Maʼatech. Le Bibliaoʼ ku yaʼalikeʼ Dios beet wíinik yéetel u clasesil xíiwoʼob bey xan cheʼob (Génesis 1:12, 21, 25, 27; Apocalipsis 4:11). Le Bibliaoʼ ku yaʼalikeʼ Dios beet Adán yéetel Eva, le yáax wíinikoʼoboʼ (Génesis 3:20; 4:1). Maʼ tu yaʼalik wa meyajnaj tiʼ Dios le evolución utiaʼal u beetik tuláakal baʼaloʼ. Tsʼoʼoleʼ le Biblia xanoʼ maʼ tu bin tu contra le baʼax tsʼoʼok u investigartik le científicoʼob yoʼolal le jejeláas formas yaan tiʼ junpʼéel baʼalcheʼ wa uláakʼ baʼaloʼoboʼ. a

•  Baʼax ku yaʼalik jujuntúul máakoʼob

•  Le evoluciónoʼ, ¿ku bin wa tu contra baʼax ku yaʼalik le Bibliaoʼ?

•  Le bix u kuxtal juntúul baʼalcheʼ wa junpʼéel paakʼal yaan wa tuʼuxoʼ, ¿ku yeʼesik wa ku evolucionaroʼob?

 Le Encyclopædia Britannicaoʼ ku yaʼalikeʼ le tʼaan evolución teísticaoʼ u kʼáat u yaʼaleʼ le bix u kʼexpajal juntúul baʼalcheʼ wa junpʼéel paakʼal según le tuʼux yanoʼ letiʼe baʼax ku meyaj tiʼ Dios utiaʼal u beetik u evolucionar tuláakal baʼaloʼ.

 Ichil le evolución teísticaoʼ táakaʼan xan le baʼaloʼobaʼ:

•   Tuláakal le baʼaloʼob kuxaʼanoʼoboʼ taaloʼob tiʼ baʼaloʼob yaniloʼob desde úuchjeakileʼ.

•   Junpʼéel baʼal kuxaʼaneʼ jeʼel u páajtal u chʼaʼik u forma yaanal baʼaleʼ. Lelaʼ kʼaj óolaʼan bey macroevolucióneʼ.

•   Dios beetik u evolucionar wa baʼax.

 Wa jaaj le evoluciónoʼ, bejlaʼa maʼ jaaj le baʼax ku yaʼalik u libroil Génesis yoʼolal bix tu beetil Dios le baʼaloʼoboʼ. Ka taal Jesús way Luʼumeʼ tu yaʼalaj jaaj baʼax ku yaʼalik le Bibliaoʼ (Génesis 1:26, 27; 2:18-24; Mateo 19:4-6). Le tiaʼan kaʼach teʼ kaʼanoʼ tu yáantaj u Taata u beet tuláakal baʼal (Juan 1:3). Le oʼolaleʼ le u yaʼalaʼal meyajnaj tiʼ Dios le evolución utiaʼal u beetik tuláakal baʼaloʼ ku bin tu contra baʼax ku yaʼalik le Bibliaoʼ.

 Le Bibliaoʼ maʼ tu bin tu contra le baʼax tsʼoʼok u investigartik le científicoʼob yoʼolal le jejeláas formas yaan tiʼ junpʼéel baʼalcheʼ wa uláakʼ baʼaloʼoboʼ. Maʼ xan tu yaʼalik wa maʼ jaaj le u yaʼalaʼal ku kʼexpajal juntúul baʼalcheʼ wa junpʼéel paakʼal según le tuʼux yanoʼ. Yaʼab máakeʼ ku yaʼalikeʼ lelaʼ láayliʼ evolucióneʼ, chéen baʼaleʼ kéen úuchuk lelaʼ chéen ku kʼexpajal bix yanil, maʼ táan u yantal junpʼéel túumben baʼal kuxaʼaniʼ.