ jeʼel u páajtal u keʼetel yéetel le meyaj ku beetik juntúul arquitecto yéetel juntúul albañiloʼ. Tumen letiʼe arquitecto aʼalik bix kun beetbil le najoʼ, pero letiʼe albañil beetik le meyajoʼ.

 Jesúseʼ letiʼe Tʼaanoʼ. Táanil tiʼ u taal way Luʼumeʼ tiʼ Jesúseʼ ku yaʼalaʼal kaʼach «le Tʼaanoʼ» (Juan 1:1). Leloʼ u kʼáat u yaʼaleʼ Jesús aʼalik tiʼ le ángeloʼob le baʼaxoʼob ku yaʼalik Diosoʼ.

 Yaan baʼaxoʼob eʼesikeʼ Dioseʼ tu túuxtaj Jesús u yaʼal jujunpʼéel baʼaloʼob tiʼ wíinik. Maʼ xaaneʼ Jesús aʼal tiʼ Adán yéetel Eva le baʼaxoʼob unaj u beetkoʼob tu jardínil Edénoʼ (Génesis 2:16, 17). Maʼ xaan xaneʼ Jesúseʼ letiʼe ángel túuxtaʼab utiaʼal u nuʼuktik le israelitaʼob teʼ desiertooʼ (Éxodo 23:20-23). a