Le Bibliaoʼ chéen juntéeniliʼ ku tʼaan yoʼolal le tatuajeʼoboʼ. Levítico 19:28, ku yaʼalik: «Maʼ unaj a [...] tatuarkabaʼexiʼ». Úuchjeakileʼ le máakoʼob tiʼ uláakʼ kaajoʼoboʼ ku tatuarkoʼob u kʼaabaʼ u diosoʼob tu yootʼeloʼob. Le oʼolal Jéeobaeʼ tu yaʼalaj tiʼ le israelitaʼob maʼ u beetkoʼob beyoʼ (Deuteronomio 14:2). Le Ley tsʼaʼab tiʼ le israelitaʼoboʼ xuʼul u meyaj. Chéen baʼaleʼ le máaxoʼob meyajtik Jéeobaoʼ kʼaʼabéet u chʼaʼikoʼob en cuenta baʼax ku yaʼalik le Leyoʼ tumen ku yeʼesik baʼax ku tuklik Jéeoba yoʼolal le tatuajeʼoboʼ.

¿Kʼaas wa ka u tatuarkuba le máax meyajtik Diosoʼ?

 Koʼox ilik jujunpʼéel tekstoʼob jeʼel u yáantkoʼon k-núuk le preguntaoʼ.

•   Le Bibliaoʼ ku yaʼalikeʼ le kéen u vestirkuba le koʼoleloʼoboʼ unaj u beetkoʼob «yéetel maʼalob tuukul» (1 Timoteo 2:9). Le baʼax ku yaʼalik le tekstooʼ láayliʼ bey unaj u beetik le xiiboʼoboʼ. Le máaxoʼob meyajtik Jéeobaoʼ ku yilkoʼob u respetarkoʼob bix u tuukul u maasil yéetel maʼatech u beetkoʼob wa baʼax tu wíinkliloʼob chéen utiaʼal ka ilaʼakoʼob tumen u maasil.

•   Yaan máaxoʼobeʼ ku tatuarkubaʼob utiaʼal u yeʼeskoʼob táakaʼanoʼob ichil junpʼéel grupo máakoʼob wa chéen utiaʼal u yeʼeskoʼob jeʼel u páajtal u beetkoʼob jeʼel baʼaxak tu wíinkliloʼobeʼ. Chéen baʼaleʼ le Bibliaoʼ ku yaʼalik tiʼ le máaxoʼob meyajtik Diosoʼ: «Kʼub a wíinklileʼex yéetel a kuxtaleʼex tiʼ Dios, kʼubeʼex bey junpʼéel sacrificio santo yéetel kʼambeʼen tu táaneʼ. Beyoʼ yaan a meyajtikeʼex Dios yéetel tuláakal a tuukuleʼex» (Romanos 12:1). Utiaʼal u yilik máak wa yaan u tatuarkubaeʼ kʼaʼabéet u jach tuklik baʼax oʼolal u kʼáat u beete. Por ejemploeʼ yaan máakoʼobeʼ ku tatuarkubaʼob tumen de moda yanil wa tumen táakaʼanoʼob ichil junpʼéel grupo máakoʼob. Wa tu yoʼolal le baʼaloʼob taak a tatuarkabaoʼ maʼalob ka tuukulnakech tiʼ lelaʼ: ¿Kux túun wa ku máan de moda le tatuaje in kʼáat in beetoʼ? ¿Kux túun wa kin arrepentireʼ? Wa ku jach tuklik máak tubeel baʼaxten u kʼáat u tatuartubaeʼ yaan u chʼaʼtuklik u beetik baʼax maʼalob (Proverbios 4:7).

•   Le Bibliaoʼ ku yaʼalik: «Le baʼax ku chʼaʼtuklik le máax sáakʼóoloʼ ku jóokʼol maʼalobil, pero tuláakal le máaxoʼob chéen ku jáajan beetkoʼob wa baʼaxoʼ seguro yaan u yóotsiltaloʼob» (Proverbios 21:5). U suukileʼ le máaxoʼob ku tatuarkubaʼoboʼ chéen ku jaan beetkoʼob, maʼ tu tuklikoʼob tubeel. Chéen baʼaleʼ le máax beetik beyoʼ kéen máanak kʼiineʼ ku tsʼáaik cuentaeʼ maʼ maʼalob baʼax tu beetiʼ. Ku afectartik bix u biskuba yéetel u maasil yéetel yaan horaeʼ istikyaj u kaxtik meyaj. Tsʼoʼoleʼ koʼoj u luʼsaʼal junpʼéel tatuaje tiʼ máak yéetel jach yaj. Tsʼoʼok u yilaʼal xaneʼ yaʼab máakoʼobeʼ ku arrepentiroʼob úuchik u tatuarkubaʼob, tumen bejlaʼeʼ táan u bin u maas yaʼabtal le negocioʼob tuʼux ku luʼsaʼal le tatuajeʼoboʼ.