Le kíimiloʼ bey juntúul enemigo ku chʼaʼpachtikoʼoneʼ, le oʼolal jach kʼaʼabéet u kanáantik máak u kuxtal (1 Corintios 15:26). Chéen baʼaleʼ yaan máaxoʼobeʼ jach ku píitmáan u chʼaʼikoʼob saajkil tiʼ le kíimiloʼ maases yoʼolal le baʼaloʼob maʼ jaajtak ku creerkoʼoboʼ wa yoʼolal supersticiónoʼob. Pero u chʼaʼik saajkilil máak beyaʼ ku beetik u pʼáatal maʼ kiʼimak u yóoliʼ (Hebreos 2:15). Junpʼéel baʼax jeʼel u yáantkoʼon utiaʼal u xuʼuluk k-chʼaʼik saajkil tiʼ le kíimiloʼ letiʼe ka k-kan baʼax ku yaʼalik le Biblia tu yoʼolaloʼ (Juan 8:32).

U jaajil tu yoʼolal le kíimiloʼ

•   Le kimenoʼoboʼ maʼ u yojloʼob mix baʼaliʼ (Salmo 146:4). Minaʼan baʼax oʼolal k-sajaktal tiʼ le kíimiloʼ tumen le Bibliaoʼ ku yaʼalikeʼ le kimenoʼoboʼ maʼ táan u sufriroʼobiʼ, baʼaxeʼ bey chéen táan u weenloʼobeʼ (Salmo 13:3; Juan 11:11-14).

•   Le kimenoʼoboʼ maʼ tu páajtal u beetkoʼobtoʼon baʼax kʼaas, kex jach yaan u muukʼoʼob wa jach kʼasaʼanoʼob kaʼachi. Le Bibliaoʼ ku yaʼalikeʼ le kimenoʼoboʼ mix baʼal ku páajtal u beetkoʼob yéetel «tsʼoʼok xan u xuʼulul [...] le celos ku yuʼubikoʼob kaʼachoʼ, yéetel wa yaan máax u pʼekmoʼob kaʼacheʼ tsʼoʼok xan u xuʼulul» (Proverbios 21:16; Eclesiastés 9:6).

•   Le kíimiloʼ maʼ u xuul tuláakal baʼaliʼ. Dioseʼ yaan u kaʼa kuxkíintik yaʼab tiʼ le máaxoʼob tsʼoʼok u kíimloʼoboʼ (Juan 5:28, 29; Hechos 24:15).

•   Dioseʼ ku yaʼalikeʼ maʼ kun xáantaleʼ «maʼ tun yantal kíimil» (Apocalipsis 21:4). Le Bibliaoʼ ku yaʼalikeʼ «le máaxoʼob ku beetkoʼob baʼax maʼaloboʼ yaan u pʼáatloʼob way luʼumeʼ, way kun kajtaloʼob utiaʼal mantatsʼeʼ». Teʼ kʼiinoʼob jeʼeloʼ mix máak kun sajaktal tiʼ le kíimiloʼ (Salmo 37:29).